Tala I Vaifanua


O le tama'ita'i talavou, 27 tausaga le matua, alo o le fa'afeagaiga Pr & Mauga Mataia o le AOG, Amerika Samoa lea ua fa'au'u mai ma ona fa'ailoga MA in Divinity ma le MA in Ministry Studies mai le Asia Pacific Theological Seminary i Bacquio City Phillipines i le aso Tofi. Ua tapena fo'i o ia mo le Misiona e malaga ese atu ai i le aso Gafua i le malo o Indonesia, mo le 3 masina ona fa'ato'a taliu mai ai lea i Amerika Samoa nei. [ata: Leua Aiono Frost]

KUPU I HAWAII - AOGA MO FANAU HIGH SCHOOL FA'ATUPE AMERICORP

 

O lo'o i ai nei sui e to'alua mai le fa’alapotopotoga a le KUPU mai Hawaii e asiasi sui ua mae'a ona fa'aulu i le latou polokalama, ma o lo'o galulue pea iinei. O i la'ua nei o Sinalei Ta'ala mai Aunuu ma Alaese Tauofe o Faleniu.

 

O sui o le KUPU, Gina Carroll - fa'atonu o le Polokalama, ma Alofa Taei, o le Sui Feso'ota'i, o lo’o i le teritori. O lo ua la'ua maimoaina galuega ma asia ofisa o lo'o aoina mai ai e nei tama'ita'i a la'ua fa'amaumauga ua fa'aofi i lipoti o galuega fa'atino mo la'ua tusi pasi o sailia.

 

E tusa o se fa'amatalaga na fa'alauiloa ai lea Polokalama e Taei i le mamalu sa auai e fa'afofoga i le la'ua folasaga, sa fa'ailoa mai ai o le National Marine Sanctuary o le latou ulua'i pa'aga ina ua fa'atuina KUPU i le 2007.

 

Peita'i i le taimi nei, ua tau sailia fo'i nisi o le fanau o lo'o a'o'oga i High School, a'o'oga i le Kolisi Tu'ufa'atasi ae maise nisi fo'i e le'i mae'a High School ae mana'omia se isi avanoa fa'apenei e talosaga ai ina ia a'oa'oina fa'apitoa i le polokalama a le KUPU ma agava'a ai i nisi matata i galuega o lo'o fa'atautaia e i latou i le siomaga, laueleele ma le gataifale.

 

O le mau tau'ave a le KUPU ua fa'ailoa mai o le A'oa'o, Tautua ma Fa'aleleia atili lou si'omaga lea e aotelega i ai lou vaomatua ma lou gataifale. O galuega uma e fa'atino e va'aia e i latou vaega o le atunu'u o lo'o mana'omia ona toe fa'aolaola lelei meatoto po'o la'au o ola ai, saili po'o le a le afuaga o na fa'aletonu, ona galulue fa'atasi loa lea i se poloketi e toe fa'aolaola lelei ai la'au ma manu uma o ofaga ai, ia toe toe fa'aaoga i le lumana'i ae ua atoatoa puna'oa ma ona sosia o i ai.

 

"O nei ituaiga o a'oa'oga, e i ai le vasega o fanau e matua fiafia lava e faia, ae le faaalu le taimi i totonu o potu a'oga, ae fa'atino e i latou poloketi fa'apenei e aoga mo le aotelega o le afio'aga ma tagata lautele o le atunu'u. Ua i ai fo'i tusi pasi e mafai ona taua'aoina i nei fanau, ina ia aoga mo i latou i le lumana'i e sailia ai ni latou galuega. O le to'atele lava o matou tamaiti a'oga, e toe fa'afaigaluega ai lava i totonu o poloketi fa'atino a le KUPU, ma ua fiafia atili ai i latou e galueaina le siomaga, po'o le gataifale po'o le  vaomatua,” o se tala fa'amanino atili lea a Carroll.

 

"Ua mafai ona maua avanoa e malaga atu ai nei sui o le a talia talosaga e le KUPU i Hawaii ma galulue ai i galuega fa'atino i Hawaii, po'o le fa'aauau lava fo'i o galuega iinei ae ua mae'a lesitala i le Kupu ma e maua fo'i a latou siaki ona o loo auai i le polokalama e fesoasoani e totogia ai a'oga, pasese o feoa'iga ma mea'ai mo le tamaititi a'oga,” o se toe fa'apupula atili mai lea o lena vaega o le polokalama.

 

Afai fo'i o le a maua nisi sosaiete e fiafia e galulue i galuega o le siomaga, i le vaomatua ma le gataifale, o le a fa'apa'aga ma le KUPU.

