lMALAGA AU JUNIOR FOOTBALL TAFUNA & FAGAITUA TAALOGA I SAMOA

O lo’o tapenapena aoga maualuluga a Tafuna ma Fagaitua ina ia masi’i atu i Samoa mo ni a latou ta’aloga faasamasamanoa, ae tapena ai fo’i Samoa mo sana ulua’i ’au Football e amata ai fo’i lea ituaiga Lakapi Fa’a-Amerika i o latou lotoifale.

I le taimi nei ua fa’ailoa mai e Kolose Ili o Taluna High, “E le fa’ataga o le aumalaga a le Warrior Nation, leaga o le Motu i Sisifo e lelei fo’i o latou tupulaga i so’o se fa’agatama, peita’i, o lo’o ‘ave le fanau o lo’o tapena fo’i mo le tauaga a’oga fou ina ia lelei o latou tomai i le fa’agatama ua matele ina fiafia tele o tatou matua ma aiga e tapua’ia ai faiva o le fanau talavou, le Football.”

O le au malosi a le Kolisi a St Josephs i Lotopa lea ua latou fuafua e tofu nei ‘au malaga ma le latou ta’aloga fa’apitoa e fetaui ai ma i latou.

O le ulula’i ta’aloga ua fa’atulaga mo Tafuna High ma St. Joseph’s o le aso 14 Iulai, 2017 ona soso’o ai lea ma le ta’aloga ma Fagaitua High. Ua fa’ailoa mai fo’i e Kolose Ili, “O lea ua matou fuafua e malaga ese atu ia Iulai 9, 2017 ina ia lava fo’i le taimi e ta’a’alo ai tamaiti o le ‘au i malae o Samoa, ia fa’amasani fo’i i le lagona i na eleele fa’atasi ai ma le tau o Samoa fo’i ia.”

Ina ia tapena lelei mo lea fa’amoemoe, ua latou tu’ufa’atasia fo’i le vaega e sapaia o latou fa’amoemoega uma, Booster’s Club, lea e aofia ai Matua ma Aiga lautele o fanau o lo’o aofia i le Junior Varsity Team a Tafuna High. Ua latou tapena i ala e saili tupe ai e fesoasoani atili i le malaga ese atu o lenei ‘au mo Samoa.

O se tasi o nei sailiga sa fa’atino i le taeao o le aso Toona’i na te’a nei i lumafale o le Faleoloa Fly Inc. ma sa fa’atatuaia lea e le Booster’s Club. O le aofai o le seleni sa mafai ona latou tu’ufa’atasia, ua fa’ailoa mai, e taofia lava lea e le Boosters Club aua o i latou lea e sailia fesoasoani uma e mafai ai ona masi’i atu le latou ‘au football mo Samoa ia Iulai.

LU’ITAU MAI LE KOVANA - FA’A-SOLAR UMA AIGA

I se tautalaga ua fa’asalalauina fa’alaua’itele a le Kovana i le taimi na tatala aloa’ia ai le eletise-solar i Ofu i Manu’atele, sa ia lu’ia ai le ASPA ma lana pulega, ina ia mafuli i latou ua i ai le tomai fa’aneionapo e fa’atula’ia ai ala eseese e mafai ona gaosia ai le eletise e fa’aola ai mata ma lama o aiga ta’itasi i le atunu’u.

E le o se mea fou lea fa’ato’a mafaufauina e nisi o le mamalu o le atunu’u, aua o lo ua mae’a ona fa’atula’ia pisinisi mo le fa’atau mai o Panele mo le miti’ia o ave malolosi o le La e avea ma puna’oa o le eletise e fa’aaogaina e se aiga atoa.

Ona oo mai lea o le La o Samoa, o se tasi o faipisinisi i Hawaii ua manatu ina ia fa’auia lana lafoga e totogia mai ai se polokalama fa’apitoa e fa’atula’ia ai ni panele e ta’i lima ma sili atu mo aiga uma e  fia maua lea fesoasoani, ae fa’aaoga o se poloketi o lo’o ia fa’atupea e fa’aitiitia ai lana lafoga totogi i le Malo tele.

O lena fa’amoemoe e matua manaia lava ma sa uia ala uma tau feuiuia’iga ina ia fa’ailoa i le mamalu o le atunu’u na tusia suafa e manana’o i lea auaunaga, ma e matua fa’aitiitia ai latou pili eletise, e silia ma le 4,000 aiga na lisia a latou mita ma suafa na talosaga ai, ona e manana’o i panele e fa’atula’ia mo i latou.

O lo ua fa’atautaia pea galuega e ao ina mua’i fa’atino mo lea auaunaga, ae o le a una’ia malosi e lea foi Kamupani le fa’amoemoe maualuga ua fa’aleo nei e le affoga le Kovana Sili Lolo Matalasi Moliga, ia oo atu i le 2020, ua mae’a fa’a-solar uma Aiga ua tofu mita eletise nei.

Ua iloga mai ua toe taumafai mai lenei fa’amoemoe maualuga i le taimi nei. Ua fa’aigoaina o le Samoa Vision, ma o lo’o aumaia fo’i e le Hawaii Vision, ao le faipisinisi lava e tasi. O lona uiga, o le fa’amalosi ua taua’ao mai nei e le Kovana, ua tatou mautinoa ai, ua ataata mai ni ata o taulelei.

Fa’amalosia aiga, ina ia una’ia lea suiga i o tatou aiga, ia mafai ona tumaoti mai le aiga mai le so’ona fa’alagolago o i tatou i le ASPA i taimi uma e totogia uma i ai tatou malosi’aga fa’aeletise, ae mafai fo’i ona fa’aititia le toatuga o lea matagaluega i le taumafai e oo mamao atu latou tautua i o tatou aiga ta’itasi, ae mafai ona mafuli ane e fa’aleleia isi tautua o lo’o latou fa’atautaia e aofia ai le Suavai Lafoa’i ma le Suavai Taumafa mama mo le mamalu lautele o le atunu’u.

Afai e tele le Enetia e maua mai au panele i aso e vevela tele ai le la, e mafai ona fa’atula’ia mani au ma’a tetele [pei o ma’a o ta’avale afi] e utufia i ai, ina ia fa’aaogaina lea e lou aiga i aso ua timu soo ma ua louloua ai le tau, ua leai se la e maua ai le eletise.