Tala I Vaifanua
FOAI SIAKI FESOASOANI A LE VFW MO VETERENI AMERIKA SAMOA
O le aso ananafi sa amata tufatufaina atu siaki fesoasoani a le vaega o Fitafita Tuai a le Vaega Au ona o se vaega tupe sa fa'atalosaga e le Au Ofisa Ulu o le Veterans of Foreign Wars (VFW) i Hawaii mo Amerika Samoa ma latou sui totino o alaalata'i ai.
O le susuga Igafo Maria Va'a Brown o lea fo'i e avea ma sui o lea Asosi a Fitafita Taui o Taua i le teritori, sa auai ai i le talosagaina o lea fesaosoani mo Amerika Samoa ona ua afatia ma fa'aleagaina ni mea totino a sui Vetereni i le ‘afa o Gita i le masina ua te’a.
O le talosaga na fa'aulu i le Veterans of Foreign Wars Unmet Needs o se tasi o Support Programs, ma ua mafai ai ona maua le aofa'iga o le seleni e $30,000. O lea ua amata autova'a atu nei Vetereni uma e to'a 100 i le Ofisa o le VA i Tafuna ina ia maua lea fa'amanuiaga.
Ua auai mai fo'i sui o le VFW i Hawaii mo le tufatufaina o siaki, ma ua i ai fo'i a latou suiga tofi o le a fa'aauau i se aso o lenei vaiaso, ona toe taliu ai lea o i latou i le fa'aiuga o le vaiaso nei mo Honolulu.
Na mua'i fa'atumu lava latou talosaga e agava'a ai mo lea siaki, ma ua le patino fo'i se mea e fa'aaogaina i ai e i latou o latou lava talosaga, ma ua i ai fo'i vaega o le pepa talosaga lea e ao ai ona fa'aalia patino fa'amaumauga o oe lava o se Fitafita Tuai a le Vaega Au a le Malo tele, ma ua mana'omia ai pepa fa'amaonia mo lou avea ma lea sui.
TOE FO'I KOLUSE MUMU SAN DIEGO - LIPOTI FESOASOANI
O le afiafi o le aso Tofi ua te'a sa toe fo’i ai sui o le American Red Cross i o latou aiga ma aai i Amerika, talu mai le latou fesoasoani i le atunu’u sa ‘afatia i le ‘afa o Gita. O le Ofisa o le Koluse Mumu San Diego sa ta’ita’ia lenei fa’amoemoe, aua o le ofisa lea e fa’aautu i ai Amerika Samoa.
Ua fa'aalia mai e le tama'ita'i o Emily Cox, o le so'oupu o le Koluse Mumu San Diego, "O foa'i uma ua fa'aalu, ua auina atu lea ma le alofa mai le Koluse Mumu i Amerika atoa e aofia ai ma i tatou iinei, ona o le agaga ina ia fesoasoani i pagatia sa feagai ai ma aiga ta'itasi i totonu o le tatou teritori. O le ala lea o le tautua a le Koluse Mumu, ia fesaosoani i pagatia ua lutia ai aiga ona o fa'alavelave fa'afuase'i."
O le aso Lulu o le vaiaso na te'a, na tapunia aloa'ia ai auaunaga a le Koluse Mumu mo le ‘afa o Gita, ae to’e foi uma tautua a le Kolusu Mumu i lona ofisa i Amerika Samoa.
Na fa'aalia e Cox, "O lea ua mae'a nei le auaunaga a le matou vaega i lenei ‘afa, peita'i o a lava mea na totoe e le'i tufatufaina atu o lo'o ua fa'atumauina lea i le Koluse Mumu Amerika Samoa ina ia latou fa'aaogaina aua o lea ua toe fo'i lava i latou i le fa'atinoga o latou galuega masani."
I le aotelega o fesaosoani a le Koluse Mumu i le ‘afa, e silia ma le 11,000 tagata o aiga ua mae'a fesaosoani i ai.
E 220 tagata faigaluega a le Koluse Mumu, e aofia ai ma sui uma na malaga mai fafo, na tofu sao i le fa'atinoga o galuega a le Koluse Mumu. Sa fesoasoani le Koluse Mumu e fafagaina tagata na sulufai atu i nofoaga lavea’i ma ua fa'ailoa mai e 15,000 ipu mea taumafa sa latou tufatufaina.
