Ads by Google Ads by Google

Tala I Vaifanua


ata: archive

Le ata o Ernie Tao (itu taumatau) galue i se kamupani i Alaska. [ata: foai]

ERNIE TAO - FAIGALUEGA KAMUPANI I’A I ALASKA

 

Ua fa’alauiloa mai ia i latou e fia autova’a atu mo ni avanoa faigaluega i luga o va’a e mafai ona gaosia ai fo’i le i’a mo le tu’uapaina i Alaska, a’o folau mai le setete o Uosigitone,  po’o le alaala tumau fo’i i totonu o le lotoa faigaluega a le Kamupani i Anchorage, Alaska ma faigaluega ai mo se vaitaimi e amata mai le 4 masina se’ia oo i le masina e tusa ai ma se konekarate o le a e sainia.

 

E to’atasi se alo o le atunuu sa malaga mai mo se tafaoga pu’upu’u ma ua ia molimauina le aoga fo’i o lona alu atu e saili manuia i lea foi ituaiga o galuega i Alaska, Ernie D. Tao, ma au aoga tele ai i lona aiga.

 

“O le galuega ou te iloa e matua aoga lava i alo o le tatou atunuu aua e tino lelei ma malolosi i latou. A’o le totogi fo’i e matua lava lelei ai lau fa’asoa, ma e le tele fo’i se vaega tupe e te fa’aaogaina i Alaska i le taimi o galuega, aua o lo’o e nofo, ‘ai ma moe lelei i totonu o va’a po’o le lotoa a le Kamupani ua mae’a saunia lelei mo tagata faigaluega,” o a Tao lea.

 

“Afai ou te tuu atu i sa’u taumafaiga iinei, ao o’u faigaluega ma nofo i nai ou matua matutua, sa le lava se fa’asoa ae tele mea e fai. Peita’i, lea ua mafai ona sau ona o le vala’au a le Atua i le tina matua, fa’afetai sa ou malaga ese atu ua ou aoga ai i lona toe taimi,” o se molimau lea a Tao i lona malaga mai e fai se aoga i lona aiga.

 

E fa’ato’a atoa le lua tausaga talu ona malaga ese atu o ia e faigaluega, ae o le taimi nei, ua iloa fo’i e ia lea tomai i luga o va’a fagota ma gaosia ai le i’a mo le tu’uapaina, ae ua lava ai lana fa’asoa e aoga mai ai i lona aiga.

 

“O sa’u molimau ina ia fa’aaoga tatau le avanoa e nisi o talavou o le tatou atunuu, aua e le mailoa le taimi, ae a lava le faasoa, e mafai fo’i ona totogi uma au a’oga fa’ato’a alu ai e saili le atamai, ae ua le fa’amoemoe i nai matua i se pili o a’oga.”

 

“A uma lava lau konekarate, matala le avanoa e te sau ai i lou aiga, toe tapena se isi avanoa mo oe pe a’oga pe toe oso atu e faigaluega i se isi umi pe fa i le ono masina lona umi, ia soso’o fo’i lea o le olaga masani, ae ua mae’a fa’ataoto se alafua tau le seleni mo le aiga atoa,” o se tala ata lea a Tao, sa aoga i Tafuna High ma faai’u ai lana a’oga.

 

AOGA FA’AMASANI MASINI KOMIPIUTA

 

Ua tatala avanoa e lesitala ai tagata e amata mai le 18 tausaga se’ia o’o lava i matua matutua o lo’o fia silafia ona fa’aaogaina masini Komipiuta mo feso’ota’iga ma aiga ae maise o fanau i ala tafa’ilagi.

 

O lenei kosi o le a fa’atautaia e Loring Faiivae, ma e tapunia lea avanoa i le aso Faraile nei i le itula e 4:00pm pe a mae’a itula faigaluega. O le umi o le kosi e lua vaiaso, amatalia lea i le aso Lua a sau, ae fa’amae’a i le aso 27 Ianuari ma tufaina ai Tusi Pasi o i latou o le a agava’a mo nei faailoga.

 

O le taimi mo lea vaiaso i aso ta’itasi e amata i le 9:30 seia oo i le 11:00 i le taeao. Ina ua fesiligia le tama’ita’i o Lili o le tatou faletusi e tusa o le fa’atautaia ai o lea kosi, ae fa’ailoa mai, “Ua matauina e ao ina iloa lelei e matua ona faaaoga nei masini aoga i o latou aiga, ae maise ia le sasi fo’i ni ala e maimoa ma fa’aaoga e le fanau a’oga i luga o nei masini, ae le o nofouta i ai matua.”

 

O se avanoa lelei lea e fa’aaoga e matua pe a mae’a ona faao’o fanau laiti i falea’oga mo a’oa’oga masani, ae a’otauina i lea kosi e fa’amasani ai i le Komipiuta ma fa’aaoga ona laina o feso’ota’iga ma e fa’aaoga foi tusi pasi e umia pe a mae’a e agava’a ai mo galuega.