Tala I Vaifanua


O se va’aiga i le Fitafita Samoa, SSG Hes Sopoaga ua si’itia nei lona tofiga i le E5 ma o lo’o fa’aauau ai pea lana auaunaga i le USArmy ma ua aofia fa’atasi ma si ona faletua ma le fanau i lea fo’i fa’aeaga o lana auaunaga. [ata: foa’i]

O se vaaiga i le ‘au malosi mai Hawaii ua i ai nei i le teritori ma auai i le ta’amilosaga Volleyball Fa’avaomalo o lo’o fa’atautaia mo le fa’amanatuga o le tatou Sisigafu’a 2017. [ata: Leua Aiono Frost]

O se va’aiga i le au malosi fo’i mai Pavaiai lea ua auai i le ta’amilosaga volipolo i le taimi nei, o lo’o malosi fo’i le latou tula’i mai i lenei tausaga. [ata: Leua Aiono Frost]

ALO O AMERIKA SAMOA SI’ITIA TULAGA I GALUEGA

 

UA fa’afiafiaina matua ma aiga o nei alo o le atunu’u ua lauiloa ai le teritori, ona o le tautua matavela ma le fa’amaoni i galuega i le Iunaite Setete. O i latou nei ua mafai ona maua mai o latou fa’amaumauga ma si’itaga o galuega o lo ua tautua ai nei:

 

Candace Le’i Garcia: Ua avea lenei tama’ita’i ma Administrative Judge i le Matagaluega o le Puipuiga Lautele o le Iunaite Setete[US Dept of Defense], i le itu o Fa’amasinoga ma Apili i Uosigitone DC.

 

Na soifua a’e i Utulei, i nai ona matua o lo’o fa’aauau ona tautua i lo tatou malo nei, le susuga Matt Le’i ma le faletua o Amelia Le’i lea e tautua fo’i o le Administrative Officer o le Kolisi Tu’ufa’atasi o Amerika Samoa. O lo’o i ai lona uso ma ona tuagane: Jennifer, Abraham ma Benjamin Le’i, e atoa i ai le to’afa o i latou.

 

Na amatalia ana a’oa’oga i le aoga tulaga muamua a Matafao i Faga’alu, ma ua i’u ina fa’aiu ana aoga i le Fa’asao Marist High School ma fa’au’u mai ai i le tausaga e 1995.

 

Na amata ana aoga i le Kolisi Tu’ufa’atasi o Amerika Samoa ae si’itia ai loa mo lana kosi e saili ai fa’ailoga maualuluga o le Bachelors of Art i le Iunivesite o Hawaii i Manoa. Na fa’aiuina ma le manuia ana a’oa’oga ia mai lea Iunivesite ia Tesema 1998. O lana kosi sa tauavea o le Igilisi ae fa’aopoopo i ai ma Kosi Fa’aupufai o Malo.

 

Ona faigaluega ai lea o Candace o se totino o le Americorps i le Ofisa o le Legal Aid Society of Hawaii, a’o le’i toe taliu mai i Amerika Samoa nei, lea na faigaluega ai loa i le Samoa News o se tusitala.

 

Na toe taliu o ia i Uosigitone DC ina ua talia e faigaluega i le Ofisa o le tatou Faipule mo Uosigitone, Faleomavaega Eni Hunkin mo le lua masina, a’o le’i ulufale atu o ia mo le fa’aauauina o ana aoaoga i le Iunivesite o George Washington e tauavea ai ana kosi faaloia i le amataga o le tausaga a’oga 2000.

 

O le lona lua ai o tausaga o lana sailiga lea mo lona tusi fa’aloia, sa faigaluega ai loa o ia i le Matagaluega o le Initeria [DOI] i le Ofisa o le Insular Affairs, i lalo o le va’ava’aiga a le tasi fo’i o alo o Amerika Samoa, Nikolao Pula. Ina ua fa’ai’u ana a’oa’oga fa’aloia ma sa pasi lelei ai o ia i le tausaga e 2003, na toe talia fo’i lea Candace e toe galue fa’aauau mo le Initieria i le Ofisa o le Solicitor mo le isi tausaga atoa, ma o se agava’a sa ia mauaina ona sa ausia e ia togi maualuluga i lana vasega fa’au’u.

 

O iina fo’i sa ia mauaina ai le avanoa lelei e avea ai ma Loia  i le itu a le General Law mo le Initeria lava, i le vaega o tagata faigaluega ma latou aia tatau mo le ono masina, [Civil Rights Litigation.]

