Ads by Google Ads by Google

Tala I Vaifanua

SUIA TAIMI MALAGA A LE VA'ALELE HAWAIIAN AIRLINES

 

Ua suia taimi e to'ai taunu'u ai malaga a le Hawaiian Air ma toe tu'uva'a ese atu mai le malae va’alele fa’avaomalo i Tafuna.

 

Ua mafua lea suiga, ona ose tulaga fa’aletonu o masini fa’atonutonu ai malaga a va’alele (instrumental landing system) ma e mana'omia totoga o masini o lo'o fa'atonutonu mai ai lea tiute.

 

Ona e umi se taimi o tatali le totoga ma toe lipea lea tautua, e faato'a mautinoa ona fa'aleleia i le masina o Iulai 2018, lea ua faia ai loa lea fa'aiuga a le Kamupani Va'alele a le Hawaiian Air, ina ia mautinoa lava le saogalemu o le pasese fa'atasi ai ma tagata faigaluega a'o le va'alele fo'i latou.

 

O taimi ua alagatatau ona to'ai taunu'u ai faigamalaga ale Hawaiian Air e tatau ona o'o mai a'o ao pea i tatou, lea ua malaga ese ai a latou va'alele i le 1:30 i le vaveao i Honolulu, ae to'ai taunu'u mai i Amerika Samoa le 6:30 i le taeao o le aso Lua. Ona toe tu'uva'a ese atu lea i le itula e 8:30 i le taeao, ae to'ai taunu'u i Honolulu i le itula e 2:55 i le aoauli o lea lava aso.

 

Ona o lea e fa'ato'a toe mae'a galuega toe fa'aleleia o le masini 'ILS' a le Malae Va'alele i Tafuna ia Iulai 2018, o lona uiga, o faigamalaga uma lava o lo'o ua mae'a fa'atulaga mai lenei vaiaso se'ia pa'ia lea masina, o le a a'afia uma ona taimi fa'atulaga i lenei fa'aaliga.

 

Ua o'o fo'i i malaga ua fa'aopoopo mai mo le vaitau o le tu'uaga o a'oga, lea ua a'afia i le suiga tele lenei.

 

Ina ua fesiligia le sui so'oupu a le Hawaiian Air i le afuaga o nei mea uma, ae fa'aalia e Ann Botticelli, "O la fa'ato'a mautinoa e le matou Kamupani Va'alele o lenei fa'aletonu i le ILS o le malae vaalele i Tafuna na amata fa'aletonu mai le masina o Mati, 2018, ae le'i fa'ailoa muamua mai ia matou, lea ua afua ai ona faia vave suiga nei, ina ia galulue faatasi ai mo le saogalemu o tagata uma fa'apea ma va'alele."

 

Ua faia fo'i nei suiga, ma ua i ai fo'i nisi o aiaiga e mafai ona faia mo i latou ua mae'a fa'atulaga a latou taimi e malaga ai. Ua mafai ona suia le taimi o lau malaga pe afai e le o fetaui le taimi ua suia i ai le faigamalaga ma oe, ae leai se totogi. Ua mafai fo'i ona tala i tua lou pasese ua mae'a totogia pe afai ua e manatu e te le fia malaga i le Hawaiian Air ona o nei suiga o le taimi e to'ai taunu'u ai i Hawaii.

 

Pe afai o i ai nisi fa'afesili, e mafai lava ona e faafesili i le Kamupani a le Hawaiian Air i le numera telefoni 699-1875 ma fa'amalamalama atili ai oe.

 

TOE FA'AMANATU FATUGA - JR SCANLAN - KAUPOE SAMOA:

 

O le fa'afiafiaga a le Samoa Musika Foundation lea sa faia i le Oasis Bar i le afiafi o le aso Faraile na te'a nei, na toe fafagu mai ai i le to'atele fatuga ma pese sa tusia ma lagiina e le ali'i pese ta'uta'ua o Amerika Samoa "Aliimau Jr Scanlan."

