#At Work

O le va'aiga i tama'ita'i e to'afa o le to'aono lima o alo o Samoa lea sa malaga e faigaluega i le faletalimalo a le Kingston Plantation i South Carolina. O le aso tofi ua te’a o le aso muamua lea sa amata ai i lea faletalimalo. O Mataali Mareta Falevai (lona lua mai le taumatau) ua ia fiafia ua ia mauaina lea avanoa lelei. O i latou ma le latou supavaisa o lo ua ogatotonugalemu ia i latou e to'afa.

[ata: foa'i]

POLOKALAMA FANAU AMERIKA SAMOA GALULUE I AMERIKA

O alo o le atunu’u sa tuua le teritiori i le lua vaiaso ua te’a, ua amata faigaluega i le vaiaso ua te’a i se faletalimalo i South Carolina, ma “ua fa'afiafiaina i matou e faigaluega i lenei setete, o se fiafiaga aua o lo'o matou nonofo fa'atasi ma toe galulue fa'atasi i matou e to'alima lelei, i le faletalimalo lenei."

O se tala lea ale tama'ita'i o Mataali Mareta Falevai mai Vaitogi, lea sa ia tu'ua lana a'oga i le ASCC, ae malaga i Amerika, ina ia sailia se isi ala e tausia ai matua ma lona aiga.

"O le fa'afetai o le alofa o le Atua i ala na ia saunia e talia ai a'u talosaga, ua ia fa'ailoa mai se ala, e aoga mo a'u, ma le aga'i i luma o le taumafaiga e tausia si o'u tama, ua mana'omia lava ona avatu i Amerika mo sana talavai, ae faigata aua e le'i i ai se tasi o i matou le fanau e mua'i malaga i fafo e fa'amautu ai, ma aga'i atu i ai e fa'atino ai lea tausiga."

O se tasi lea o ana fa'amatalaga i le ala sa sili ona faigata ona tausaili, ae le'i atoa le lua vaiaso na fa'atamo'e ai ana tapenaga, ae malaga loa i fafo e faigaluega ma nofo ai lava i lea nofoaga ua saunia e le PE Solutions, le kamupani sa fa'akonekarateina i latou.

Ua fesiligia nisi o i latou o auaufa'atasi i le galuega mo so lagona, peita'i, o i latou ia e le fia manatu ina ia tu'uina o latou suafa i luga o le lomiga, ae ua fiafia e fa'alauiloa mai o latou ata. Ua le manatu fo'i ina ia fa'auia atu se latou fa'afetai i lea avanoa.

O le Faletalimalo lea ua galulue ai i latou e igoa o le "Kingston Plantation Hotel". Ua avea i latou ma tama'ita'i fa'afeiloa'ia tagata gasolo atu i le faletalimalo ma e fa'asolo fo'i ina avea i latou ma tama'ita'i e teuina potu mo tagata e nonofo i le faletalimalo.

"O le matagofie o lenei avanoa, ua ulufale mai i lea tiute, ae ua i ai isi avanoa e mafai ona e talosaga i ai pe afai e te agava'a ai. Peita'i o le galuega ua e faia i lenei ono masina, ua avea fo'i ma ala e iloa lelei ai lou fa'amaoni, mataala ma tinou i lau galuega. O le laumata fiafia fo'i o i matou uma lava e fiafia ai i latou i le matou tautua,” o se tala ata ma le fiafia lea a Falevai ina ua mae'a lo latou ulua'i aso i le galuega.

I ata na tuuina mai i le Samoa News e Falevai, e iloa ai e to'atasi lava le ali'i Samoa o lo'o latou malaga fa'atasi ma ua iloga mai e ese le galuega o lo'o ia fa'atinoa i totonu o lea lava faletalimalo, o nisi fo'i sa fa'atumu pepa i le kuka ma galuega i totonu o le umukuka.

O le latou totogi amata e $10 i le itula, ua totogia foi pasese e malaga ai i Amerika mo  le 6 masina o le konekarate.

O nofoaga ua nonofo ai i latou o le a totogia lea e le tagata lava ia ma e aveesea mai o latou totogi lea pili. Peita'i o le tala mai, "Matua lelei lava o nofoaga o matou nonofo fa'atasi uma ai. E malupuipuia i matou uma lava, aua le popole mai outou matua ma aiga, e sefe lelei i matou i le mea o nonofo ma faigaluega ai fo'i."