 

I le fa’aiuga o le tausaga 2005, na avea ai loa o ia ma Loia i le Matagaluega o le Puipuiga Lautele, USDept of Defense, i le itu o Loia e tutula’i mo Fa’amasinoga ma fa’aiuga Apili. Na faigaluega ai lava lea o ia mo le itu mo Kalefonia se’ia oo i le fa’aiuga o le tausaga 2008.

 

Ia Mati 2017 na si’itia ai le tulaga e tautua ai Candace i le avea lea ma Administrative Judge, lea e palasi i ai le fa’amoemoega sili o le Federale na te vaai toto’a ma faia fa’ai’uga tatau mo le kiliaina o le saogalemu o pisinisi fa’akonekarate e le Malo tele.

 

Ua fa’aipoipo Candace i lona to’alua o Rogelio Garcia ma ua maua le la masaga ua atoa le ta’i lua ma le afa tausaga le matutua o Amalia Conception ma Matai Le’i Garcia.

 

SSG Hes Sopoaga - Ua fa’alauiloa mai fo’i le susuga le ali’i Satini o Hes Sopoaga o le US Army o lo’o ua siitia nei lona tulaga i le E5 ma ua faalauiloa mai i lona aiga atoa ai ma ona tausoga i Pago Pago, lea fo’i fa’aeaga ua ia tula’i mai ai nei e tautua i le vaega au. “O le taumafaiga e fa’afetaia a outou tatalo lo’u aiga atoa, fa’afetai manatua mai i matou i a outou tatalo fai so’o, ia fa’amanuia tutusa le Atua soifua mo i tatou uma. Alofa’aga mo le tatou aiga uma lava, ae maise le malo i lana sisigafu’a i lenei tausaga. E le galo outou i aso uma,” o se fe’au lea na molita’i mai ma le ata e ala i le Facebook mo le aiga uma i Amerika Samoa, mai le ali’i Satini, le faletua ma le fanau.

 

TA’AMILOSAGA VOLLEYBALL SISIGAFU’A 2017

 

O le ta’amilosaga Volleyball Fa’avaomalo ua fa’aauau pea nei ana ta’aloga faitaulia mo ana pool e tolu o lo’o fa’atautaia ai le ta’amilosaga i lenei tausaga, ma ua matagofie le tauivi o nei ta’aloga, aua o lo’o auai mai ai ‘au Volipolo mai Seattle Washington, Samoa ma Hawaii.

 

O Ta’aloga a Tama’ita’i sa iloga ona matagofie le taumafaiga a le Au fili mai Hawaii i le latou fetauiga ma le All Saints mai Amerika Samoa. E tolu latou ta’aloga ona o le finau o lea fetauiga. I le seti muamua sa manumalo a’ia’i ai Hawaii, malo lea o le All Saints i le seti lona lua ae o le seti lona tolu loa ua toe fa’aalia ai le malosi tele o le itu Hawaii ina ua mae’a le ta’aloga ae na’o le 6 ‘ai a le All Saints na maua ai.

 

I le ta’aloga faitaulia fo’i i le va o le Seattle Girls ma le Tuiga, na muamua lava malo le Tuiga. Peita’i o le seti lona lua na va’aia ai e le fo’i le sau a Seattle Girls. Malo lea o Seattle i le seti lona lua ma le lona tolu. O taaloga i le va o le BTI ma Pavaiai e na’o le lua ta’aloga ona sa matua manino lava le malosi o le una’i mai a Teine o Pava. Malo uma latou i a latou sei e lua, ma ua fa’atali nei i latou mo sa latou ta’aloga e soso’o ai i pool games lava.

 

O le isi ‘au mata’ina a latou ta’a’alo o le Measina Girls Team, lea e taitaia ma faiaoga ai le tama’itai o Lydia Faleafine. O le  matua tino lelei, mata’ina le poina o polo ma e tau leai ni mea sese a i latou o ta’a’alo ai i tulaga o le lifi ma le sasi i le faatulagaina o ‘au i luga o le malae.

 

Peita’i sa matua le tu’ua lava e le BTI se avanoa i le ta’aloga lea, sa una’i mai fo’i le latou taumafaiga ina ia malo, ma e na’o le lua seti o le latou fetauiga ina ua malo uma ai le BTI mai Nuuuli i lea fetauiga mata’ina.

Comment Here