Ads by Google Ads by Google

Tala I Vaifanua

LESITALA MO ILI’ILI & PAVAIAI - FESOASOANI A LE FEMA

 

O lenei vaiaso o lo’o fa’aauau ai le lesitalaina o i latou sa afaina maota ma laoa, ae maise mea totino i le ‘afa o Gita i le masina ua te’a.

 

O lesitala mo fesoasoani a le malo tele o lo’o faia i le Disaster Recovery Center i le DYWA Pago Pago Youth Center, mai le itula e 8 i le taeao e oo atu i le itula e 4 i le afiafi.

 

I se pepa o fa’amatalaga mai le FEMA o lo’o fa’ailoa mai ai le fa’asologo o lesitala o le vaiaso lenei:

 

• aso Tofi, Mati 22, mo Ili’ili numera 0001- 0261; ma le

 

• aso Faraile, Mati 23, Pava’ia’i numbers 0001 – 0230.

 

O le aso Gafua e o’o mai i le aso ananafi sa lesitala ai i latou mai afioga o Nu’uuli ma Malaeimi.

 

O le mamalu o le atunu’u mai afioaga o Nu’uuli, Malaeimi, Ili’ili ma Pav’ia’i na misi a latou aso e lesitala ai i lenei vaiaso e mafai ona oo atu i le Pago Pago Youth Center i le aso Toanai, Mati 24.

 

E fautuaina le atunuu, afai ua uma na faia lau resitara ile DRC, e tatau ona e iai i lou maota pe a o atu le asiasiga a le FEMA e vaaia ia lou maota ma au meatotino sa faaleagaina e le afa o Gita.

 

Mo i latou uma e le atoa le mafaufau po o le tino ma e le mafai ona o

 

mai i nofoaga o le tusigaigoa  mo fesoasoani a le FEMA, o le a o’o atu sui o le FEMA i o outou maota po o laoa e fa’ataunu’uina le resitala. Mo ni fesili, valaau mai  i le 633-9017.

 

LESITALA AI NOGATUPE MO PISINISI & TAGATA LAUTELE:

 

Pe afai ua misia sou avanoa e fa'atumu ai sau talosaga i le SBA-FEMA, ua i ai le isi avanoa matagofie ua maua i le taimi a'o loma le fonotaga fa'apitoa a le Asosi a le Aufaipisinisi [Chamber of Commerce] ma sui mamalu mai le SBA/FEMA lea e fa'atautaia i le Fale'aiga o le DDW ma e fa'atupeina lea e le Kamupani Telefoni a le Bluesky Communications.

 

O lea fonotaga ua fa'ailoa mai e le susuga John Wasko, o se tasi o le laulauatofi a le Asosi i lenei vaitau, "O le a mua'i tu'uina le avanoa e lesitala ai so'o se tasi ua auai atu i le fonotaga, ae mana'omia ona fa'atumu sana talosaga i le SBA mo se fesoasoani. Ua le na'o le aufaipisinisi fo'i e ao ina auai atu i lenei fonotaga, ua vala'aulia lava so'o se tasi ua misi sona avanoa e le'i fa'atumuina a'o gasolo tatou afio'aga i le SBA/FEMA i lenei vaitau talu ona talia mai e talosaga mo ni fesoasoani tau tupe e toe fa'aleleia ai tatou fale nofo ma tatou pisinisi."

 

Pe afai fo'i ua amatalia sau pisinisi laititi ae le'i fa'atumuina sau talosaga, masalo o lou avanoa lelei lea, ae maise o se talosaga fo'i e avea ai oe ma totino o le Chamber of Commerce i Amerika Samoa. O sui iloga o le SBA lea ua vala'aulia e tofu sao mo lea afiafi e ta'amatala auiliilia ai latou tautua i le mamalu o le aufaipisinisi i le atunu'u ma o le a iloga foi ona maua avanoa e fa'afesiligia ai i tatou faipisinisi nisi o aiaiga o lenei fesoasoani taua.

 

O le afiafi i lona itula e 6:00 ua tatau ona i ai uma i tatou mo lesitala, ae mae'a loa lea avanoa ona amataloa lea lea i le saunoaga amata a le susuga Benigno B. Ruiz o se tasi o sui feso'ota'i a le Feterale i lenei vaitau.

