TOE ASO O LE LESITALA A LE  FEMA/SBA I AMERIKA SAMOA:

I le aso ananafi ma le toe aso lenei e tatala mai ai le fa'aulu atu o sau talosaga i le FEMA mo se fesoasoani e toe fa'aleleia ai lou fale pe toe fa'atau ai sau meatotino na fa'aleagaina i le afa o Gita, ua toe va'aia ai le toe tutumu o laina e gasolo atu e lesitala.

O nisi sa i ai pepa sa fa'atuai ai ona fa'amae'a latou talosaga, ae o nisi o fa'amaumauga o fale sa fa'aletonu, ma ua toe fa'aleleia. Peita'i, ua i ai fo'i ma le vaega a le Public Works i le fale o lo'o talosagaina ai suiga e mafai ona faia i pemita, ma fa'afou ai fo'i pemita o fale, ina ia mafai lava ona fa'afaigofie le galueaina o pepa talosaga uma.

I le fa'amatalaga a le sui sa feagai ma talosaga a le vasega o Nogatupe mai le FEMA mo pisinisi ma aiga e tele le tupe maua, SBA, sa fa'ailoa mai ai e Yolanda Stokes, "E 212 talosaga mo ni nogatupe ua fa'amauina ma ua tali atu fo'i i ai le SBA i a latou talosaga talu ai fo'i a'afiaga mai le Gita ia Fepuari 7-9, 2018. O le vaega tupe foi ua nono mai e le SBA mo i latou ia e mafai ona fa'aaoga e toe fa'aleleia atili ai lau pisinisi i lona fale e fa'atautaia mai ai, po'o le tulaga fo'i e si'itia teisi ai i luga lana auaunaga.

O le aotelega o le tupe ua fa'aalu e le SBA i totonu o Amerika Samoa e tali atu ai i talosaga e 212 na fa'auia mai ona o a'afiaga o le Gita, e aotelega lea i le $3.1miliona. O le a fa'aauau pea lava ona tali mai le SBA i talosaga uma ua mae'a ona lesitala, ae tatau ona fa'amautu uma atu pepa po'o a lava mea o mana'omia ina ia tali mai ai loa le SBA i lau talsoaga e toe fa'aleleia ai lau pisinisi po'o au meatotino e ala i lau nogatupe.

TUSIGA SOLO A LE KOLISI FA'AAUTU I SAUAGA FA'ALEITUAIGA I TOTONU O AIGA

O le aso Lulu na te'a sa fa'ataunu'u lava le tauvaga solo na tusia e le fanau a'oga i le Kolisi Tu'ufa'atasi o Amerika Samoa, ma sa faia lea i le Leture Hall #2 i le ASCC lava i le itula e 2:30 i le afiafi.

E le gata ia i latou e a'o'oga i le Kolisi Tu'ufa'atasi sa tauva i tusiga o latou solo, ae sa pa'au atu le vasega o fanau a'oga i a'oga maualuluga i le atunu'u e fa'aalia a latou fa'atinoga sa faia, ae maise o latou solo ma tala sa tusia e fa'atatau i lenei fo'i fa'afitauli e a'afia ai tina ma fanau i totonu o le li'o o latou aiga, po'o nisi lava o fa'apotopotoga e aofia ai i latou o sui totino.

O solo na manumalo ua taua'aoina le fa'ailoga i le tama'oita'i o Monalisa. O le tulaga lua ua mauaina lea e Roma ma le tulaga tolu ua maua e le tama'ita'i o Sitina Scanlan.

I le fa'atinoga fa'a-aitema a le vasega o fanau a'oga maualuluga na auai, sa matua fa'afiafiaina atili ai i latou na maimoa i ai, ua matua fa'aalia le sapaia o le autu o le tusiga solo, tusiga tala ma fa'atinoga.

"Ona o le matua iloga ona matagofie o le fa'atinoga a le fanau a'oga maualuluga o le autu o lenei fa'amoemoe atoa o tamafai nei, o le a toe sau ai le isi a'u malaga i le masina fou, ia toe fa'amalosia atili le manulauti o le tineia a'ia'i le tele o sauaga o a'afia ai fanauiti, fanau talavou ma tina i totonu o le li'o o latou aiga po'o fa'alapotopotoga o lo'o aofia ai." O se tala lea a le tama'ita'i o Doris Tulifua mai Kalefonia USA, peita'i o lana polokalama "Brown Girl Wake."

O le Brown Girl Wake o lo'o fa'atautaia fo'i i Samoa, peita'i o le tinoitupe o fa'atino ai lea fa'amoemoe sa talosagaina e ia i Kalefonia, USA lea fo'i ua fa'ao'o mai se isi ona galuega fa'atino i le tatou nei teritori.

O lea  tauvaga Tusiga Solo ma Tala na fa'atautaia lea lua e le Alliance to Strengthen Families ma le Brown Girl Wake.

TUUMALO LE TAMAITA'I FAIFE'AU - JULIA TALI PATI MCMOORE MALAKI:

O le aso Faraile talu ai Aperila 27, 2018 na falelauasi ai lana susuga le Tama'ita'i Faife'au, le tina o le Aiga, ae o se uo mamae fo'i i le to'atele ole au uso galulue i le galuega a le Atua i so'o se galuega fesoasoani a le "Light of Life Petecostal Church Inc. i Koolina Street Waianae, Hawaii ma i tatou fo'i i le Ekalesia Fa'apotopotoga a le Atua i Malaeimi.

I le tala fo'i a le ali'i Peresetene & Faife'au Taitai o le Light of Life Pentecostal Church Inc. i Waianae Hawaii, Satui Tuaniga, sa ia fa'ailoa ai, "O Julia Tali e matua galue ma le fiafia e atina'e so'o se ekalesia e va'aia e ia o lo'o mana'omia ona fausia ia mautu lelei. E ola fesoasoani i le galuega atina'e o le tino o Keriso, fa'apea fo'i ma le itu tau le agaga o le galuega.

O le tina o Julia Tali e to'a fa lava si ana fanau. O Tanya McMoore, Toese McMoore, Talishabeth McMoore ma Penisimani Fiuangaihetau, lea e to'alua ai si ana fanau a lana fanau o Tevita ma Meleamira.

E to'aono ona tuagane, e toaono fo'i ona uso ua lisia i lana polokalama, ae to'a sefulu ma le to'alua i latou uma na soifua mai o latou matua o Fesilafa'i Pati ma Talitiga Pati Taufagu o Aua, Amerika Samoa.

E lua ana fa'aipoipoga i lona olaga atoa. Na mua'i fa'aipoipo i le ali'i Fitafita a le Malo tele Sipunu McMoore ia Mati 22, 1975, ona tatalaina lea o le mafutaga mamae i le maliu ia Tesema 28. 2006.

Na toe fa'aipoipo lea o ia ia Tesema 25, 2013 ia Ionatana Malaki mai Papa Sataua Savaii, e o'o mai i le aso ua maliu ai.