Fa’amanatu 75 tausaga Ekalesia Metotisi i Nuuuli

O le aso Tofi na te’a nei sa fa’atautaia ai le sauniga e fa’ailoga ai le 75 tausaga talu ona fa’atula’ia le Ekalesia Metotisi i Nuuuli, ma sa auai le to’atele o vala’aulia fa’apitoa, e aofia ai le Fa’auluuluga o le malo o Amerika Samoa, kovana ma le faletua, faipule ma alii mautofi, ae maise vasega o suli o Fa’afeagaiga ma faletua o i latou na talia le vala’au ina ia galulue i lea Ekalesia i tausaga ua mavae.

I lea sauniga sa tula’i ai Rev. Dr Eteuati S.L. Tuioti e tolaulau le tala o le galuega mai lona amataga ia Mati 23, 1942.

O Fa’afeagaiga na galulue i le Ekalesia na amata mai ia Kolia Tuimaseve ma Eseta i la tausaga 1942-1948; e oo ma i le taimi nei ia Dr Eteuati L Tuioti ma Maselina - lea sa amata mai le galuega i le tausaga e 2012. O le lona 17 ai lenei o nofoaiga a Fa’afeagaiga ua autovaa mai mo le galuega i Nuuuli ae ua fa’ateleina fo’i manuia o le galuega e ala i le fanau ua avea nei ma Fa’afeagaiga, po’o faletua tausi Ekalesia i so’o se fatafaitaulaga i Samoa ma atunu’u e mamao fo’i.

I folasaga sa fofogaina e le vasega o Failauga sa galulue i Nuuuli, ae ua galulue i Niu Sila ma Australia, sa latou fa’amatala ai vaitau o le latou galulue ai i’inei.

Logo Ofe ua avea nei ma Sea i le Sinoti i NIu Sila i Saute, sa tula’i ma ia fa’afetaia fo’i le galuega sa punoua’i i ai le matagaluega i Nuuuli. “O lo outou galulue, e le’i faavaivai i nei tausaga e tele, lea fo’i ua molimauina fa’atasi e i matou sa iinei, ua tautua i nisi vaega o le ekalesia i fafo atu o Samoa, o loo mau lava le toovae o le fa’atuatua i o outou loto ma agaga, lea ua tino mai nei galuega lelei uma, e pei o le aso, fa’afetai e si’i i le Atua!”

Le susuga le Sea mai Ausetalia, Savaii Loto na tula’i fo’i mo sana saunoaga fa’amalo e tusa o le aso tele. “O le fa’afetai e le fa’aitiitia, aua e ou i le Atua le vi’iga, ona o aso fa’apenei. O ai na ilu pe talotalo, e tatou te toe feiloa’i i vaitau fa’apenei o le vi’iga ma le fa’afetai ona ua aulia lenei tele o tausaga, a’o tatou galulue pea ma tapua’i i lo tatou Atua i le mea sili ua mafai e le tagata viavai, alofa le Atua ma fa’atumau manuia i le galuega i Nuuuli nei.”

Ona valaauina loa lea o le Sea mai Hawaii Fa’agi Taufete’e mo sana upu aua o ia o se “taulaga ola” a le Ekalesia Metotisi i Nuuuli, o se tasi o alo o le Ekalesia ma e ui ina ua 79 tausaga, ae le o manana’o le Ekalesia e toe tu’u ese mai i la’ua e malolo.

“E tete’e pea o matou faamalama ma va’ai mai ma le momo’o o matou loto, e matou te toe fia fo’i mai e tautua i’inei i le Malumalu o le Vine Moni e pei ona ola a’e ai, peita’i, e faia pea lava le finagalo o le Ekalesia i Hawaii, ma ua fa’apea lava ona tautua ai pea i lo tatou Atua i le tofi ua ia fa’asino mai, ia faia pea,” o lana tautalaga lea i lana ekalesia pele na soifua a’e ai.

O sui o alo na soifua a’e i le galuega a’o galulue matua ma avea ma Faife’au i le Metotisi i Nuuuli, na tutula’i ai le tina o Marie Fepulea’i Ripley ma sa ia fa’ailoa mai, “O na vaitaimi, e le o tele ni fale i le malae, o le malumalu o le faletele Samoa sa fe’afaiga ma le faletele o le Aiga o Maluia i le malae oneone matagofie. E tau leai ni ta’avale e va’aia, ae vave tele ona nofoia sauniga uma, aua o le mea lea e fa’atasi uma i ai aiga o le afio’aga, e sii le fa’afetai ma le fa’amanu i le Atua. O se vaitau matagofie pe a toe tepa lava i ai.”

O le Upu na laugaina e le ta’ita’i o le sauniga, sa toe fa’amanatu ai le taimi o Isaraelu o le Vaitafe o Ioritana, ma fa’atonuina ai e le Atua ia tofu le ituaiga o Isaraelu e to’a 12 ma se ma’a tele e faaputu fa’atasi i le moa o le vaitafe, tofu fo’i ma se isi ma’a ta’itasi, e fa’aputu i le isi ituvai o lea vaitafe tele.

“Pe afai e fesiligia e a outou fanau pe o le a se uiga o nei ma’a? Ia outou fa’ailoa atu ia te’i latou, ina ia outou iloa ma manatua pea le ta’ita’iga e lo outou Atua o Isaraelu, lona nu’u e sopoia le Ioritana, sa savavali ai i le alitivai, ina ua mae’a fo’i ona sopoia le sami ulaula ma savavali i le alititai.”

O le ma’a fa’amanatu fo’i o lo ua fai ma va’aiga i le atoaga o le 75 tausaga o lea Ekalesia, ua tutula’i nei i lumafale o lea malumalu i Nuuuli, ina ne’i galo i fanau, le tautua toto ma le tautua matavela a o latou tua’a i le Ekalesia ona o le loto i le galuega a le Atua.

Ua faailoa fo’i i le lipoti a le Fa’afeagaiga, “E lei fa’ailogaina le 25 tausaga, e le’i fa’ailogaina fo’i le 50 tausaga, peita’i ua faia se fa’ai’uga a le Ekalesia, e sili ai ona fa’ailoga le 75 tausaga lenei ua aulia, ina ne’i le gafatia e le to’atele ona oo atu i le 100 tausaga, ae ua ma’ea vagavagaia e i matou lenei tausaga 75 ua aulia fa’atasi i le ola ma le soifua maua o le mamalu o tama ma tina matutua i lenei vaitau.”

Matua’i mafuli fo’i le Ekalesia i le ‘aiga fiafia ma e uma na auai, ae maise o fa’aaloaloga maualuga sa latou fa’aulaina ai lo latou aso fiafia ina ua mae’a le taumafataga.