Ads by Google Ads by Google

Tala I Vaifanua


O se va’aiga i le fa’asalalauga fa’alauaitele i luma o le faitoto’a ina ia le toe fesiligia ai ni pemita mo nisi e fia malaga mai i Amerika Samoa. [ata: Leua Aiono Frost]

O se va’aiga i le au Volleyball a le Liana lea ua auai nei i le Liki Volipolo o le Sisigafua 2017 a le ASVBA. [ata: foai]

O se va’aiga i le ‘au Volipolo a tama, Pago Boys, malo lava le ta’a’alo fa’atausala. [ata: foa’i]

LEAI SE VAITUSI MASINI LOMIA PEMIT - TAPUNIA 2 ASO

 

O le aso Faraile ua te’a ma le aso Gafua o lenei vaiaso, sa tapunia ai le tautua a le Ofisa o Femalaga’iga i le itu e talosagaina ai pemita mo tagata mai fafo. Ole fa’aletonu na fa’ailoa fa’alaua’itele mai, “Ua leai se vaitusi o le masini lolomi” mo lea tautua.

 

Na le fiafia nisi o le atunu’u ma latou fa’ailoa mai i le Samoa News lenei fa’afitauli, ma sa maofa ai fo’i le agaga ona o le faigofie o le mea ua taofia ai lea itu o le auaunaga.

 

Ina ia vala’au ma tali mai, sa fa’amaonia e moni lava fa’ato’a mafai ona faia permita mo nisi e fia malaga mai i Amerila Samoa i le taeao o le aso Lua, ona sa tapunia le tautua o le mafuaga ua ta’ua i luga.

 

Afai o le ma’ale’ale lea o le tautua, ou te lagona ua matua tatau ona fa’alava le sapalai o nei mea uma, a’o le’i tutupu mai mea fa’apenei, ae tatau fo’i ona toe fo’i i le tusilima pe afai ua lape mai le galuega ona masini ua le lava sapalai.

 

TUSI TALA’AGA ALA O USUGA TAGATA SAMOA ANAMUA

 

O lo ua i le maketi mo fefa’ataua’iga le tusi mo le silafia e le fanau talavou, ma i latou uma o lo’o i ai le naunauta’iga, latou te fia iloa tonu, ituaiga usuga ma ala o usuga sa soifua mai ai tua’a ma ola feso’ota’i ai e fa’ailo le “alofa” fa’apa’aga i aso anamua.

 

O le tusi ua saunia e le sofa Fofo I.F. Sunia, o se tusitala lauiloa o Amerika Samoa. “O le aga lea a Samoa, ua mafai ona maua ai tala o aiga. Afai e usu lea matai i le taupou o se aiga, ua fa’ae’e fo’i le gafa ona o lena usuga,” o se tala lea a Fofo.

 

O aganuu uma lava e feso’ota’i ma usuga, po’o faamalamalamaga a matai i ni tausala, o a latou aumoega e tapena, ma i latou e futaga’ia nei ituaiga o agaifanua, ua fa’amatalaina i gagana e lua - fa’aperetania ma le gagna Samoa.

 

“Pe afai e te tautala aga’i i usuga, ua fa’apea fo’i ona e mafuli e tapena le tala’aga o gafa o le atunu’u,” o sana saunoaga lea.

 

O le tusi lenei ua fa’ailoa mai, ua amata mai i Usuga Fa’asamoa eseese, lea  e amata mai ia TuiFiti, TuiTonga, TuiManu’a ma Tamafaiga ma fa’asolo mai ai i le usuga, na usu mai ia Salamasina lona afafine o le Tupu Tama’ita’i na tafa’ifa i ai Samoa.

 

“E ao ia i tatou uma ona malamalama i le aga lea a Samoa, a’o le’i oo mai le au misionare ma latou fa’amalamalama Samoa, ua suia ai lana lea tu ma agaifanua a tatou tagata, i le faiga o masaniga  ua i ai nei.”

 

I le tamia nei, ua matele ina le toe faia, ua uia ala o feso’ota’iga i luga o telefoni, o isi o ala i luga o tusitusiga e fa’aaogaina ai le initeneti, ua le toe faigata fo’i ona e saillia sau pa’aga, ona ua fa’aaoga fo’i uepesite o upega tafa’ilagi.

 

O le mau ua tusia i lea tusi, ua faailoa ai, “O Usuga Fa’asamoa, o le fa’amatalaga lea o le aganu’u, ae matua sootaga lelei ma le tala’asau fa’apitoa ai ma le tala’aga o gafa o Aiga uma o Samoa.”

 

O lenei tusi, ua fa’atau i le Samoa Marketing i Fagatogo Square, o le SSAB i Tafuna, Apia ma Savaii, atoa ai ma le Faletusi o le EFKAS i Kanana Fou.

 

“O le aoga o lenei galuega, ia mafai ona fa’amatala ia malamalama le tupulaga i ala sa fesoota’i ai tagata Samoa a’o le’i taitai o’o mai Misionare Papalagi ma latou suia le tele o agaifanua a le atunu’u. Sa tatou alolofa lava, aua o le tatou aganu’u e fausia i le alofa ma le fa’aaloalo po’o le avafatafata,” o se tala lea a Fofo.

 

TATALA LIKI VOLIPOLO SISIGAFU’A 2017

 

Ua 3 ai nei Aso Toona’i talu ona amatalia le Liki Volleyball a le ASVBA ma o lo’o fa’atautaia i le Fale Ta’alo o le Samoana i Utulei.

 

I le tamia nei ua fa’asolo na’o aso To’ona’i ua faia ai ta’aloga, ae o lo’o aofia uma lava vaega e fa i le liki ua fa’agasolo nei: U19; Tama & Teine; Alii ma Tama’ita’i.

 

O lenei liki o le a oo atu lava i le vaitau o le Sisigafu’a ae fa’ato’a saili ai le siamupini 2017. Peita’i ua fa’ailoa mai le matagofie o le liki o lo ua fa’agasolo nei, ma afai e maua sou taimi avanoa, o’o ane i le faleta’alo o Samoana i aso Toona’i ta’itasi e maimoa i se taumafaiga a lau ‘au.

 

‘SAU IA BODY BUILDING - SAILI SIAMUPINI APERILA 14

 

Ua amata ona tapena le Sau Ia Body Building Association mo le latou Sailiga Siamupini 2017 i le vaitaimi o le Sisigafu’a o lenei tausaga. O le a muta le fa’aulu suafa mo lea tauvaga “Tino Lelei” i le aso Faraile nei, 30 Mati.

 

O lea taumafaiga o le a faia lea i le Lee Auditorium i Utulei, ma ua fa’ailoa mai o le ulufale e tai $20 i le tagata matua, ae o le fanau a’oga ma fa’asolo aga’i i le fanauiti e ta’i $5. Ua fa’atulaga fo’i nofoaga fa’apitoa mo le au faipisinisi ma malo fa’aaloalogia, lea ua tula’i mai e ta’i $350 i le laulau atoa.

 

I le polokalama o lea po, ua fa’alauiloa mai ai le tautalaga fa’apitoa a le tama sili ona malosi i tagata tino lelei uma i le lalolagi, “Le Rhino” ma o lona igoa o Stan Efferding.

 

O pa’aga a le Sua Ia Bodybuilding Association ua i ai nei e aofia ai: All Stars Signs; GHC Reids & Company; Pago Print Shop; The Kooler.Com; ma le TJ’s Gym.