"O matou tiute e faigofie ma ua masani ai fo'i i tatou i'ina i le tausiga lelei ma le fa'amama o mea uma, ae ailoga lava e maua se matou $10 i se itula i le tatou malo i so'o se galuega matou te faia. O le mea sili ua tietie mai i le va'alele ae le tigaina i se pasese, ua faigaluega ma nofo i nofoaga saogalemu ma ua i ai fo'i matou uo ma teine Samoa iinei e fetaui lava matou tala ae le mafai ona tu'ua ai pe faaitiitia fo'i lo matou misia atu o outou uma, matou matua ma aiga i Samoa."

Na o'o loa i le vala lea o le tautalaga, aua ona feto'i mai le fa'amatalaina o lagona.

"Matou te fa'amanuia atu le aso o Tina i o matou tina uma lava. Fa'amolemole tatalo mai mo matou, o le aso Tina muamua lenei ua le tatou fa'atasi ai, ae o le vi'iga i le Atua, e aoga tele le o ese mai, e iloa ai le aoga tele o Tina i o matou olaga mai le amataga se'ia o'o i le taimi nei. E tatalo ia toe maua lava se mafutaga pe a mae'a le 6 masina lenei ua faigaluega atu ai,” o se tala lea a Falevai, e fai ai o ia ma sui o i latou uma e to'alima ua nonofo ma faigaluega i Kingston Plantation - South Carolina.

"Ua to'atele nisi ua matou masani, aua sa faia muamua matou vasega fa'amasani i mea e ao ina fa'atino e i matou i le galuega, o vaila'au fo'i e ao ina fa'aaogaina mo mea eseese i totonu o potu ma nofoaga eseese o le faletalimalo, sa matua fa'ai'ila ai le fa'alogo, ina ne'i tauvalea atu lava lo tatou atunu'u i mea o faigaluega ai i matou iinei. O le isi lea ala o le fa'afetai, o le iloa atu fo'i o nei tomai fou, e fa'aleleia atili ai le tagata mo le lumana'i o le tatou malo ma le tulaga o ana atina'e. O se faletalimalo tele ua matou faigaluega ai nei, ae le tasi fo'i se nofoaga o lo'o fa'atutu solo ai faletalimalo nei i le setete lava o South Carolina."

O se isi lea faamatalaga tusia mai a Falevai e fa'ailoa patino mai ai latou tapenaga na fa'aalu ai le vaiaso muamua o le latou olaga faigaluega ai i lea setete ua i ai nei.

O i latou uma ua avea ai se tasi mai o tamaita'i ua suafa ia Deluise ma latou supavaisa, ae o Andrea le latou Pule Sili, e tofusia ma ituaiga toniga e fa'ailoa ai fo'i le tulaga ua tautua ai le tagata i totonu o lea faletalimalo tele.

FA'AILOGA ASO O TINA MA LE AUFAIGALUEGA A LE FEMA

Na fa'ate'ia le aufaigaluega a le FEMA i le Ofisa autu o le DYWA i Pago Pago ina ua vala'aulia fa'apitoa e molimauina le fa'amanatuga o le aso Sa mo Tina galulue uma o lo'o i totonu o lea Ofisa i le aoauli o le aso Faraile na te'a nei.

"Oka o se lagona ua matou maua i lo matou faigaluega ai iinei, ua ese mamao mai mea uma na matou o atu e tautua mo le FEMA. Ua toto i totonu o matou loto le alofa ma le agaga fa'afetai ona ua matua foliga mai o lo'o i ai i matou i o matou aiga, fa'afetai lava mo le vala'au fa'apitoa, ma ua matou iloa ai, po'o a lava mea ua matou avatua e ala i le galuega, e le sili lea i lo le agaga moni fa'asamoa ua opogi i lana aganu'u ma agaifanua alofa ma le fa'amasani gofie." O se tala lea a le ali'i o Andy Roache.

O le to'atele o totoe nei i le galuega a le FEMA o tina, ma sa sili ona fa'afiafiaina i latou na i lea fa'ailo na latou faia i lea aoauli. O le Keke ma le vaimalu, sa latou maua, o se mea ua avatu ai ma afifi atu ai le alofa mo i latou a'o tu'ua ai aiga mo le galuega.

O le latou tala, "Afai matou te o, o le isi lava fa'alavelave e toe alia'i mai i Amerika Samoa ma ua pasia fo'i e fesoasoani mai ai le FEMA, e matou te ofo mai fo'i e o mai e galulue, leaga ua foliga mai, o matou aiga lea ua i ai nei,” o se tala lea a Roache.