 

"O le ala fo'i lea o le masi'i mai, e fa'aofi ni sui sosaiete fa'apa'aga ina ia fa'aleleia atili le tautuaina e le KUPU o Amerika Samoa, ma avatu fo'i ni sui e galulue ma fa'asoa ane fo'i i ai nisi o ituaiga poloketi ua fa'atinoina i Hawaii ina ia faia fo'i iinei. O galuega uma e fa'atino e talafeagai lelei ma le fa'atupega mai le Americorp, o se tasi o polokalama sa fa'atautaia fo'i i Amerika Samoa nei,” o se tala lea a Carroll.

 

O le uiga o le upu KUPU i Hawaii, o le ituaiga la'au lea, e muamua lava mafai ona ola  mai i luga o le lava o se mauga mu. O le uiga tonu lena e ala ai ona fa'aigoa i ai lenei  polokalama, ona o se taumafaiga ia toe fa'aolaola lelei le Siomaga.

 

E mafai ona maua sui o le KUPU i le Gov. Tauese PF Sunia Ocean Center ae le’i toe foi i Hawaii ia Mati 26.

 

AVANOA SIKOLASIPI - BLUESKY COMMUNICATIONS

 

Ua i ai avanoa fa'asikolasipi ua ofoina mai e le Kamupani Telefoni a le Bluesky Communications mo i latou e agava'a ai, ia tusa ma aiaiga ua tu'uina mai. O i latou e tatau ona talosaga i nei avanoa fa'asikolasipi, o se tamaititi a'oga i a'oga maualuluga o le a fa'au'u i lenei tausaga, ae amatalia ana aoa'oga i se Kolisi, po'o le Iunivesite i fafo.

 

E tatau ona e fa'ailoa fo'i le Kolisi ua talia ai oe, po'o le Iunivesite ua mae'a talia mai ai lau talosaga. E talia talosaga mo sikolasipi i le Ofisa Autu o le Bluesky Communications ia Aperila 23 i le Laufaou Shopping Center.

 

E maua foi fa’amatalaga o avanoa sikolasipi i le uepesite a le Bluesky  http://www.bluesky.as/blueskyweb/?page id+3997  po’o le valaau i le numera telefoni *611mai se telefoni fe'avea'i a le Bluesky ma fesiligia le tu'uina o oe i le Human Resources Dept.

 

FA'AU'U ARLENE MAUGA FA'ASALA MATA'IA

 

Ua fa'aiu ma le manuia taumafaiga a le tama'ita'i talavou, Arlene Mauga Fa'asala Mata'ia mai le Asia Pacific Theological Seminary i Baquio City, Filipaina i le aso Tofi na te'a nei. O ia o le sui e to'atasi mai Amerika Samoa na a'oga i le APTS i Filipaina, e tausaili ai lona Master of Arts in Divinity Studies.

 

O Arlene na soifua a'e i le falemai o Silas B Hays,  Fort Ord i Kalefonia. O lea ua atoa lona 27 tausaga ae ua fa'au'u ma lona fa'ailoga Masters of Art in Divinity. Na amata mai a'oga a Arlene i le ECE i Nuuuli ma soso'o ai Manulele Elementary ae fa'au’u i le Tafuna High School i le 2009.

 

"O lona naunauta'iga e fia avea lona ola e a'oga ai fa'a-Tusi Pa'ia, o se mea ia manatu i ai a'o le'i fa'au'u mai Tafuna High School, ma sa ma'ua talia ma le alaga fiafia i le Atua lona fa'anaunauta'iga. Ua tali fo'i le Atua soifua ia te ia i lona lava vala'auina, ua i ai vavega ua mae'a fa'ava'aia i ai i ma'ua ma le Faife'au ona o lona ola taumafai ma le talitonu i lona Atua,” o se tala lea a le tina, Mauga Mataia.

 

"Fa'afetaia le loto finau i le afafine, o ia o se lamepa e fia susulu ma ua mafai fo'i ona tu'u i luga ma ua fa'afetaia le to'atele sa talosia ana taumafaiga uma. Vi'ia le Alii,” o se tala lea a si ona tama Pr. Mataia.

O Mati 26 e malaga fa'atasi ai Arlene ma nisi o lana vasega fa'au'u mai Filipaina e faia le latou galuega fa'amisionare i le malo Indonesia, lea ua fa'ailoa mai, o lo'o sauaina ai le au le Kerisiano i le taimi nei.

Comment Here