 

O le a fa'amanino atili ai fo'i vaega eseese o fesoasoani e mafai ona talosaga ai i tatou.

 

O polokalama eseese ua aumai tonu lava e fesaosoani mai ai le FEMA mo aiga ta'ito'atasi ma pisinisi o le a saunoa i ai le tama'ita'i o Yolanda Stokes. O le fa'agasologa o le polokalama e saunoa i ai Jacueline Haylinger ma fa'ai'u ai loa saunoaga o le afiafi i lea fonotaga.

 

Manatua afai e fia fa'atumuina sau talosaga i lea aso, ia tautuana taua'aoina uma pepa fa'amaonia o oe le sui talosaga, lou fale po'o lau pisinisi, mea ua e manatu e ao ina talosagaina le fa'atupega.

 

 VAEGA TUPE MO LE FA'ASAO & TA'ALOGA

 

O le a maua e Amerika Samoa le aotelega e $2.5miliona e sapaia ai le te fa'aleleia o le tele o galuega fa'asao i le gataifale ma isi fo'i o ta'aloga e faia ae auga ina ia fa'aleleia ai tomai ma le agava'a i fa'agatama i le tai. Mo se fa'ata'ita'iga o fa'agatama e tauva i le i'a lapo'a, fagotaga po'o ai e tele i'a i lona sa, po'o le sili fo'i pauna o i'a e maua i le fagotaga e tasi, atoa ai ma le puipuia lelei o fa'asao i le gataifale.

 

O le fa'atupega lenei e toina mai lea e le Pittman-Robertson WildlifeRestoration ma le Dingell Johnson Sport Fish Restoration Act. Ua fa'ailoa mai e tusa ma le $1.1piliona na tufatufaina mai mo setete ma teritori, aua o lo'o latou tofu sao i lea vaega tupe tele, ona sa fa'atau e i latou le sapalai o mea fagota e amata mai laina, silaloi, maunu, fulu, auvili fagota, o va'a, totoga o va'a, mea uma fa'apena, o lo'o ala atu ai le sao o le tatou Malo i lea fo'i vaega o le tupe maua mo lea fa'amoemoe.

 

Ua fa'amauina e tusa ma le $1,173,058 le sao o Amerika Samoa ua i ai ma ua afua ai ona toe maua mai lea alamanuia mo le fa'aleleia atili o tatou fa'asao ma fa'agatama i le tai.

 

O le susuga le Failautusi o le Initeria Ryan Zinke na ia faailoa mai, "O tatou tagata ta'aalo fa'atauva i Amerika Samoa nei o nisi ua iloga le latou fo'i sao i lenei vaega tupe na fa'atulafonoina mo le fa'aleleia o fa'asao i le laueleeele fa'apea fo'i le gataifale, ma ua iloga fo'i lo latou sao i le fa'atupega o fa'asao nei i le vaomatua fa'apea fo'i le gataifale. Ua tele lea sao mo le teritori."

 

"Ua silia ma le 80 tausaga talu ona fa'atautaia nei fa'asao, ma o lo'o taofia fo'i le tinoitupe lea ma ua tino mai nei ua atilia ma le $20piliona ua tu'ufa'atasia mo le Iunaite Setete atoa ma ona teritori."

 

"O so'o se fana, ofe fagota, auvili fagota, laina po'o le silaloi mo lau ofe ma le matau, o se va'a e fa'atau po'o totoga o va'a e toe lipea ai, o na mea uma e o'o lava lona tau i le tupe lenei ua mae'a aotelega mai, ma ua toe maua ai se isi vaega e fa'aleleia atili ai fa'asao ma ta'aloga i le tai ma le laueleele fo'i"

 

O lenei tinoitupe ua tufatufaina mai e le US Fish & Wildlife Service, o lafoga totogia uma mai e i latou e fanafana, tutuli ma folai i va'a, fagota i va'a, ae maise o le fa'atauga o pulu fana, au ma latou aufana, ae maise o mea ta'alo mo ta'aloga i le vai, sami ma maulu, fa'atasi ai fo'i ma fa'atauga o afi o va'a, totoga o va'a ma va'a fou ma le totogi o le kesi ma le suau'u o va'a fo'i, lea ua tu'ufa'atasia mai ai lenei aotelega o le tupe $20.piliona.