Ads by Google Ads by Google

Tala I Vaifanua


O le va'aiga lea i le vasega o fanau a'oga mai le South Pacific Academy na lautogia i le tauvaga tusiga tala i le gagana peretania. Ua aofia ai i lenei vaega le tamaita'i o Diamond M, Hollister mo le tulaga lua i le Level 3, ma ua matua fiafia lava o ia i lona fa'ailoga, lea e talaluma mai i lenei ata. [ata: foa'i]

FANAU A'OGA LAUTOGIA TAUVAGA TUSITALA IGILISI

 

O le aso Lua na tolaulauina ai i'uga o Tusiga Tala Fa'aperetania a fanau a'oga e mai le Level 3 e o’o i le Level 12 i a'oga uma na fili mai sui e tauva i lenei tausaga. E aotelega ai a'oga tuma'oti ma a'oga fo'i a le Malo.

 

Mai le Level 3, o le fa'aiuga ua togisilia Yuchen Bai mai le Pacific Horizons Elementary. Tulaga lua Diamond M. Hollister mai le South Pacifc Academy, ae tulaga tolu Tala'itupu Reid mai le Samoa Baptist Academy.

 

Mai le vasega 4 na sili ai le tala tusia a le tama'ita'i o Thessalonica Lagafuaina mai le Samoa Baptist Academy, tulaga lua Lisa Pedro mai le Pacific Horizons ae tulaga tolu Michelle Lavea mai Lauli'i Elementary School.

 

O le vasega 5 ua togisilia ai Aisali Vasai mai le South Pacific Acaemy, tulaga lua Amelie Chen o le Pacific Horizons Elementary ae tulaga tolu tusia e Aleah Hong mai le Samoa Baptist Academy.

 

Mai le vasega 6, ua togisilia ai Fenomarama Apera'amo mai Tafuna Elementary School, tulaga lua ai Carlos Sanchez ae tulaga tolu Charize De Asis mai Marist St. Francis.

 

O le tauvaga a le vasega fitu, ua maua ai e Arianna Ta'atasi mai le Lupelele Elementary School le togisilia, tualga lua Baelin KIng le South Pacific Academy, ae tulaga tolu Jackie Tanielu mai le Coleman Elementary School.

 

O le tusiga tala a le vasega 8, ua togisilia ai Vaotupu Moea'i mai Leone Midkiff Elementary, tulua i ai Matavai M Auapa'au mai Pavaiai Elementary ae tulaga tolu Aleyna F. Grey mai le Matafao Elementary School.

 

O le tauvaga a a'oga maualuluga e amata mai le vasega 9 i le tusiga tala i le fa'aperetania ua sola ai nei Avril Regis mai le Fa'asao Marist High i le togisilia, tulaga lua  Tasi Rosalina Pereira mai le Samoana High School ae tulaga tolu Leilani Galea'i mai le Pacific Horizons High School.

 

O le vasega 10 ua manumalo ai Evelini Suani mai le Manumalo Baptist Academy High, tulaga lua Angelika  Nair mai le Tafuna High School ae tulaga tolu Yasminna Sanchez o le Samoana High School.

 

Mai le vasega 11, ua manumalo ai Fa'ava Saolotoga mai Leone High School, tulaga lua Carl Daniel Balauro ma le tutolu mo Alia Tuiolosega mai le Pacific Horizons High.

 

I le vasega 12, ua maua ai nei e Karlinna Sanchez mai Samoana High School le tulaga muamua, tulaga lua Karallyn Fitisone mai le South Pacific Academy ma le tulaga tolu Isek Kuki o Tafuna High School.

 

I le aso ananafi, ua amatalia ai le Tusigatala Fa'asamoa - ma o le a fa'ato'a maua le i'uga i le masina o Me, 2018.

 

FA'ASEA NISI O FAIFA'ATO'AGA E LE TOE TALI MAI LE USDA

 

I le fonotaga a le Matagaluega o Fa'ato'aga a le tatou Malo ma le vasega o Faifa'ato'aga na faia i le aso Gafua na te'a nei  le potufono o le Matagaluega o Fa'ato'aga i Tafuna, sa i ai nisi o le au faifa'ato'aga ua fa'ailoa so latou le malie ona o le tali ua tu'uina mai.

