Tala I Vaifanua


O se va’aiga i le oo atu o le pule a’oga Mrs Tuiasosopo, i le fale fa’atali pasi sa maua atu i ai le tasi o le fanau na ave e le ta’avale a leoleo ina ia suesuea atili le fa’aletonu ua fufusu ai i latou. [ata: Leua Aiono Frost]

O se va’aiga i le sui sinia o le fale’aiga Carls JR i Nuuuli, Phil Love, ua ia tufatufaina atu paluni felanulanua’i mo le vasega o le fanau fa’apitoa, ina ua mae’a fo’i ona tufatufaina a latou mea’ai #1 or #3 i le latou lisi o mea’ai gaosia i le latou fale’aiga. [ata: Leua Aiono Frost]

O se va’aiga i le tama’ita’i faia’oga o Amy Tuiasosopo ua fa’atasi lava o ia ma le vasega o fanau fa’apitoa o lo’o ia a’oa’oina i le faitauina o tusi ta faapitoa mo i latou ua po le va’ai, pe tauaso i le a’oga i Manulele Tausala Elementary. O nei ‘aiga uma, sa totogia e le Pulega ma le Aufaigaluega a le Carl’s JR i le Laufou, Nuuuli. [ata: Leua Aiono Frost]

MISA TAMAITI AOGA TAFUNA HIGH

 

I le afiafi o le aso Lua na te’a nei, sa tau vaovao misa ai se tasi o le aufaufautua mo tamaiti aoga i luma o le fale o le Koluse Mumu i Tafuna i tamaiti aoga lava a Tafuna. E to’atolu i latou sa misa, peita’i, i le taimi na atunu’u ai Leoleo mo su’esu’ega i le mafuaga o le pisa, ua toe to’atasi lava le sui ua maua atu i le fale fa’atali pasi lea e na tupu ai le vevesi.

 

Na va’aia le savali mai o le Pule A’oga Mrs Beauty Tuaisosopo ma se tasi o tama’ita’i faia’oga ina ia fa’atasi mai i le nofoaga o le vevesi sa faia.

 

Ina ua sologa malie lea fa’aletonu, ua ave’esea fo’i le tamaititi lea e le vaega o leoleo, sa va’aia loa e le tama’ita’i pule aoga ma faia’oga, e foliaga mai o le umi ona tutu o le fanau aoga e fa’atali ni avanoa o pasi e  o ai i latou aiga, ua mafua ai ona fete’ena’i finauga a le fanau a’oga, ma mafua ai ona pisa ma fufusu.

 

“Ua va’aia ma mataulia lelei, e matua le tutu lava isi pasi mo le fanau a’oga. O le taimi e tu’ua ai le a’oga, ua fa’atali ai fo’i pasi mo tagata faigaluega i le kamupani i’a, ua tele ina fa’amumu mai moli e le avea e i latou fanau a’oga, ae ave na’o tagata faigaluega. Ona tutu ai lava lea se’i sau fo’i se pasi tua, ae sau fo’i ua matua tumu lava,” o se tala lea a le tama’ita’i pule a’oga.

 

“Ae i ai la isi pasi, e le avea e i latou fanau a’oga, ae le o ni pasi togipau fo’i ae matua tu lava na’o tagata matutua e fuafua e i latou i le pasese $1. O outou na,ua amata fo’i ona faia le lisi, e avatu i le Ofisa o Leoleo, ina ia faia se fa’ai’uga ia outou aua e le avea e i latou le fanau a’oga. Ae o se mea e tatau ona vave o ese le fanau a’oga mai nofoaga fa’atali pasi ma le tele o le vevesi ma a’afia ai i latou i pisaga fa’apenei.”

 

Na talanoa i le vaega o Leoleo, ua fa’ailoa mai, “Na mafua ona faia le laisene o pasi nei, ina ia mafai ona fe’avea’i le fanau a’oga ma so’o se tasi o lo’o fia aga’i i nofoaga mamao e agai i ai pasi, ma e le tatau ona fa’atua’oia le tautua pe fa’ailoga tagata, e pei ona matau atu i le faiga a nei ave pasi o lo’o faia i le fanau a’oga, ona o le la’ititi o le latou tupe e maua mai ai.”

