Ads by Google Ads by Google

Tala I Vaifanua

TUUFA'ATASI TUFAGA FA'AILOGA TAUVAGA NUMERA & FA'ASAEANISI

 

O le aso Faraile ua te’a na tolaulauina ai i latou ua lautogia mo fa'ailoga maualuluga o le Numera ma le Fa'asaeanisi i totonu o le Teritori, ma o se tufaga fa'ailoga sili lea ona umi ma le faigata fo'i ona fa'amauauina ona sa masani lava ona faia eseese i tausaga ta'itasi nei laugatogi a le fanau sa tauva.

 

Ona o le tulaga o le taofia o a'oga mo le isi 2 vaiaso ona o a'afiaga talu ai le ‘afa o Gita, lea ua taumafai ai ona fa'ataunu'u pea nei tauvaga fa'aletausaga, aua o lo ua matauina fo'i, ua tele kamupani ma nisi o matagaluega o le malo ua latou sapaia fa'ailoga ma tapenaga mo nei tauvaga fa'alea'oa'oga ale fanau a'oga i le atunu'u.

 

O le a tolaulauina atoatoa le lisi o taumafaiga a le fanau pe a o'o ina taua'aoina aloaia mai le lisi o suafa ma fa'ailoga ua tula'i mai ai i latou i vaega sa tauva ai i le numera ma Science, peita'i o nisi nei o fa'amaumauga ua mafai ona maoti mai i le taimi o le laugatogi.

 

I le tauvaga lona 21 ai lenei o le Numera i a'oga maualuluga ua toe sola fo'i ma le Sotuh Pacific Academy le fa'ailoga mo le togisilia i le aotelega o suega uma a le fanau aoga na tauva, tulaga lua ai Tafuna High School ae tulaga tolu Manumalo Baptist Avademy.

 

Ua fa'ailoa mai o le lona 18 ai lenei o tausaga o avea lava e le South Pacific Academy lea tulaga.

 

Mai le vaega a le Science e to'alima tulaga ua mae'a ona ausia i lenei tausaga, ona ua lava fo'i le sapaia e le vasega o matagaluega o le tatou ma pisinisi tumaoti o taumafaiga fa'asaeanisi i lenei tausaga. Ua fa'ailoa e le tama'ita'i Fa'atonusili o A'oga Dr Ruth Matagi-Tofiga, "E malaga uma lava i latou nei!"

 

O le ua avea le tauvaga i lenei tausaga o le tama'ita'i o Gloria Park mai le Pacific Horizons. O ia sa maua lona avanoa mulimuli ina ua mae'a taua'aoina ona fa'ailoga, e tutula'i ai ma toe fa'amatala lana poloketi o le galuega fa'atino fa'asaeanisi.

 

O le tulaga lua e to'alua ai sui ma mauaina lea fa'aioga, o le tama'ita'i mai le South Pacific Academy ma le ali'i talavou Seamus Cleary mai le Pacific Horizons i lana galuega fa'atino o le" Sailia o ni Hydrothermal Vents i le Ogasami o le Atu Samoa."

 

O le tulaga tolu o le galuega fa'atino na tapena e le al'i a'oga mai Samoana High ma le fa'ailoga lima ua toe tutusa ai fo'i le taumafaiga a le tamaita'i mai le South Pacific Academy ma le tama'ita'i mai le Pacific Horizons. O lona uiga o lenei tauaga e to'atolu sui mai le Pacific Horizons ua aofia i le to'alua o fa'ailoga o le a masi'i mo se sao o Amerika Samoa i le fa'aaliga Fa'asaeanisi i Pittsburgh. Peita'i e to'alua ua masi'i mai le SPA ma le to'atasi mai le Samoana High.

 

FONO ALE FEMA/SBA MA LE ASOSI AUFAIPISINISI

 

O le afiafi o le aso Tofi na fa'atasia ai sui o le aufaipisinisi i le afunu'u i se fonotaga ma sui a le FEMA ma le SBA aua fesoasoani a le fetarale e agava’a ai pisinisi sa afaina i le afa o Gita i le masina ua te’a.

 

I folasaga a sui o le FEMA ma le SBA, ua matauina ai, e mafai ona fesoasoani le FEMA/SBA mo le aufaipisinisi i nogatupe e toe fa'aleleia ai mea na fa’aleagaina e Gita, ma ua mautu ai fo'i le mau a le FEMA.

 

Mo Ekaelsia ma Fa'alapotopotoga Tumaoti, e talia fo'i talosaga mo nogatupe, peita'i e i ai nofoaga i totonu o Ekalesia ua nofoia e nisi o aiga. O lea itu o le tautua, e faila muamua mai le SBA mo le ekalesia, ae faila lava e le aiga latou mea ua fa'aleagaina e le ‘afa.

 

"O le mea e tatau ona fai, o le o'o mai i le FEMA/SBA ina ia faila mai talosaga, tusa lava po'o Aiga, Pisinisi po'o Fa'alapotopotoga Tumaoti, e maua lava le talanoaga ma iloa ai le tele o ala ua mafai ona fesoasoani atu ai le FEMA ia te outou uma,” o se tala fa'amalosi lea a Yolanda Stoke, le sui o le SBA.

 

Ua fa'ailoa mai e fa'ato'a tapunia a latou tautua uma i le aso 5 Me, 2018. Peita'i e tatau ona vave ona e o'o ane e fa'atumu lau talosaga.

 

AUAI TAUSALA LALELEI PASEFIKA I LE  PASIFIKA FESTIVAL

 

Ua i ai nei le Tausala Lalelei a le Pasifika, Matau'aina Toomalatai ma le Tausala lalelei o Samoa, Alexandria Iakopo i Aukilani, Niu Sila e auai i le polokalama fa'ataoto o le Pasifika Fest 2018 ua masani ai fo'i lea mal.

 

O le fa'amoemoe mo lenei vala'aulia, e i ai le sao o tausala lalelei nei o le Pasefika e fa'atautaia ai, peita'i, o le avanoa lelei lenei ua tapena e Ofisa o le Turisi a Amerika Samoa fa'apea fo'i ma Samoa ina ia avatu ai nisi fa'alauiloaga o mea e matua ese ai fo'i Samoa na lua i se maimoaga a tagata mai fafo, ma o le maketiina o tatou nei malo na lua.

 

"Ua mae'a fa'atulaga nofoaga fa'apitoa mo le fa'alauiloaga o tatou oloa gaosi, o la'ei ma isi fo'i oloa e tumati'e ai fo'i tatou oloa i ala o fefa'ataua'iga, ma e ono fiafia i ai i latou o alaala tumau i Niu Sila e fa'atau so'o ma o le a avea ma ala o se alagatupe maua a i tatou i fefa'ataua'iga i luga o le initeneti,” o se tala le a To'omalatai, i tusitusiga i upega tafa'ilagi.

 

O le a tulalata fo'i nei Tausala Lalelei  mai Samoa na lua ina ia taulia tatou Mitiafu, ie lavalava ma ofu matagofie o tama ma teine ua mae'a tapena e Mena, ma isi fo'i faleoloa lavalava iloga o le atunu'u e aofia ai SSAP lea sa latou tapu'eina ata mo le maimoaga, fa'apea ma isi faioloa.

 

O lo'o malaga fa'atasi To’omalatai ma le faletua Meafou Imo, le peresetene o le MASI, ae fa'apena fo'i ona malaga le tama'ita'i o Tristan Scanlan e soa le latou tausala lalelei na tulaga lua i le tauvaga Tausala Lalelei o le Pasefika sa faia i Fiti, 2017.