VALERIE PU’A SIKOLASIPI VOLLEYBALL UNIVERSITY OF TEXAS

O se alo tama’ita’i sa faauu mai a’oga i Fagaitua High, Valerie Stephanie Pu’a, ma ua ta’uta’ua mai fo’i lona agava’a i le maoa’e o lana ta’alo i le Volleyball, ua toe fa’amanuiaina i avanoa sikolasipi ma ua ia filifilia le Iunivesite o Texas i Permian Basin e aoga ai i le tausaga a’oga fou.

Ona o lea ua ia talia lea Iunivesite, ua fa’atali nei o ia mo le sainiga o lana konekarate ia Aperila, 2017. Sa ulufale Pu’a i Wentworth ina ua mae’a lana aoga Fagaitua High. Ma na tulaga muamua mai le ‘au sa ta’alo ai Pu’a i Wentworth mo le NCAA XVl.

Ua mae’a mai le taamilosaga Volleyball i lenei tausaga ae o lo’o ia umia le .287 le pasene o ana tu’i lelei, ma e 10+ tu’i e le’i mafaia ona talia e se isi i ana ta’aloga e 20 i le taamilosaga atoa.

O ana taumafaiga e aofia ai tulaga 36 i ana tu’i lelei e le’i mafaia ona talia; tulaga 31 i ana poloka lelei fai to’atasi; ma tulaga 46 i ana poloka.

O le tala mai matua o Valerie, Tavita ma Stephanie Pu’a, ua la fa’ailoa mai ai lo laua agaga fa’afetai, “Aua o le manuia o le taumafaiga a Valerie, sa amata afuafua mai lava i Amerika Samoa. O se motu e la’ititi e le tele fo’i ni mea e atina’e ai le olaga o le fanau e feagai ai ma a’oa’oga ma ta’aloga e tauva ai i nei malo tetele, peita’i, o le mautu o lona olaga fa’aaloalo ma le iloa fa’aaoga tatau mea uma ua ia maua i inei, ae maise o le avanoa lelei e a’oga ma ta’alo e totogi ai lana a’oga, o mea na sa mua’i tamau mai lava i le olaga tau atina’e o Valerie mai Samoa.”

“Ua iloa lelei e ia, fa’amuamua le mata’u i le Atua i mea uma, ia e talitonu ia te oe ma mea ua mae’a tapena e le Atua mo oe e te ola ai, ae ia e fa’alogo i ou matua i so’o se mea, ma usita’i ma e fa’alogo i ona ta’ita’i e manuia ai lana taumafaiga. O Valerie Pu’a sa avea ma Kapeteni o le latou ‘au, numera 8 sa ta’alo ai.”

“Ia avea lenei tala e momoli atu ai le fa’afetai mo le tapua’iga mau a Matua Fa’aleagaga o Valerie Stephanie Pu’a,  Rev. Elder Dr. Leatulagi & Vagai Fa’alevao o Amouli, ae maise i ona uso ma tuagane uma i le latou Autalavou i Amouli, fa’afetai Tama, aua o oe lava sa e muaimalae i sailliga o taleni a le fanau, ua lelei ai le latou Volleyball i so’o se mea o i ai nei. Alofa e le uma, Tu Ieova i lo tatou va!”

Ua fa’apena fo’i, ona molita’i mai alofa’aga o Valerie i ona matua matutua i Amouli ma ona aiga uma, “Sili ona fa’afetaia a outou tatalo mo a’u a’o feagai ai ma ta’aloga ma a’oga i inei, tau ina ia ou maua se ‘ai mo i tatou uma ma lo tatou aiga e aoga ai i le lumana’i.”

FA’AULU TOTINO FOU NATIONAL HONOR SOCIETY - LEONE & TAFUNA

O le aso Tofi talu ai na fa’aulu ai sui fou o “Sosaiete Fanau A’oga ua ausia togi maualuluga i mataupu o lo’o latou tau’avea” i A’oga Maualuluga a Leone ma Tafuna. E le’i faia fa’atasia nei sauniga.

O le sauniga a Leone sa fa’ataunu’uina lava i le Fale ‘Ai o le Laumua i Leone, ma le manulauti “Alu ma le Mautinoa i ala o lou fa’amoemoe!” O le sauniga sa ta’ita’ia lea e le susuga Rev. Pelesi Tanuvasa mai le Ekalesia CCCAS i Vailoatai. O Rami Fatialofa, le peresetene o le NHS a Leone sa saunoa fa’afeiloa’i. O le sui filifilia e faia se upu fa’amalosi mo le vasega o tamaiti nei ua ululale i le Sosaiete a le Fanau ua Ausia Togi Maualuluga: o le susuga le Faipule Fagaoatua D. Salave’a mai le Itumalo o Fofo. E toa 25 i latou na fuluina i le NHS.

I le aoga maualuga i Tafuna e to’a 29 sa fa’aulu i le NHS i lenei tausaga ma sa faia  le sauniga i le Ekalesia Mamona i Malaeimi. O le latou manulauti na tau’ave i lea sauniga: “Exceed to Excel poo le Finau ia Manumalo!

O le latou sui filifilia e lauga fa’alaeiau mo le Sosaiete a le fanau a’oga ua ausia togi maualuluga o le tama’ita’i o Teresita S. Almendras, ae o le sui iloga o le NHS sa lauga e fa’afeiloa’ia le mamalu lautele sa pa’au atu i le latou fa’amoemoe o le susuga lea i le peresetene o Kiso Skelton.

ERNEST LOGOLEO - SAN FRANCISCO POLICE DEPT.

Ua fa’ailoa mai le fa’amanuiaina o le tautua a se tasi o alo o le Atunu’u, Ernest Logoleo, o se Leoleo i le San Francisco Police Department, i se fa’ailoga fa’apitoa ua mae’a tapena e le Sosaiete a Leoleo i San Francisco, ma ua ia fa’afetaia ai le tapua’iga a si ona aiga i Samoa, ae maise fo’i lona to’alua ma le fanau i Kalefonia.

O lea fa’apinega o le “Medal of Honor” ma sa mua’i fa’ailo ia te ia i se tusi aloaia mai le Peresetene o le  Fa’alapotopotoga o Leoleo i le a’ai o San Francisco, ma le latou Komiti Fa’afoe atoa. O le aso 30 Mati, 2017 e faia ai lea sauniga tele i le POA Atrium.

“Ou te mua’i fa’afetaia le Atua i lana puipuigamalu ia te ‘au ma nisi o uso leoleo i le galuega, aua e le faigofie nei a’ai e pei o i tatou i Samoa e nonofo filemu o tatou tagata ona o le fa’aaloalo ma le ava i isi uso a tagala tuaoi. Fa’afetai i le Sosaiete a Leoleo i San Francisco ma le latou Komiti Fa’afoe i lo latou mau fa’atuatuaina o a’u e agava’a ai mo lenei fa’ailoga taua, ‘Medal of Honor’,” o a Logoleo lea.

“Ina ua ou mauaina lenei tusi fa’ailo ia te a’u, ua ou agava’a i lea fa’ailoga, sa ou lagona lo’u fa’atauva’a ma ua le magagana, aua o ai ea lenei sui fa’atauva’a, ua e manatu mai ai?”