 

O lo ua fa’ailoa mai, e tatau ona faia se lisi o i latou uma o ave pasi ma numera o laisene o pasi o lo’o latou fa’ailoga tagata e tatau ona fela’ua’i i a latou pasi. O le a vala’au tonu fo’i i le tagata o lo’o ona sa’o le pasi lea fa’asea a le matagaluega o Ta’avale Laisene mo fela’ua’iga o pasese a le Matagaluega o Leoleo.

 

Lona lua, e tatau fo’i ona talosagaina e le Pule A’oga se fesoasoani mai a le vaega o pasi a’oga a le Matagaluega ina ia fa’amuli atu i Tafuna a latou pasese fela’ua’i, afai e uma le fanau a’oga laiti mai a’oga tulaga muamua, ona tomuli lea o le aso i le la’uina mai o le fanau o tumutumu ai nofoaga fa’atali pasi, ina ia mautinoa ua oo fanau i o latou aiga.

 

Matauina i le aso lava lea na tupu ai lea misaga, sa sau lava le Pasi A’oga fa’asino mai le a’ao o le ave pasi o le a fo’i i lona Ofisa i le Motor Pool, ae o lo’o talotalo atu ina ia tu mai se’i la’u le fanau a’oga i o latou aiga.

 

Na fesiligia le sui fa’atonu o A’oga, Fa’auifono Vaitautolu, sa ia fa’ailoa ai, “E moni o fa’afitauli ua ala ona tutupu i nisi taimi, ua umi tele ona nonofo fanau i nofoaga ia ae le’i maua avanoa e o ai i aiga. E moni fo’i e le o fa’atonuina ave pasi aoga ina ia latou la’uina le fanau matutua nei pe a tu’ua le a’oga, aua ua latou masani, e fiafia tele le fanau a’oga maualuluga e femalaga’i i pasi tua ona o le musika ma fetaui atu ai i nisi. Peita’i, ona o fa’afitauli ua fa’ailoa atu, o le a fautuaina nei ave pasi a’oga, afai e va’aia o tumutumu nofoaga fa’atali pasi nei e tulata i a’oga maualuluga i le fanau a’oga o fa’atali pasi, aua ne’i sopoloa lana malaga, ae tu ma ave le fanau a’oga. Aua ne’i fa’apea e le fia o i le pasi a’oga, ae tatau ona faia lona tiute, tu le pasi ma ave uma le fanau a’oga i aiga. Fautuaina fo’i le fanau a’oga, fa’atu le pasi a’oga pe a va’aia ua sau e leai se pasese, ina ia utaina ai i latou e ave i o latou aiga, nai lo le a’afia o le soifua i misa ma fa’alavelave fa’afuase’i, e ono maumau ai se ola talavou.”

 

MANULELE SPED & FAIAOGA - TAUSAMI UMA I LE CARL’S JR.

 

O le aso ananafi ua foliga mai o se aso o le Tupu i le vasega o fanau o lo’o aofia i le SPED a le aoga tulaga muamua i Manulele Tausala, fa’atasi ai ma faia’oga ma Matua sa auai. O lenei alofa tula’i ma le agalelei, sa tapena i ai le pulega ma le aufaigaluega a le Carl’s JR i le Laufou i Nuuuli.

 

O le susuga Phil Love ma le aufaigaluega sa latou tautuina le vasega o fanau fa’apitoa, latou matua ma le vasega o faufautua ma faia’oga i le latou ‘aiga o le Aoauli ananafi.

 

“O lenei fa’aaloalo, ua faia fa’apitoa lava mo i latou uma o aofia i le Polokalama a le SPED i Manuelle Tausala Elementary, aua o le a’oga lea o lo’o fa’atuina fo’i i le li’o o le afio’aga o lo’o i ai le matou pisinisi, ma ua tele lava ina manatu le Pulega ma le Aufaigaluega, o i latou lava nei e faia i ai matou foa’i fa’apitoa i le tele o taimi fa’apitoa o tausaga ta’itasi,” o se tala lea a Love.

 

“Peita’i, e le o fa’a’au’au fo’i lenei tautua, e  ai taimi ua oo mai ai fo’i nisi a’oga ma latou talosaga mo ni fesoasoani, e le fo’i le Carl’s JR mai le faia pea o ana foa’i masani ai. O lona uiga, e le o fa’apito manu ia tasi, ua fa’asalafa lava i manuia ma foa’i, ae ona o lenei le a’oga e tulata lava i ai i matou.”

 

O lenei fo’i le vaiaso ua fa’apito augafa ai tima’iga ma le fa’ataua a le Manulele Tausala mo le SPED.

Comment Here