LAVA SAUNIA POLOKETI TA'AVALE SOLAR - TAUVAGA A LE STEM:

I le tauvaga lona lua lenei a le STEM [Science, Technology, Engineering  & Maths] i lenei tausaga lea sa fa'atautaia i le aso To'ona'i talu ai, sa va'aia ai le tele o galuega sa fa'atino e le fanau a'oga e fa'aaogaina ai lo latou mafaufau i le kamuta, Inisinia, fa'asaeanisi ma le Numera, ua va'aia le si'itia fo'i o le atamai ua tauva ai lenei vaega o le fanau a'oga a le atunu'u i lenei tausaga.

Mai le vasega o fanau a'oga i a'oga tulaga muamua i totonu o le atunu'u atoa, sa latou fa'atauva ai i le ta'avale e mafai ona fagaina le malosi o lona afi e le panele o lo'o miti'ia ai le malosi o ave o le la, e tasi lava le panele sa fa'atulaga e fa'aola ai e le fanau a'oga se ta'avale.

I le tauaofiaga o le STEM i lenei tausaga sa fa'atautaia lea i le Gov. Lee Auditorium i Utulei ma sa matua faatumulia lea i matua, faia'oga ma fanau a'oga na tauva ae maise fo'i o i latou na tapua'ia o latou faiva.

O le ta'avale e sili ona saoasaoa ma mautu lelei le fausaga o le tino atoa o lea ta'avale, o le ta'avale lea e ao ina manumalo.

E tusa ai ma se fa'amatalaga a le tama'ita'i o Netini Sene lea e fa'auluulu i ai le OCI a le Matagaluega o Aoga, lea e nafa fo'i ma lenei tauvaga ma lona fa'atautaiga i lenei tausaga, sa ia fa'aalia ai, "O lenei tausaga ua lava tapena le fanau, o se mea lelei lea, aua o le afuaga o lea taumafaiga a le STEM, ia taumafai e fa'aosofia le fiafia o le fanau e tauavea mataupu e mafai ai ona latou malamalama, fa'atauva ma toe fa'aleleia pe inisinia masini o so'o se ituaiga ua leaga. O ta'avale moavao, iliafi, mea uma fa'apena e ao ina mautinoa i totonu o le atunu'u ua i ai o latou inisinia e latou te toe fa'alelaia nei masini aoga ina ia toe fa'aaoga e aiga e ona ia meatotino."

Sa manatua e Sene ona fa'afetaia fo'i faia'oga, "O le fa'afetai e fa'ao'o atu i faia'oga, ae maise lava o matua, aua sa fa'atautaia e le fanau latou galuega fa'atino e aunoa ma se tupe e fa'afesili mai e taumafai ai nei galuega uma ua maimoaina e i matou o sui o le matagaluega fa'apea le vasega o fa'amasino sa latou tofotofoina le tomai o le fanau e fa'amatala auiliili ai latou galuega na folasia."

E tele fo'i matua ma e tapua'ia faiva o le fanau, i lea aso sa i ai fo'i nofoaga fa'apitoa na tu'uina atu i matagaluega o le malo faapea ma faleoloa ina ia fa'aalia ai fo'i nisi o le tele o altou oloa. I le faleta'alo o le Samoana, sa fa'atulaga ai nisi o folasaga mo le fa'amalamalamaga atili o le mamalu lautele i fausaga o masini o fa'aaogaina, atoa ai ma ala o fa'atautaia latou tiute a'o faia galuega e iloa patino ai e le lautele, ituaiga tomai mo'omia mo galuega o fa'atoino e tagata faigaluega i vaega eseese o le Malo.

O le tauvaga a le vasega o a'oga tulaga muamua, sa matauina lava, e le'i tele ni a'oga sa fa'aaogaina mea faigaluega, peita'i i le lalolagi o lo'o soifua ma fa'atino ai tiute fa'atekonolosi, e ao ina mautinoa muamua, o i ai mea faigaluega e tua i ai le tagata faigaluega i le fa'atinoga ma le saogalemu o ona tiute fa'ainisinia, tagata gaosi ma lipea masini, fa'apea fo'i ma i latou e toe fa'aleleia laina o le eletise ma nisi lava matata fa'aeletoronisi e ao ina toe lipea ma toe fa'aaoga.

O tulafono muamua ma le lua o le tagata inisinia ua mae'a tamau, "Aua le fosia ona fa'amau o so'o se totoga o masini pe a le o fetaui lelei!" ma le lona lua, "O le Inisinia, e le aoga pe afai e leai se mea faigaluega!"

Ua tatau fo'i ona fautuaina faia'oga uma o lo'o a'oa'oina fanau i nei ituaiga o tomai fa'apitoa pe fa'amatata eseese ina ia fa'amalosia lea saogalemu o fanau uma e taumafai ona tu'ufa'atasia nisi o masini e pei o ta'avale e fa'aola i le solar panel e tasi sa faia nei.

TOE SIAKIA FANAU AOGA TULAGA MUAMUA MA'I FATU [RHD]

O lo ua mae'a amatalia le toe siakiga o fanau laiti i vasega uma i a'oga tulaga muamua i le atunu'u, ina ia mautinoa ua tulaga lelei mai i le gasegase o le ma'i fatu po'o le Rheumatic Heart Disease.

O lenei le isi ma'i ua numera muamua ai Amerika Samoa i le lalolagi, ona ua to'atele fanau ua a'afia i le ma'i fatu, ma ua asiasia mai ai fo'i i tatou e le to'atele o foma'i fa'apitoa o le fatu mai fafo.

I lenei tausaga ua o'o mai ai le vaega o Foma'i fa'apitoa o le Fatu ma le aumalaga a le Bingham Young University RHD Team, ma ua fa'asolo nei i a'oga tulaga muamua. O le aso Tofi na latou ua te’a o'o ane ai i le a'oga i Manulele Tausala Nuuuli ma le a'oga a le Manumalo Baptist Academy i le aso Faraile.

Sa talosagaina matua e o'o ane faatasi ma latou fanau. Sa tapena fo'i le Matagaluega o le Soifua Maloloina a le malo ma le vasega o Foma'i mai le Iunivesite o le BYU i se tusi sa sainia e matua, ina ia mafai ai ona vaai le foma’i.

E ese mai nei siakiga a le fanau laiti a'oga, sa faia fo'i isi siakiga mo tagata matutua ma fanau fo'i i le LDS Pavaiai Stake i le afiafi o le aso Tofi. O le aso Faraile i le afiafi e faia ai lea fo'i talavai o le fatu mo tagata matutua uma ma aiga i le Malumalu LDS Malaeimi.

So'o se tasi ua ia lagonaina e tatau ona siakia lona fatu ua mafai ona fa'atulaga mai sona taimi e va'aia o le foma’i, i le laina o le telefoni 633-4008 po'o le 633-7733, pe emeli atu fo'i i le  ieliapo@doh.as

O le a maua lava le avanoa i aso Lua ta'itasi e mafai ai ona siakia lou fatu e foma'i.