200 AVANOA FAIGALUEGA I TEXAS MO TATOU TAGATA:

Ua fa'auia mai se talosaga mo alo o Amerika Samoa e fia faigaluega i le Kamupani i Texas, le Practical Employee Solutions (PES) mo galuega teufale, fufulu ipu, tautuina o mea'ai ma galuega i togala'au po'o laufanua.

O le aso 6 Aperila, 2018, mai le itula e 1:00 i le aoauli se'ia o'o i le itula e 5:00 i le afiafi, fa'atasi ai ma le aso Aperila 7 - 10, 2018 mai le itula e 10:00 i le taeao e o'o i le 5:00 i le afiafi o le a fa'atalatalanoa ai nei avanoa i le Matagaluega o Tagata Faigaluega a le Malo i le Maota o le Malo i Utulei.

Ua fa'ailoa mai e le Matagaluega o Tagata Faigaluega a le tatou malo, ua mae'a fa'amaonia mai e lea Kamupani o lo'o i ai avanoa faigaluega e tusa ma le 1,000 e ai ona sailia nisi e faigaluega ai.

Ua silia fo'i i le masina talu ona faia feutaga'iga PES, ma le DHR a le malo, ma e lelei fo'i totogi.

Ua mafua ona taumafai e saili i fafo le DHR a le malo, ona o le fa'atonuga a le afioga le Kovana Sili Lolo Moliga, "Ia sailia ni avanoa mo fanau e faigaluega ai i kamupani i fafo, ia fa'amasani fo'i o tatou tagata e malaga i fafo e tausaili mai ai o latou lumana'i ma le tamaoaiga tausi o latou aiga."

"O lea taumafaiga e faaitiitia ai le aofai o i latou o loo ua fa'atalitalia ni avanoa faigaluega i matagaluega ta'itasi, ma afai lava e leai ni avanoa, o le a fa'ateleina atili le fa'afitauli mo aiga ta'tiasi ma lo latou tausiga. Peita'i e sili ai ona saili i fafo e maua ai nisi avanoa lelei mo tatou tagata lautele o lo'o tausaili se avanoa sili e maua mo i latou e tausia ai latou aiga."

E tusa ai ma se fa'amatalaga mai le Fa'atonu o le Matagaluega o Tagata Faigaluega, Mrs Eseneiaso Liu, "O lo ua ofoina mai avanoa e faigaluega ai tagata o le a latou talia talosaga, fa'atasi ai ma pasese e malaga ai, ae maise fo'i o latou totogi ma nofoaga lelei e nonofo ma faigaluega ai."

Ua fa'atulaga mai e ao ina i ai lou numera saogalemu, ma ia i ai fo'i ma pepa malaga - Tusi Folau po'o le CI e malaga ai, ua na'o tagata sitiseni o Amerika ma Nesionale o Amerika e talia a latou talosaga i nei avanoa.

Ua fa'ailoa mai e ta'i ono masina ma le ta'i 12 masina konekarate lea e ofo mai e nei Kamupani mo tagata uma o le a malaga, ina ia va'ai toto'a fo'i i latou i lau faigaluega pe lelei pe leai, ae maise ona mafai fo'i lea ona alu le tagata latou e siaki se isi ona avanoa faigaluega i se isi kamupani pe asiasi fo'i i so'o se mea o i ai nisi o latou aiga e fia faigaluega ma nofo ai. O totogi ua ofoina e ta'i $10 i le itula ma le ta'i $15 i le itula i totogi.

E ese mai lea vaega o tagata faigaluega, ae ua fa'ailoa mai, ua i ai fo'i le isi Kamupani mai Ausetalia, ua fa'afeso'ota'i mai e fia maua ni tagata faigaluega mo le latou lisi o va'a tetele la'u pasese po'o Meli.

"Ona ua va'aia le tele o talosaga ua fa'auia atu e tagata ina ua fa'asalalauina nei avanoa faigaluega i le televise, na toe liua ai le fa'atatau a le Pulega a le PES ina ia auina mai latou sui e fa'atautaia sa'o fa'atalanoaga mo avanoa faigaluega nei, e mautinoa lava e silia ma le 1,000,” o se tala lea a Liu.

Pe afai fo'i ae fa'atumauina feso'ota'iga ma aiaiga mo le kamupani lenei mai Ausetalia, o le a logo atu fo'i e le DHR taimi mo a latou fa'atalanoaga o avanoa faigaluega e ofoina mai ai e le o toe mamao.

LOSA TOGIA - TAUSIMA'I O LE KUATA MULIMULI 2017

Ua fa'ailoa le agaga fa'afetai tele o le Pulega ma le Aufaigaluega a le Grace Home Care, i le tama'ita'i Tausima'i ua mae'a a'otauina ma ua fa'afaigaluegaina fo'i e i latou, aua ua ia mauaina le faailoga taua - "Tausima'i o le Kuata."

O le kuata mulimuli o le tausaga ua te'a sa filifilia ai Losa Togia, ma ua fa'ailoa mai fo'i o le a toe sailia fo'i se tasi o tagata faigaluega Tausima'i Pasi a le Grace Home Care mo le Kuata amata o lenei tausaga, lea ua fa'ato'a mae'a i le aso To'ona'i na te'a nei.

E avatu le faailoga lenei ma le agaga fa'afetai tele o le Grace Home Care ia Losa Togia, ona o le fa'amaoni i ona tiute aua o lenei auaunaga e faia i tua i Aiga o e o lo'o latou tausia fa'apitoa.

MALAGA MAI KONESULA O FILIPAINA

Ua fa'ailoa le agaga fa'afetai tele o tagata Filipaina i Amerika Samoa aua o lo'o fa'aauau pea ona malaga mai le latou Konesula i Honolulu ina ia fesoasoani i le to'atele o i latou tagata Filipaina o loo alaala ma faigaluega iinei, ae ua fa'aletonu o latou pepa malaga, po'o tusi folau.

Ua fa'ailoa mai e le ali'i Konesula, Joyleen E. Santos, "O lenei avanoa ua avea ma se fiafiaga fo'i ia te a'u, ina ia mafai ai ona ou asiasi mai ia te outou iinei, e le faigofie ia te outou ona asia lo'u ofisa e tautuaina outou i nei mataupu taua ona e le o mafai ona maua uma e outou visas e ulufale atu ai i le Iunaite Setete, ae fa'afetai o lea e aloaia e Amerika Samoa lo outou autova'a mai ma galulue iinei e aunoa ma ni visas e pei o isi setete uma o Amerika."

E tusa ma le 2,000 tagatanu'u Filipaina ua mae'a fa'afouina latou tusi folau i lenei tausaga i le malaga asiasi mai a le Konesula, fa'atasi ai ma nisi fo'i o mataupu taua sa tatau ona faauia atu i lea ofisa.

I le taimi nei ua silia ma le 6,000 le aotelega o uso mai Filipaina ua alaala ma faigaluega i le atunuu.

Fa'ailoa e le ali'i Peresetene o Renato Sello o le FCAS, "Sa faia fo'i le fa'atasiga ma le fiafia tele a le matou Sosaiete a tagata Filipaina i Amerika Samoa ma Consul Santos a'o le'i toe tu'uva'a ese atu ia Mati 20, 2018, e fa'afetaia ai fo'i lona pa'au mai, aua e moni lava, ua avea ana malaga nei e fai ma mea e fa'afaigofie ai ona fa'aleleia pepa malaga, pepa e ao ina lesitalaina, mo nai o matou tagatanu'u iinei."