Mo aiga na fa'ato'ai mai le amataga o le fa'amoemoe mo se fesaosoani e toe nofoia ai nofoaga le tumau a'o taumafai latou fale e nonofo lelei ai, ua mae'a tufatufaina atu le 1,600 Jumb Start Kits, 1,500 Clean Up kits ma le 1,600 Recovery Kits.
E 13 nofoaga fa'apitoa sa mafai ona fa'atulaga e tufatufaina atu nei fesoasoani mo aiga na pagatia i le afa. E ese mai lea, e silia ma le 2,500 talosaga sa fa'auia ane i le Ofisa o le Koluse Mumu i Tafuna ona o a'afiaga talu mai le ‘afa.
SUI O LE KUPU HAWAII I AMERIKA SAMOA:
E toalua sui o le KUPU Hawaii i le teritori, ma ua malaga mai sui ina ia asia la'ua galuega fa'atino, fa'atasi ai ma la'ua fa'amaumauga ina ia fa'amaonia, o la'ua faia galuega e pei ona fa'aalia i a la'ua lipoti.
E le gata i le feagai ai ma sailiiliga ma fa'amaumauga i galuega fa'atino e toe fa'aleleia ai le siomaga mo la'au toto, manu o ofaga ai i le vaomatua ma le laueleele sa va'aia ai ni tulaga fa'aletonu, ae o le gataifale fo'i i ni galuega toe fa'aleleia o fa'asao ina ia fa'aauau sosia po'o puna'oa o lo'o aotelega i ai le ola o meaola uma i le sami ae maise o I'a ma 'Amu.
O i la'ua nei o Sinalei Taalo mai Aunu'u lea fa'ato'a tasi le tausaga talu ona avea ma sui totino fo'i o le KUPU Hawaii, ma le tama'ita'i o Alaese Tauofe mai Faleniu, lea ua silia ma le 2 tausaga talu ona avea ma sui o le KUPU Hawaii.
O nei tama'ita'i o lo’o a'oa'oga i le tatou Kolisi Tu'ufa'atasi, ma ua fa'ailoa mai e Alaese, "O le avea ai ma totino o le KUPU o se fa'amanuiaga ia te a'u lava ia, i a'u a'oa'oga ma su'esu'ega i la'u kosi lea e tau'ave, Marine Science. Ua avea fo'i le ausia o le totino o le KUPU ma ala ua fa'aopoopo mai ai se seleni e fa'atupe ai le a'oga ma taumafaiga, o se fesaosoani tele lea ia te a'u, ae maise o le fa'alautele ai lea o le iloa i a'oa'oga su'esu'e i alamanuia po'o sosia o le gataifale. O le ofisa autu o le Nationa Marine Sanctuaries (NMS), lea na fa'auia mai ai le talosaga na fa'ao'o atu ia te a'u, ma ua mafai ai ona talosaga mo lea avanoa lelei."
O le NMS a le teritori, o le ulua'i pa'aga a le KUPU Hawaii i lona fa'atuina mai i le 10 tausaga talu ai, ma ua fa'apea fo'i ona latou tausaili nisi o alo o le atunu'u e mafai ona avea ma ni totino o le latou pa'aga lea iinei. O le avanoa lelei fo'i lea e mafai ona fa'aulu ai nisi talosaga fou, aua ua o'o mai sui nei e to'alua o le KUPU ma ua fa'ailoa mai, "Ua mana'omia lava ona fa'ato'atele atili sui o le Kupu Hawaii mai Amerika Samoa, aua e matala fo'i le faitoto'a e gasolo atu ai i fafo e fa'atautaia ai latou suesuega ma sailiga i ala e fa'aleleia atili ai ni vaega o le vaomatua po'o le gataifale ua mataituina, ua a'afia pe fa'aleagaina lona siosiomaga, ua mafai ai ona olaola lelei la'au po'o meaola o lo'o ofaga ai i lena vaega o le si'omaga.
Emeli e mafai ona e talosaga ai: www.kupuhawaii.org