 

O ia lea ua fa'ae'e i ai le fa'alagiga a le Samoa Musika Foundation, o le ali'i Kaupoe Samoa. O ana fa'atuga fa'apesega o lea vaitau i le soifuaga e i ai le agaga i le ola fa'atama o le fa'ato'aga ma nu'u i tua o le atunu'u, pe ua iloga ona fa'ailo "country music."

 

I le fa'afiafiaga lea na tofusia ali'i pepese ma pulou kaupoe ua foliga mai ai o tagata ua soifua a'e i Texas ma Nevada, lea e masani i aga fa'a-Kaupoe po'o tama e leoleo povi o le lafu.

 

O le taumafaiga ua toe fa'aa'e nei, ua fa'ailoa mai e sui o le Samoa Musika Foundation, ina ia fa'aputu e toe fausia ai nofoaga e fai ma nofoaga tutotonu mo Fa'aaliga O Tu ma Agaifanua tau Fa'afiafia, fatuga, pesega ma siva.

 

Matagofie lea po ma sao fo'i o i latou na tofia mo le fa'afiafiaga patino e toe fa'amanatu ai fatuga a le aloali'i Kaupoe o Amerika Samoa - Aliimau Jr Scanlan i lana lipine ua lauiloa ai lona siufofoga matagofie.

 

I se toe fa'afetai mai a le tama'ita'i o Sue Scanlan, le faletua o lea alo o le atunu'u, sa ia fa'ailoa mai ai, "Ou te iloa e matua fa'afiafiaina le ali'i Kaupoe Samoa "JR" ina ua outou toe fa'aolaola mai ana fatuga ma fa'aaogaina fo'i e toe fafagu mai ai le naunau o nisi i na ituaiga fatuga i le lumana'i. Pe ana fai e maua so'u avanoa, ou te i ai lava ma outou! "

 

SOLA SAMOA SIAMUPINI VOLLEYBALL ASVBF FA'AVAOMALO  - FU'A 2018:

 

O le Ta'amilosaga Volley Ball Fa'avaomalo a le American Samoa Volley Ball Federation sa fa'atautaia  i le sisigafu'a o lenei tausaga, ua fa'ailoa mai lona fa'ai'uga, ua sola 'au volley ball mai Samoa, ma le siamupini o 'au a Ali'i A.

 

O le 'au a Uimaiama mai Samatau Samoa ua manumalo i le Ipu ma le fa'ailoga o le siamupini 2018, ma ua agava'a fo'i le ali'i ta'alo lelei o Isaia Lei'ataua mai lea 'au i le MVP o lea ta'amilosaga atoa.

 

O le 'au na saili siamupini ma le Uimaiama o tama ia mai Fagali'i Samoa, ma ua tulaga lua i latou i le Liki o lenei tausaga. O le tulaga tolu ua maua lea e au a Lona ma Pavaiai. 

 

I le ta'amilosaga a tama'ita'i ua maua le siamupini e le 'au a MIZUNO, o le a au volley ball a tama'ita'i mai le tatou malo. Peita'i o i latou na saili siamupini ma le Segaula mai Samoa, lea ua tulaga lua ai i latou na i le liki a tama'ita'i.

 

O le tulaga tolu o le 'au a Crew Cutz ma Amouli peita'i o le tamaita'i ta'alo lelei ua maua lea e Meleisha Purcell Telefoni.

 

I ta'aloga a le itupa o tama'ita'i Kuini ua tula'i mai ai siamupini le au a le Originals i lenei tausaga, tulaga lua ai le 'au a Tuiga, ae tulaga tolu le 'au a Sassy Sisters ma le Original 2 i lenei tausaga.

 

O le kuini ta'alo lelei ua maua lea e Honey Thompson.

 

Malo le ta'a'alo fa'atausala, matagofie fo'i le tauvaga i lea fa'agatama i lenei tausaga.