Ads by Google Ads by Google

Tala I Vaifanua


O se va’aiga i le fanau a le tofa Fuata Dr. I’atala ina ua molimoli mai lona va’a mo lona ulula’i sauniga i le Malumalu EFKAS i lona afio’aga pele o Amouli. [ata: Leua Aiono Frost]

O se vaaiga i le taimi na fa’atulaga i le sauniga o Fuata Dr I’atala, o ia fo’i sa fa’aauauina le tofi Senatoa mo lona itumalo Sa’ole, taua’aoina o le Iugafono maille fa’atasi a le Fono Faitulafono, e taualoa ai le tautua matavela a lenei Tama o le atunu’u, ua tu’ua le malo. [ata: Leua Aiono Frost]

O se va’aiga lea i le toe siakia o “Man Holes” i lumafale o le DOE i Utulei e le aufaigaluega a le ASPA, itu o le Suavai Lafoa’i. [ata: Leua Aiono Frost]

MOLIMAUINA AGALELEI & ALOFA FUATA DR. T. I’ATALA

 

O toe sauniga o le susuga le Tiakono EFKAS, a’o le tofa Fauta Dr. Tagiilima I’atala, sa molimauina ai e lona aiga, le fanau, ae maise nisi sa agalelei i ai lenei ali’i foma’i lona alofa, naunau e fa’atino tiute, atoa ma le tausi aiga o lea fo’i tama o le atunu’u. Ona e le o taliaina lava e nisi o le fanau, le tu’ua vave e lo latou tama o le mafutaga i le latou aiga, o lea sa latou molimauina ai nisi o uiga o le tama i le tausiga o i latou. “E le o se tama e na te tu’ua se mea o matou manana’o ai, ae le faivalea ai fo’i i matou e le fa’atonua. E talitonu o se tasi e galue malosi, e o lua lava ma lona naunau e fai mea lelei i lona aiga, ma so’o se mea lava i totonu o lana ekalesia, lona aiga ma le nu’u.” Na fa’avalea le alofa o ona tuafafine ia te ia, ma sa la’ua molimauina o le ali’i foma’i, o le pele e to’atasi a lona tina, aua e to’atasi lava le tama, ae to’atele tuafafine.

 

I le molimau a le faletua, sa ia fa’ailoa ai, “O Fuata I’atala o se tama e lima mafola i lana galuega, o e na e tautuaina e mana’o lava ina ia taumafai e togafitia o latou gasegase. E le faigofie ia te ia ona tu’ua le galuega a’o to’atele le mamalu o le atunuu o tatalia lana tautua. E le tautala so’o, e faifai malie foi lona ita. E laufofoga fiafia o ia, ma e le finau vale, ae matua ola finau i mea lelei.”

 

Na amata mai i ana a’oga i Avele College i Apia. Mae’a lea toe sau ulufale i Leone High ma sili fa’atasi ai ma Malaetasi Togafau i le la’ua tausaga i’u. Peita’i, e le’i fa’avaivai ai ae toe sau fesuia’i lona tomai e fia a’oga ai i fa’ato’aga ma le failafumanu. O iina fo’i sa amata ai lona olaga tautua, peita’i, e fuafua atu e ia e le lava se vaega tupe e maua ai mo le tausiga o le aiga. Ona toe oso lea su’e i le su’ega a le Vaega Au, alu ai i le Air Force mo le 4 tausaga. Na taliu mai faigaluega i le Ofisa o le Loia Sili, peita’i, na toe suia mai i lana tautua i le Falemeli o le Malo Tele.

 

Ae fa’alogo ua sau sikolasipi mo nisi e malaga e avea ma Foma’i mo le Maota Gasegase, na alu ai a’oga i Fiti, pasi lelei si’itia i Papua Niu Kini, lea e avea ai o ia ma Foma’i i le Asosi a Foma’i i Papua Niu Kini. Mai le Falemeli, ua avea ai nei ma Foma’i mo tagata lautele, sa ia pulea le itu o Foma’i mo gasegase o le Fanauiti. O nisi nei o tala sa molimauina e le to’atele i lona sofua tauivi ia manumalo ma ia maua le atamai i matata e aoga ona tautua ai tagata lautele o lona atunuu.

