Ads by Google Ads by Google

Tala I Vaifanua


Ua aofia potopoto taitai uma o malo na lua, le malo tele sa fa'atupea le galuega o le falea'oga ua tutula'i nei i le Laumua i Pago Pago, Taitai o le afio'aga le afioga le Ma'oputasi Mauga Asuega, Kovana Lolo Moliga ma lona Sui Kovana Lemanu P. Mauga ae maise o le Faipule o Amerika Samoa i le Konekeresi Aumua Amata Coleman, Le Fa'atonu sili o A'oga Dr Ruth Matagi ma le Tausi le afioga le Matuaofaiva o le Nana's Construction Company lea o lo'o nafa ma le vave ona fa'atula'ia o lea galuega tele. [ata: Leua Aiono Frost]

O le tama'ita'i o Pau Fa'afetai lea ua avea ma Tausima'i o le Kuata muamua 2018 a le Grace Home Care, fa'afetai galue ma le fa'amaoni. [ata: Leua Aiono Frost]

TATALA FALEAOGA FOU O COLEMAN ELEMENTARY - $900,005 TAU AOFA'I

 

O le taeao o le aso Lulu na te’a nei na poto atu ai le Faigamalo, sui fo'i o le Fono faitulafono, ma le vasega o le PTA, i le  Uifa'atali Peter Coleman Elementary i Pago Pago e tatala aloa'ia le falea'oga fou fogafalelua, e maua ai le isi 8 potu a'oga fou.

 

O le Kamupani a le Nana's Construction sa latou agaiga lenei galuega tele, ae o le tausaga atoa sa fa'akonekarateina ai le galuega lea, ua na'o le 5 masina sa latou faia ai ma ua tutula'i le falea'oga e tatalia lona tatalaina aloa'ia, ae afatia i le ‘afa o Gita ia Fepuari 9.

 

O se matati'a lea ua mafai ona fa'atuina e lea lava Kamupani faufale, ona e matua pupu'u lava taimi ua latou galuea'ina ai falea'oga mo le Matagaluega o A'oga a le Malo. O le galuega na tatala lona amatalia e fausia i le aso 22 Setema 2017, lea ua mae'a ia Feouari 2018, ma ua fa'atulaga lava e tatala i lenei vaitaimi o le sisigafu'a, ina ia mafai ona molimauina e le susuga le Sui Failautusi o le Initeria, Douglas Domenech i lana malaga asiasi mai lenei. O le isi fo'i lenei galuega sa ia sainia ua malie e fa'atupe i le vaega tupe CIP.

 

O Domenech sa ia ootia le lipine e tatala ai faitoto'a o lea galuega, ina ua mae'a le sauniga na si'itia e le susuga le Fa'afeagaiga EFKAS Rev. Faafetai Fa'avae Fa'ata'ita'i.

 

"Fa'afetai i le galuega ua tulai, aua e mautu le fausaga o le fale, ae le aoga pe a le lelei ona fa'aaoga lona anofale. Ua na'o se aseta fa'aletupe fo'i lona tutula'i mai, ae tatau ona sili atu le aoga o lona anofale i le a'oa'oina o fanau aua le lumana'i o le atunu'u. O galuega fo'i fa'apenei, e le sili le lauga o upu, nai lo le lauga o galuega fa'atino,” o se vaega lea o le saunoaga a Rev. Fa'ata'ita'i.

 

Saunoa foi le afioga Kovana Lolo Moliga ma sana upu tima'i i le laumua i lona pulega ma le aufaigaluega i lo latou tofi o le a'oa'o ma fa'aaoga lelei nei nofoaga ua mae'a fausia, ina ia lelei fatufatu ai ai olaga a'oa'oina o le fanau, ia tutula'i mai ai ni Toa mo a taeao i le faigamalo a Amerika Samoa.

 

"Fa'afetai le PTA i lo latou lava onosa'i ma fa'atali se'ia o'o mai ina ua mae'a lenei galuega. Fa'afetai lagolagosua i galuega a Faia'oga ma le Pulega o le Laumua i le taulaga o Amerika Samoa. O le tatou a'oga lenei o le puna o le atamai i totonu o le taulaga, o lo'o fa'aigoaina fo'i i le tatou Ulua'i Kovana Samoa na tofia, fa'apea fo'i ma le ulua'i kovana na filifilia e le atunu'u e ta'ita'ia le tatou faigamalo. O le pine fa'amau lea o le soifua auauna o lena fo'i ta'ita'i."

