Ads by Google Ads by Google

Tala I Vaifanua


O se va’aiga i se tasi o Kesi a tagata faigaluega ua matua fa’asolosolo ai le tagata na osofa’ia lea Ofisa ua le mautinoa po’o le a tonu se mea o ia sailia. [ata: Leua Aiono Frost]

O se vaaiga i le ma’a ma le fa’amalama na togi mai fafo ma mafai ai ona tatala le isi itu o le fa’amalama e oso mai ai i totonu o le Ofisa. O lo’o ta’atia pea lea ma’a ma le tele o nutiga o le fa’amalama i le fola o le Ofisa lea, i Paka Liona i Tafuna. [ata: Leua Aiono Frost]

TOE OSOFA’I LE OFISA VOC. REHAB I PAKA LIONA

 

O le taeao o le aso Gafua na toe ala usu atu le a’u faigaluega a le Ofisa o le Vocational Rehabilitation i le Paka Liona i le latou Ofisa ua faaleagaina fa’amalama tioata, atoa ai ma kesi ua talai o latou kapeneta, ua su’egi uma i luga a latou faila, ma nisi Kesi ua na’o na fa’amesi solo lava o faila, ae foliga mai e le’i maua se mea sa sailia e lea sui talepe fale.

 

O le faigata o lenei mataupu, ona ua fiu le ofisa e tatalia se pu’eata a leoleo, e o’o atu ina ia tapu’ea ata o mea uma na oso atu ai i totonu le ‘au talepe, ma le gasu atoa ua mae’a fa’aleagaina i totonu o vaega eseese o lea ofisa. Ina ua feso’ota’i ma le sui pu’eata, sa ia fa’ailoa mai na ia mauaina le vala’au, peita’i e lua mea sa le gafatia ai ona o’o ane i le ofisa o fa’aleagaina. Ua matua le lava ta’avale a leoleo mo feoaiga, ae maise o lona pisi fo’i aua e i ai isi ona tiute e fa’atino i totonu o le Ofisa, peita’i, sa toe vala’au mai le Ofisa i Tafuna, o le a latou tapu’ea ata ma taofia mo a latou lipoti ma fa’amaumauga a lona ofisa fo’i.

 

Na te’a loa le 3:00 i le afiafi i lea aso, fa’ato’a tapena loa lea Ofisa ina ia toe taofia le toe osofa’ia fo’i o i latou.

 

Peita’i, na fesiligia le tulaga o a latou ta’avale nei e masani ona loka i le latou Ofisa, ma ua iloga mai e masani ona osofa’i e tagata talepe ma feoa’i ai i le po atoa, e pei ona faia i le ulula’i vaitaimi na osofa’ia ai i latou.

 

“O matou ta’avale ua ave uma lava e loka i le Public Works ina ia mautinoa lava le saogalemu o mea uma, ua le toe loka i’inei se ta’avale.”

 

SAILI SIAMUPINI BASEBALL TAMA AOGA MAUALULUGA

 

Ua mae’a ona toe fetaui le ‘au malosi a Taluna High Baseball ma le ‘au a le Wildcats mai Nuuuli VocTech High i le aso ananafi. Peita’i e le’i maua mai se tala o le i’uga. A’o le ta’aloga lea, o le a mautinoa ai le tulaga leai se pa’u o Tafuna po’o le tasi le latou faia’ina, ona tutusa lea ma le Voctech i lea tulaga, ma sailia ai le siamupini 2017 e le to’alua lea.

 

E toalima aoga maualuluga ua auai latou ‘au i lenei liki Baseball, ma o le ‘au lea a Leone, Fa’asao Marist, Tafuna, Voctech ma Samoana.

 

O le tamia na fa’ao’o mai ai nei fa’amaumauga o le Liki lea, o lo’o tumau lava le 18 togi mo Tafuna ma e le’i i ai se faia’ina, soso’o ai lea ma le Wildcats mai Voctech i latou ‘ai e 15 e tasi lava le latou faia’ina, Fa’asao Malisi e soso’o ai i le tulaga tolu ua lua faia’ina, ma le tulaga fa o lo’o tula’i mai ai Leone, ae o le tulaga lima lea e taumafai mai ai Samoana e le’i maua lava se manumalo.

 

O le vaiaso fo’i lenei ua fa’atulaga e faia uma ai ta’aloga o le sailia o au e ta’a’alo mo le sailiga o le Siamupini, peita’i, e le o va’aia le tulaga lelei mai o le tau i le amataga o le vaiaso. E faia taaloga i le Tony Solaita field in Tafuna.

 

TULATA ASO O TINA & FAAUUGA A FANAU AOGA

 

Ua amata ona taofiofi lelei fo’i le fa’asoaga o le tupe a aiga ta’itasi, aua ua tulata i vaitau uiga o le olaga i totonu o lotoifale o Aiga. O le aso o Tina, ua le o toe mamao, o lea vaiaso tatou molimauina fo’i tina ua tauulaula ma seisei a’o e la’ei fou fo’i latou. O le aso lea e fa’amatala auiliilia ai e le fanau lo latou agaalofa i o latou tina, ma o le a taumafai le mea sili i o latou olaga.

 

I le taimi nei ua fa’asalalauina mai fo’i pa’u o tau o telefoni a le Bluesky Communications fa’apea fo’i ma le ASTCA atoa ai ma tau o latou minute mo talanoaga e fa’ailoa atu le alofa o fanau i o latou tina. Ua fa’apena fo’i ona fa’ailoa mai pa’u o le teuga o Lauao o tina i le Sophia Salon i Nuuuli. O le pa’u fa’apitoa fo’i a le vaega o pisinisi e fa’atau mai ai ula fulagala’au manogi ma fa’apo mo tina, ae maise fo’i o teu rosa matagofie mo Tina i lo latou aso fa’apitoa.

 

I faasalalauga e fia momoli atu ai ou alofa i si ou Tina, ua i ai fo’i le fa’amama avega a le tatou nusipepa nei. Afai e totogia lau fa’asalalauga mo aso e lua, o le a maua le aso e tasi e fa’aalu ai e le totogia. Tapena mai le aso o Tina atoa ai ma fa’au’uga, ae va’ai tautua e masani ona fiafia i ai Tina uma, o lo ua latou ofoina mai ni pa’u i o latou tau, e ala i fa’asalauga fa’alaua’itele i le tatou nusipepa.