 

Ina ua maliu Fuata Pepa, sa ia manatu i le suafa o le aiga, na i’u lava ina malilie lona aiga atoa e se’ei i le suafa “Fuata” mo le latou aiga potopoto, lea ua malaga nei, ae ua toe avanoa mo nisi suli o le aiga e soloa’i ane i ai. Peita’i, i se tasi o molimau i lona aso, o se tasi o uso mai Sale’a’aumua i Samoa, lea sa ia fa’ailoa, “O Fuata I’atala ia te outou, ae ua mae’a fo’i ona fa’asuafaina o ia ia “Malagamauapi” se suafa tamali’i i lenei aiga. O se tagata e tauagafau ona uiga, e fa’asalafa mea uma i lona alofa, e le o se e fo’i i mea e fai o lona aiga, e aofia atu ai ma i matou i Samoa. Fuata Malagamauapi I’atala o le ali’i na tatou feso’ota’i ai i matafetau o gafa, o le ali’i fo’i na tatou ola ai mo lenei vaitaimi umi, o le ali’i na tatou maua ai le so’otaga i tautua, o le ali’i na e alofa atu ai, o le alii fo’i ua tatou mavae ai nei. Ia tu Ieova i lo tatou va, seia tatou toe fa’atasi i lena itu o le vai!”

 

O le toe sauniga o Fuata sa fa’ato’a faia i le taeao ananafi, ma lagomau ai o ia i lona aiga i Amouli. Fa’amaise le Atua i le tina ia Manumanu Sipili I’atala ma le fanau.

 

FA’AI’UI’U FA’ALELEIGA PAIPA SUAVAI LAFOFA’I - ASPA

 

Ua fa’ailoa mai e le ali’i inisinia na fa’afaigaluega fa’akonekarate e le ASPA Vaega a le Suavai Lafoa’i, Jon Mollison, ina ia toe siaki leleia “Man Hole” ma so’otaga o paipa o le Suavai Lafoa’i ua matauina o lo’o ua liki mai ai le sauvai lafoa’i i fafo, pe ua tau afaina fo’i ona ua tele le suasami po’o le suavai mai timuga ua ululai ai, ma e lea ai latou so’otaga.

 

Ina ua fesiligia le pule o lea vaega o le tautua a le ASPA, le Suavai Lafoa’i, Jason Jaskowiak, e tusa o lea lava galuega tau le suavai lafoa’i i le atunu’u, ae fa’ailoa mai e ia, “E ao ina toe faaleleia nei vaega uma, a’o le’i fa’aleagaina atili, ona tele atu lea o le vaega tupe e toe fa’aalu ai, ae lelei ona faia i le taimi nei se galuega i ai, ma toe soso’o ai le tusa o le 40 tausaga o lelei pea.”

 

Ua va’aia le faaleleia fa’atasi o “Man Holes” e lua i lumafale o le DOE ma le lumafale o le Samoana Gymnasium i le taimi e tasi, ua fa’ailoa mai, e tatau ona suia fa’atasi aua o lo’o leaga fa’atasi fo’i, ma taumafai e iloa patino se mafuaga o le leaga o nei “man holes” e lua. Ua faailoa mai fo’i “E masalomia lava o lo’o tele le suasami ma tafega o vai o timuga, ua elea vave ai faanifo o tapuni o nei alapaipa.”

 

Pe afai e mae’a uma lava ona siaki man holes ma fa’aleleia mai laina mai Aua se’ia pa’ia Tane lea e i Gataivai, ona fa’apena fo’i lea ona siakia le isi laina atoa lea e aga i Fogagogo.

 

Sa fesiligia fo’i le tulaga o le fa’ata’atitiaga o paipa o le suavai lafoai lea e sau mai Malaeimi, peita’i, ua fa’ailoa mai e Jaskowiak, “E i ai se aiga e to’atasi i Malaeimi, ua latou le manana’o ina ia fa’ataoto paipa mai le latou fanua, ma ua le mafai ai ona toe fa’agaoioia lea poloketi e pei ona manatu ai le matagaluega ia fa’ataunu’u. O lo’o gata lava le galuega po’o le fa’ata’atitiaga o paipa i le afio’aga o Futiga, ae le o Futiga atoa fo’i.”

 

Pe afai e maea ona toe fa’aleleia Man Holes nei o lea tautua, ona toe taliu lea o Mollison se’ia o’o fo’i ina toe matauina ua i ai se isi fa’aletonu i lea tautua i tulaga o paipa ma so’otaga ona toe talosaga lea e toe sau fo’i.