 

Na ia fa'afetaia fo'i le vaega i le Initeria a le Malo Tele, ona o le seleni na fa’atupe ai lea galuega. "Fa'afetai i lo outou naunau e fa'aleleia nofoaga e faaaoga mo le a'oa'oina o fanau a Amerika Samoa.”

 

Na i ai se vaega o le saunoaga a Lolo na manatu ina ia faailoa atu e Domenech i le Peresitene o Amerika, Donald Trump.

 

"O le mau a Trump e fa'apea, fa'amuamua Amerika, peita'i o Amerika Samoa lea fo'i ua fa'ata'ita'i atu i ai, Amerika Samoa fa'amuamua Amerika Samoa po'o ona tagatanu'u moni lava!"

 

I le avanoa o le tama'ita'i fa'atonusili o galuega lautele, sa tula'i ai Faleosina Faiai Voight ma ia fa'ailoa le tau o le galuega e $700,005 mo le fausaga lava latou, ae na mae'a ona toe faameafale lea o le maota atoa, ma fa'aalu ai le isi $200,000 ma ua maua ai le tau aofa'i, $900,005.

 

A’o le’i o’otia le lipine o le galuega na saunoa Domenech, "Tau ina ia aoga lenei falea'oga, fa'afaigofie ai galuega a e a'oa'oina le fanau i mataupu eseese i gagana e tatau ona iloa atili ai fa'amatala lagona ma fa'alautele lo latou atamai. Ia aoga ai mo Amerika Samoa ma ona tagata, o le aoga tonu lea o le alagatupe ua atofaina mai."

 

Na ulufale uma i latou na sasao e aotelega ai le pa'ia maualuga o le afio'aga, le pa'ia lasi o le Laumua, ae maise o a latou malo fa'aaloalogia na auai e molimauina lea galuega tele i le Laumua o Gov. Peter Tali Coleman i Pago Pago lava.

 

O fa'aaloaloga fo'i sa alofaiva i ai le maualuga o le PTA i lea laumua, e talimalo ao fo'i i a latou malo fa'aaloalogia, ae maise fo'i o le Matua o Faiva ma le Falefa o le Aiga Salemalama, aua sa auai lava fo'i le Tausiali'i Fiapia'ipa'i Tuaolo Fruean i lea fa'amoemoe ua taunuu, o le la'au o le soifua lea.

 

TAUSIMA'I KUATA MUAMUA, 2018 - GRACE HOME CARE:

 

I le fonotaga a le Grace Home Care ia Aperila 07, 2018, na faia ai ma le latou filifiliga o se sui e avea le fa'ailoga taua ua latou tapenaina, "Tausima'i o le Kuata Muamua" o lenei tausaga.

 

Na maua le fa'ai'uga a le Komiti Fa'afoe ma ua motu mamao ai le susuga "Pau Fa'afetai" e taua'aoina i ai lea fa'ailoga.

 

O le fa'amau fo'i mo lea agava'a ua pu'eina le ata o le ali'i ma lona tusi pasi fa'atasi ai ma i latou uma na auai o le komiti fa'afoe ae maise o isi fo'i o le aufaigaluega ma e i le latou ofisa autu i Tafuna.

 

"O lenei fa'ailoga, e tapena fo'i e i matou le pulega ma le taupulega a le Komiti Fa'afoe ina ia tausinio ai i latou o lo'o aofia i le vasega o Tausima'i a le Grace Home Care. Ia le gata ai i tiute ua mae'a ona fa'atulaga ma aiaia i le Konekarate o lona avea ai ma Tausima'i i tua i Aiga o e gasegase tumau, ae ia faia ma le alofa le galuega, ina ia maua le tulaga mau fa'atuatuaina e le gasegase ma lona aiga lau tautua." O se tala lea mai le tina Ta'ita'i o lea auaunaga, Sala Filoiali'i Mataali'i.

 

O lo'o ua fa'aauau lava ona tausia e le Tausima'i lana gasegase ua fa'akonekarate na te tausia,  afai fo'i o lape le auaunaga, e fa'ao'o lava i le Ofisa autu o le Grace Home Care le fa'asea, ina ia fautuaina le tausima'i o nafa ma le tausiga o lea gasegase. E totogia fo'i le Tausima'i e le tagata o gasegase.

 

O tausaga ta'itasi fo'i e faia ai fa'au'uga a lea vaega, ina ia mautinoa o lo'o fa'aauau ona a'oa'o i latou uma o aofia ai i lea polokalama i tomai ma agava'a mana'omia, ia tausia lelei tagata gasegase i totonu o latou lotoifale, ae o le falema'i. Malo fo'i ia Pau Fa'afetai mo lona sogasoga e faia le tautua e ala i le tausiga o e gasegase tumau i tua i aiga.