FA’AU’U LINA A. SU’A UH MANOA-SIKOLASIPI A LE MCDONALDS

O le tama’ita’i talavou o Lina Aolele Su’a sa fa’au’u mai le Kolisi Tu’ufa’atasi o Amerika Samoa ma sa maua sikolasipi a le McDonalds e tausailia ai lona fa’ailoga maualuga i mataupu tau su’etusi i le Iunivesite o Hawaii i Manoa, lea ua fa’amanuiaina ana a’oa’oga, ma ua ia matua fa’afetaia lea avanoa matagofie sa taua’aoina ia mo ia e le McDonalds ua mafai ai ona ausia lona fa’amoemoe.

“Ua ou umia le fa’ailoga Bachelors of Science in Accounting mai le Iunivesite o Hawaii Manoa, ma ua ou lagona ai, e ao ina ou fa’ao’o atu se fa’afetai tele i le kamupani a le McDonalds American Samoa, le pule sili Tautolo Charlie Tautolo ma le mamalu o le Pulega fa’apea le aufaigaluega uma, ona o le sikolasipi e $25,000 sa ou mauaina i le tausaga e 2015, lea ua gafatia ai e lo’u tagata fa’atauva’a ona totogia uma a’u a’oga mo lenei fa’ailoga. Fa’afetai tele, ia fa’amanuia lava le Atua i le pisinisi ma le tautua o lo’o fa’atino pea mo tagata lautele ae maise tupulaga tausaili le étamai i Kolisi ma Iunivesite i fafo ma le lotoifale fo’i o si tatou atunu’u,” o se tala fiafia lea a Su’a ina ua feso’ota’i ma ia mo lenei tala.

E le gata ai ia te ia le fa’afetai, ae o nai ona matua ma ona tuagane. Le susuga Tofa Galumalemana Su’a ma le faletua o Katerina Ameperosa Su’a ua loa tausaga o faigaluega o se faia’oga, ma pulea’oga i Kanana Fou Elementary School.

Sa taua foi e Su’a “O le maualuga sa ofoina e le McDonalds mo le fanau a’oga i Iunivesite e $20,000 peita’i i le tausaga na ou mauaina ai lea avanoa matagofie, o le atoaga fo’i lea o le 25 tausaga o le tautua a le McDonalds i Amerika Samoa, ma ua fa’asili ai e i latou le tupe taua’aoina mo a’u i le $25,000 ua talafeagai lelei lava ma le aofa’iga o le tupe e mo’omia mo le totogi o le aoga.”

“O le fa’afetai lena e toe fa’asili atu fo’i, ona o le agalelei, talosia ia ou aoga e so’o le fau ma le fau mo le soifua taumafai o le atunu’u i galuega e aoga mo le mamalu lautele, ae maise mo fanau a’oga e taumafai i aoaoga ia atamamai tupulaga mo le olumana’i manuia o le atunu’u atoa,” o sana toe fa’aopoopo mai lea. O le fa’au’uga o le Spring 2017 lea na fa’au’u ai i le masina lenei o Me.

O le isi ana fa’afetai mo ana faia’oga i le Kolisi Tu’ufa’atasi i le vasega o Pisinisi Dr Faofua Fa’atoafe, Prof. Tauai ma Prof. LamYuen mo le latou una’iga malosi o ia i ana vasega e aoga i a’oa’oga tau Su’etusi, Tausitusi ma le fa’atautaiga o Pisinisi. Ae maise fo’i le tapua’iga mau a nai ona matua ma ona tuagane fa’apea le Ekalesia atoa.

“Ou te fa’ailoa atu i le fanau a’oga o lo’o tausinio ina ia sailia fa’ailoga maualuluga, talosaga mo avanoa fa’asikolasipi a le McDonalds, e fa’amaoni lava lo latou agalelei ma le aoga i taimi o le mana’omia ona totogia uma vasega. Po’o a lava tatou taumafaiga, ae le mafai ona mae’a pe afai e le mae’a totogia pili o vasega ta’itasi sa tauavea. Tau ina ia fa’amanuia le Atua i pisinisi ma i latou e fa’atautaia ona o le agalelei ma loto foa’i,” o se toe apoapoa’iga lea a Su’a i le mamalu o uso ma tuagane o fanau a’oga a Amerika Samoa.

SUA LE ‘AUVAE MAUGA I FATUMAFUTI

O se galuega tele ma na maimoaina lava e le to’atele le fa’atautaiga o le suaga o le Auvae mauga i Fatumafuti, ae leai se isi na tu ma fesiligia se pemita mo lea galuega, ae pe ua agava’a fo’i ona fa’atautaia aua e le’i leva ona i ai sologa i lea lava itu o le atu mauga lea.

Ua mae’a taofia le galuega, peita’i, ua tula’i mai ua mae’a ona suaina se vaega tele o lea atumauga, ae ua fetuunai solo ua le mailoa se isi na fa’atagaina le galuega lea. I le atugafale o lo’o lalo tonu ane o lea galuega tele, o lo’o aofia ai ma le fale nofo o le Sui Kovana Lemanu Peleti Mauga, peita’i, ua iloga e le’i talosagaina fo’i e ia lea galuega e sua ai le atumauga lea.

Ua fa’ailoa mai o le galuega lea sa fa’atino ina ia i ai se ala vave e fa’asaoina ai le fanau a’oga mai le SPICC pe afai e tutupu mai ni galulolo i le atunu’u. Pe afai fo’i o lea le fa’amoemoega na sua ai, e le’i lava lea suaga mo le fa’amoemoe.

Ona e le’i i ai se pemita e sua ai le auvae o le atumauga, ua fa’apena fo’i ona leai se fa’asalalauga mo lea galuega e pei ona faia i so’o se galuega faapea e fia fa’atino. O nisi ua fa’aleo mai lo latou le fiafia, aua e le mafai ona faia e i latou a latou galuega pe ana fai fo’i o i latou., ae o lea ua o fai lava lea galuega toetoe a mae’a fa’ato’a mafai ona taofia fa’amalosi.

O se fa’amatalaga mai se tasi o Inisinia na mafai ona talanoa e tusa o lenei galuega, “E le tatau ona so’ona suaina fa’apea le atumauga ae le’i mua’i faia se suesuega i le ituaiga o fausaga o i ai, i le tele o le palapala po’o le papa o aofia i le atumauga, ae o lea ua fai ae le’i faia, e ono tutupu lava ni fa’alavelave fa’anatura i ai, pe a tetele timuga ma toe la umi fo’i.”

Ua le maua le fa’atonu o galuega a le Malo mo se fa’amatalaga, ae o le tala na fa’ailoa mai, sa fa’ataga e lea matagaluega le galuega lea e faia, mo le fa’amoemoe e sefe ai le fanau a’oga i taimi e sosola ai i le mauga ona o ni galulolo. Mo fa’ata’ita’iga o lo’o fa’atinoina a le fanau a’oga, e ao lava ina fa’ataunu’u, ma ia fa’ailoa i le fanau mea uma e ao ina fa’asaoina ai latou soifua.