Tala I Vaifanua


O se va'aiga i le taimi na foa'i atu ai e le Pulega a le Hawthorne American Samoa le latou foa'i tele o Meafaigaluega eseese e fa'aaogaina e Inisinia i so'o se ituaiga o ta'avale ma masini o so'o se ituaiga."A leai sau mea faigaluega, e le mafai ona e faia tiute fa'ainisinia!" O le tala moni lea i le tiute fa'ainisinia. [ata: Leua Aiono Frost]

$15,000 FOAI HAWTHORNE AMERIKA SAMOA I LE VOCTECH HIGH

 

O le aso Faraile na fa'ataunu'uina ai le foa'i a le Kamupani o Totoga Ta'avale ma Masini Eseese Hawthorne Amerika Samoa i le A'oga Maualuga o Matata Eseese a le Nuuuli VocTech.

 

Na auai atu fo'i le susuga le ali'i Pule Sili  Keith Stahlman o le Hawthorne fa'apea ma le tama'ita'i o Lisa Mamea ina ia fa'ataunu'u lea foa'i, ma ua le tasi ai se tausaga o faia lenei foai, ae ua faia i le tele o tausaga ua tuanai.

 

“Ona o le manatu o lenei Kamupani e ao fo'i ina fesoasoani e una'ia le a'oa'oga o fanau a le atunu'u i matata eseese e aoga o le atina'ega o le atunu'u lautele, atoa ai ma le tautua lava e faia mo le mamalu lautele o le atunu'u, e iloga ai le loto fo'i o le Hawthorne Amerika Samoa ina ia si'itia le atamai o le fanau talavou, le lumana'i o Amerika Samoa, e faia ai pea lenei foa'i,” o se saunoaga lea a Lisa Mamea e tusa ai o le foa'i faifaipea a le Hawathorne.

 

Ina ua maimoaina nei mea faigaluega ua foa'ia, o nisi nei o mea faigaluega e matua naunau le a'u faita'avale afi ma va'a, ma so'o se ituaiga masini lava e maua e mafai ona fa'atino ai le galuega toe lipea pe fa'aleleia latou ta'avavale ma isi masini eseese.

 

Ona e fiaa lava i tausaga ta'itasi nei foa'i, ua fesiligia fo'i ali'i faia'oga i le Lotoa a le VocTech High, pe ua tali lava ma totoe la latou mea faigaluega mo le a'oa'oina o le fanau i tomai tau inisinia i le latou falea'oga.

 

"O lo ua fa'amautu lava lenei foa'i ma isi foa'i uma e i matou faia'oga, ma ua talosaga fo'i i le fanau, ina ia fa'atumauina le tele o meafaigaluega i totonu o pusa ua mae'a saunia e loka lelei ai. Peita'i, e le atoatoa lava se tautua, e o'o atu lava i le isi tausaga ua fa'aititia mea faigaluega nai lo mea sa teuina, ma o se fa'afetai sili lea ua avatu fo'i i le Hawthorne, aua e na'o i latou nei e fa'auia mai ai meafaigaluega i le tele o tausaga. Fa'afetai le manatu mai i le galuega taumafai e a'otauina le fanau talavou, ia lelei ona tapena mo galuega inisinia i le lumana'i,” o  le tali mai lea a le faia'oga faitino ta'avale i le VocTech High.

 

FA'AAUAU TAUALOAINA POLOKALAMA SPECIAL OLYMPICS

 

Ua mae'a fa'alauiloa mai e le Komiti Fa'afoe o le Special Olympics, e ala mai i se tusi na saunia e le Taitaifono Dr Timothy Shriver, ua taualoa fo'i le Special Olympics Amerika Samoa mo le isi tausaga atoa e afua mai Aperila 2018 se'ia pa'ia Tesema 31, 2019.

 

Ua mae'a faao'o mai fo'i le Tusi Pasi fa'apitoa e faamauina ai lea agava'a i se latou tusi na tusia ia Mati 22, 2018.

 

I le tusi ua taua'aoina ua fa'amaonia mai ai fo'i le agava'a o le Special Olympics Amerika Samoa e mafai ai aia tatau ma ona tiute e fa'atino  ai polokalama eseese ua mae'a pasia e fa'atautaia e le Special Olympics i so'o se atunu'u ua agavaa ai.

 

I lea fo'i tusi fa'amaonia, ua una'ia malosi ai totino uma ina fesoasoani e fa'ataunu'u galuega uma e tatau ona faia ma tu'uina le avanoa e a'oa'oina ai i latou uma o sui patino i le Specila Olympics, e gafatia ai ona tauva i agava'a ua mae'a a'otauina ai. O nei a'oa'oga e tatau ona maua e le to'atele o i latou ua aofia i lea sosaiete.

