Tala I Vaifanua

ANGELINA ROBERTS, SUI O AMERIKA SAMOA MS “CHERRY BLOSSOM".

 

Ua filifilia e le American Samoa Society i Amerika le tamaitai o Angelina Malia Vaosa Roberts e avea ma sui o Amerika Samoa e tauva i le Cherry Blossom Festival i Washington DC i lenei tausaga.

 

O Angelina o le afafine la’ititi o Afa ma Dr Fa'aletino Roberts mai Mapusaga Fou ma Avaio i Amerika Samoa. E iloga fo'i tautua a lona tua'a ma lona aiga i le Militeri, o ia e matua latalata le la'ua mafutaga fo'i ma le tuagane o si ona tina, o se tasi o ua loa lana tautua i le Vasega Fa'amalosi Tulafono, ma o se tasi fo'i sa avea ma Fa'atonu o le Matagaluega o le Puipuiga Fa'alotoifale o Amerika Samoa, le susuga Tuala Mike Sala o Avaio.

 

Na fa'au'u Angelina i Fagaitua i le tausaga 2011, ma ulufale ai loa i le Wentworth Military Academy ma le Junior College i Lexington, Missouri ma sa maua ai lona Associate's Degree i le 2013.

 

I tausaga taitasi e filifilia ai e le National Conference of State Societies [NCSS] se tamaitai mai setete ma teritori o Amerika i le tauvaga a Cherry Blossom Festival.

 

O i latou e filifilia e tele so latou sao e fa'ataunu'uina i le vaiaso atoa o fa'atasiga e tatau ai ona mataalia ma silafia lelei ona tiute fa'aleaganu'u a lona malo e talimalo ai i nisi o fa'atasiga tetele a le Konekeresi, o le siva tele e aotelega i ai le mamalu o sui tofia mai isi setete ma teritori uma o Amerika, ma e latou te asiasi fo'i i isi Ofisa o Emepasa o atunu'u eseese.

 

O le fa'ai'uga o lenei vaiaso atoa o le a taualoa uma i latou nei ua avea ma sui tofia o latou setete ma teritori i le fa'atasiga e faia ia Aperila 11 i le Botanic Garden, National Mall i Washington DC.

 

Saunoa le tofa Aumua Amata, sui o Amerika Samoa i le Konekeresi, e faapea "Ou te le o te'i i le filifiliga o Angelina e avea ma sui o le tatou teritori i lea fa'atasiga tele. O ia o se tama'ita'i e galue malosi, mataalia ma mataala i ona tiute fai, ma e talenia tele i le aganu'u fa'asamoa fa'atasi ai ma lona silafia o tu ma aga i la fo'i atunu'u ua a'oa'oina ma soifua ai. E sili atu ona ou fiafia ona o Angelina o se tasi o lo'o galue i le matou Ofisa Autu i Uosigitone DC.”

 

A'o le'i galue Angelina o Amata ia Oketopa 2017, na muamua tautua o ia i le Missouri National Guard mai le tausaga 2014 se'ia o'o i le 2017. E lotu o ia i le Ekalesia Fa'apotopotoga Kerisiano i le US Fort Meyer Army Base i Virginia.

 

Ona o lo'o va'ai toto'a lava le Sosaiete a Samoa i Washington DC, Virginia ma Maryland i se tama'ita'i talavou e mautu lona olaga fa'asamoa i tu ma aga masani e iloga ai i so'o se mea o le lalolagi, o lea ua filifili ai Angelina e le peresitene o le American Samoa Society. Isapela Coggins.

 

LEONE JROTC - FOA'i MEA'AI TAGATA PAGATIA ‘AFA O GITA

 

O le aso Faraile talu ai, na fa'ataunu'u ai le poloketi a le JROTC a Leone High School sa fa'atulaga mo se latou tautua mo le mamalu lautele o le atunu'u. E faia i tausaga ta'itasi lea fa'amoemoe e fa'amasani ai le fanau o tau'avea mataupu ma koleniga fa'amiliteri po'o le polokalama a le JROTC, ia masani i le loto tausi nu'u, aiga ma le atunu'u, aua o lou tofi o le tautua lea mo i latou nei, ma tausia lo latou saogalemu ma le nofo filemu.

 

O lenei tausaga, o le latou sini na fa'atula'i, e fesoasoani aiga na afaina i le ‘afa o Gita.