 

"O lea ua tatali atu ma se fiafia aua ua uma fo'i ona faia lipoti ma fa'amaumauga o mea uma na fa'aleagaina i le ‘afa o Gita o fa'ato'aga lava e fa'aagaaga mo le fofoga taumafa o aiga, ae ua fa'ailoa mai, ‘O lo'o nofonofo le Failautusi o le USDA ma tilotilo i la tatou lipoti fa'amaumau ua i ona luma, ae ua le faia maia sana fa'ai'uga i ai pe talia pe leai’. O se mea fa'agauloto lea tulaga, ae o le a fo'i le tala o lea ua mae'a pasia mai i tatou e le Peresetene o le Malo Tele?,” o nisi ia o fa’asea a faifa’atoaga.

 

“Ua foliga mai ua sau fo'i le fa'agau le malie, ae moni lava ua o'o mai le oge i lotoifale o aiga. Ua le tagolima aua ua leai atoa ni meatoto sa fa'aagaaga mo le matai'ai a aiga,” o le tagi lea a se tasi o tama sa fa'aleo mai i le ofisa nei, pe talitutusa ma nisi fo'i o le mamalu lautele o le atunu'u.

 

Mo faifa'ato'aga lava latou o lo'o fagaina le polokalama mo mea'ai a le fanau a'oga, fa'atasi ai ma i latou o lisia i le lisi o faifa'ato'aga a le tatou malo aua le sapalaiga o maketi tele i Fagatogo po' maketi laiti foi i autafa o le alatele, ua fa'atonuina ia aga'i atu loa i le SBA mo ni a latou nogatupe e toe faaleleia ai latou fa'ato'aga. A'o isi ia pese mai le fatuga o le fa'atalitali, ona o lea e taoto le fa'ai'uga a le failautusi a le USDA i talosaga uma na, ailoga lava e tali mai.

 

TAOFI TAGOFIA FANAU TALAVOU AVA MALOSI & LE PIA

 

Ua toe amatalia nei galuega tima'i a le Matagaluega o Tupulaga Talavou ma Tina a le malo, ina ia taumafai ai le olaga o le fanau talavou ia le vave tagofia le Ava Malosi ma le Pia, fa'atasi atu ai ma isi fo'i fuala'au fa'asaina eseese.

 

Peita'i, ua sapaia fo'i e le vasega o le Tine Afi a le Matagaluega o Puipuiga o le Saogalemu Lautele lea fo'i mau, ma ua latou fiafia e fa'atasi ma le susuga le Fa'atonu o le DYWA, Jonathan Fa’anene, e pu'eina le latou ata, e fa'ailo ai latou Saini po'o Fa'ailo Tetele ua mae'a saunia mo lea fa'amoemoe.

 

"O le taua o lenei fe'au, e tau fa'amanatu atu lava i le fanau talavou, e taofi le tagofia o le Ava Malosi ma le Pia, ae fa'asaga ane e tauva i ta'aloga eseese ua fiafia i ai. O lo'o tele lava ta'aloga o lo'o saili nisi e ta'a'alo ai, o lea fo'i ua tapena liki o ta'aloga eseese mo le tatou sisigafu'a i lenei tausaga, e matagofie fo'i pe afai ae fa'amaoni ane e tauva ai. E aoga mo le tino malosi lelei, e aoga fo'i mo le silafia aua atonu o oe le isi tagata ta'alo lelei lea o lo'o sailia mo lea fa'agatama o le a tauva ai,” o se tima'i lea a Fanene i tupulaga.

 

O le taimi nei, ua fa'ailoa mai, ua fa'atuai ona matua fa'atamo'e fuafuaga uma a le Matagaluega a Tupulaga Talavou ma Tina, ona o lo ua fa'aaogaina nei le latou Ofisa autu i le aotelega o galuega fa'atino uma a le FEMA ma le SBA.