 

Na fa'amanuia ma fa'amalo mai fo'i le ta'ita'ifono o le Komiti Fa'afoe i le tatou Asosi iinei ma ia fa'ailoa mai, "Ua matua iloga la outou galuega tima'i ma le a'oa'o leleia o tatou sui tauva mai le teritori i ta'aloga ua fiafia i ai i latou. Ua tele fo'i le suiga e vaaia ia i latou uma ua outou galulue malosi e a'oa'o ma fa'atauva i fa'agatama eseese ua fiafia i ai i latou, o se fa'amalo e avatu ia te outou uma o matua, sui iloga o le asosi a le Special Olympics, faia'oga o ta'aloga eseese ua a'oa'oina le fanau, ae maise i latou e tapua'ia faiva o le fanau. Matua iloga la outou fa'amalosi'au."

 

"Ona o la outou tautua ma le unaiga o fanau ia, ua le vale se taui ua maua ma ua alia'i mai i taumafaiga fa'atauva a le fanau i so'o se ta'aloga o ta'a'alo ai. Ua latou fiafia ma iloa atu le matagofie o le lalolagi e i latou ona o a outou galuega tima'i! Fa'afetai tautua!" O se tala lea a Shriver i lana tusi.

 

"E tautala ma fa'amasino galuega i o tatou faiva e tima'i ma sapaia fanau ia!" O sana toe upu fa'amalosi mai lea.

 

O lana fa'amanuiaga, aua ua iloga fo'i fua o galuega a le Special Olympics American Samoa i ana pine 'auro e maua so'o i tauvaga o ta'aloga a le fanau e i ai mana'oga tumau o le tino po'o le mafaufau.

 

ULUA'I AFIAFI O FA'AFIAFIAGA SIVA MA PESEGA O LE FU'A 2018

 

O le ulua'i polokalama a le Arts Council & Humanities ua faatautaia nei i lalo o le ta'ita'iga fou a le latou Fa'atonu Dr. Lauaga'ia Mary Tafete'e, na tatala i le afiafi o le aso Tofi i le itula e 6:00, sa fa'atumulia le Malae o le Suigaula a le Atuvasa i Utulei i le mamalu o le au fa'afiafia ae maise fo'i o le tapua'iga mau a le faigamalo i lona taiulu, Kovana Lolo Moliga ma Lutena Kovana Lemanu P Mauga, ae tainane le kapeneta mamalu ma latou vala'au fa'apitoa.

 

Na tatala lava fa'afiafiaga i le sao o le EFKAS Mafutaga Tina mai Vatia, lea na fa'afiafia ai le vasega o tina e afua i le 50 tausaga se'ia o'o i le 60 tausaga le matutua. Na soso'o lea ma le Autalavou Katoliko mai Nuuuli, ma sa matagofie fo'i le latou mauluulu ma le sasa na fa'atino.

 

Soso'o mai ma le sao o le Autalavou a le Ekalesia Matotisi mai Failolo, ma na mata'ina fo'i le toniga lanumumu ma le uliuli pa'epa'e na lae'ia e lea autalavou. O a latou fa'atinoga fo'i fa'amauluulu oso mai ai ma le sasa, na onomea ai tama ma teine mai le Alataua i lea afiafi a tamali'i.

 

O le sao mai le autalavou a le EFKAS i Taputimu sa soso'o mai ai, ma le latou autu "O le mamalu o le Siva Samoa." O le autalavou mai le LDS Pavaiai 2nd Ward na soso'o ai ma sa ese fo'i le toe fo'i i tua o le se'ese'e malie ma le fa'atausala o siva Samoa sa maimoaina a lea autalavou.

 

O le fa'afiafiaga a le Autalavou mai Utulei EFKAS na soso'o ai, ma tama ma teine o le Malae, ae na toe faamanatu mai e latou fa'afiafiaga, "Na tofia e le Atua Samoa e Pulea e Matai."

 

O le ausiva na soso'o ai na matua iloga ona to'atele, aua na felelei mamai mai Manulele Tausala mai Nuuuli ma le fa'amoemoe e fa'afiafia ma sa latou faia fo'i se fa'aaliga matagofie mo Amarika Samoa i leei sisigafu'a. O le latou toniga na lanumoana fa'asoloatoa ai le malae i Utulei i lena afiafi. O i latou o le Vasega Fa'asamoa a le Manulele Tausala, e to'a 70 i latou na fa'afiafia.

Comment Here