 

Na amata aoina mai a latou oloa o mea'ai tu'uapa ma fagu vai mama mo le taumafa ma ua manatu ina ia matua fa'atele ina ia lava ai aiga e to'atele i le itumalo o Alataua, Fofo, Taualatai fa'atasi ma se vaega tele o le Taualauta.

 

"Na amata mai le matou galuega foa'i i aiga ua mautu o latou fale'ie, o le fa'amau lea e iloga ai aiga ua afaina o latou lotoifale i le afa, ma ua avea fo'i ma ala e taua'ao sa'o ai ia i latou nei le foa'i na tapena i ai matou vasega o faia'oga ma i latou le fanau a'oga o lo'o ta'avea le JROTC i le a'oga maualuga a Leone,” o se tala lea a le tama'ita'i o Fa'aloia Veronica Aifesili, o se tasi o le JROTC Leone.

 

"O le va'aiga e moni lava o lo'o i ai le mana'omia i lotoifale o nai aiga, e vevela fo'i le faleie, ae ua fa'aaogaina lava aua ua faaleagaina taualuga o maota ma laoa sa matou asia. E le'i sese fo'i se va'aiga a nai aiga ia i matou, aua o lea sa la'ei lava e i matou o matou ofu a'oga. O nisi fo'i o aiga nei, sa mua'i fa'ailoa mai lava e fanau a'oga suafa o aiga ua matua fa'aleagaina lava fale nofo e le Asiosio o Gita, ae o le to'atele, sa va'aia lava le fale'ie ma afe loa i ai,” o se fa'amatalaga lea a Fa'aloia.

 

Na fa'ailoa mai e nei sui, sa matua fa'afetaia le latou galuega alofa e nai aiga, ma e mautinoa fo'i ua latou fa'aaogaina tatau mea'ai na foa'i atu.

 

"O se a'oa'oga sili ua ou maua e a'u i lo'u olaga a'oa'oina ai i le Militeri, ‘Ia muamua ona e va'ai i le mana'omia’. Ia va'ai i ai fai loa, fa'ao'o sau fesoasoani aua o lo'o mana'omia lou tau'au ma lou agaga alofa e se tasi ua afaina po'o lutia lona aiga i se pagatia. O le a'oa'oga fo'i lea e ao ina mua'i pasia e i matou le vasega o fitafita tau atina'e pe fa'aolioli, ua mausali, o le agaga tonu o lau galuega fa'afitafita o e alofaiva atu i ai, ia e puipui ma le alofa ou tagata, po'o fea lava o e alaala ai i lenei lalolagi, ae mausali ia te oe lau auaunaga ia faia."

 

FOA'I ROTARY CLUB $2,500 I LE CANCER COALITION

 

I le sailiga seleni a le American Samoa Community Cancer Coalition sa faia i le afiafi o le aso Faraile i le Maliu Mai Beach Resort, ua fa'ailoa mai ai le agaga fa'afetai o i latou na taumafaia lea fa'amoemoe, ona sa maua atu ai ma le avanoa o sui totino o le Pago Pago Rotary Club e foa'i atu ai le latou $2,500 ma o le a fa'aauau pea ona avatua lea foa'i i tausaga ta'itasi.

 

Ua fa'ailoa fiafia mai e le tama'ita'i o Marilyn Ho Ching, "O le matou sailiga fesoasoani lenei, na fa'atautaia ina ia mafai ona tu'ufa'aatasia ai se isi sailiga tupe tele e ala i se Ta'amilosaga Tapolo, fa'afetai o lea ua tino mai le taumafaiga ua manuia.”

 

O le Ta'amilosaga Tapolo lea o le a latou fa'ataunu'uina lea ia Oketopa 27, 2018 ma ua fa'ailoa mai fo'i e Ho Ching, "Atonu e i ai se isi matou afiafi fa'apenei e toe tapui atili ai lea fa'amoemoe a'o le'i o'o mai lea ta'amilosaga ua amata fotua'i atu i ai matou galuega fa'atino nei."

 

O le agaga o le fa'afetai sa lagona fo'i mai le latou laulau a tofi a le ASCCC i le mamalu uma sa pa'au atu e aofia ai fo'i tagata taito'atasi, o aiga ae maise o Kamupani tua.

Comment Here