AMATA FAAALIGA GALUEGA FA'ASAEANISI  ELEMENTARIES

O le taeao ananafi sa o'o ane ai le vasega o Faia'oga ma latou sui  ua mae'a manumalo i a latou fa'aaliga o galuega fa'atino fa'asaeanisi, mo le tauvaga a le Territori  o le 2018 i le Fale Laumei i Utulei.

Mai aoga tulaga muamua uma i le teritori ua ofi i lenei fa'aaliga fa'asaeanisi, e 179 poloketi na fa'atutuina i le Fale Laumei i le aso ananafi.

O le aso Gafua o le vaiaso nei lava sa mua'i tapena ai e le Komiti atoa ma fa'atulaga laulau, ae o le fanau ma latou galuega fa'atino fa'asaeanisi e ao ina mae'a fa'atutuina i le afiafi o lea aso.

O le afiafi ananafi, na mae'a lelei ai ona ave'esea galuega fa'atino uma a le fanau a'oga tulaga muamua, ae tapena le Komiti mo le fa'aaliga a fanau a'oga maualuluga e faia i le aso Tofi, Mati 22, i le Fale Laumei lava.

I se va'aiga i galuega fa'atino a le fanau na fa'aalia, matagofie lo latou taumafai. O se tasi o tamaitai talavou mai le A. P. Lutali Elementary i Aunu’u, Amethyst Maliga, sa ia fa'aalia lana galuega fa'asaeanisi na faia, "O le a le iIuaiga Talo lea ou te Ola  Mai Ai?" O lea tama'ita'i e vasega lua.

O le galeuga fa'atino a le tama'ita'i mai le Samoa Baptist ua fesili ai, "Po'o Fea e sau ai le Vai?" Ua talanoa mai le tama'ita'i o Charleeann Mauga, i le "Li'o o le Ola" o le mea'ai fa'aopoopo le Okesene i le air, maua mai ai le suavai [H20] ma le Okesene ua toe puaina mai, ae aga'i i le suavai i le ea, ma toe timu mai i le laueleele. O lea fo'i tama'ita'i e vasega Lua.

Maimoaina le tele o nei galuega e faia'oga ma nai aiga o matua sa autova'a ane e tapua'ia faiva o nai a latou fanau i lea fo'i mataupu aoga tele, "Fa'asaeanisi!" O le laugatogi o nei mea uma e fa'atino lea i le aso Faraile i le itula e 1:00 i le aoauli.

MCDOALDS AMERIKA SAMOA SIKOLASIPI MO FANAU A'OGA

Ua talia nei e le McDonald's Amerika Samoa talosaga mai le fanau a'oga o le a ulufale atu i le Kolisi Tu'ufa'atasi a Amerika Samoa fa'apea fo'i ma fanau a'oga e ulufale atu i ni Kolisi po'o Iunivesite i fafo mo a'oa'oga mo ni avanoa fa'asikolasipi.

"O lenei tausaga e lima fanau a'oga a le atunu'u ua fa'atulaga latou te mauaina avanoa nei ua tapena i ai le McDonald's Amerika Samoa ma e fa'aalu ai le aotelega e $36,000. E fa ni tamaiti a'oga maualuluga o lo ua sauni e ulufale i le tatou Kolisi Tu'ufa'atasi ae to'atasi lava se tasi ua mae'a le aoga i le Kolisi Tu'ufa'atasi ma ua talia mai i se Iunivesite i fafo e a'oga ai,” o se tala lea mai le afioga Talaleu Carol Tautolo - Samuelu, le pule fo'i o le McDonald's Amerika Samoa.

Ua vave ona fa'asalalau mai nei avanoa ina ia tapena i ai le fanau a'oga, ma faia fo'i latou su'ega SAT a'o le'i o'o ina fa'amuta le taimi e fa'aulu ai talosaga mo nei avanoa e fa mo le fanau aoga High School, ae maise fo'i o le fanau a'oga i le Kolisi ina ia talia mai e se Iunivesite po'o se Kolisi i fafo mo le afa tausaga mulimuli o le 2018 e aoga ai.

Ua i ai agava'a fa'atulaga ina ia ausia e le sui o le a tauva mo nei avanoa fa'asiikolasipi.  Mo le fanau aoga i a'oga maualuluga o le a talosaga, e ao ina 1,000 ma sili atu ou togi i le Suega SAT, e tatau fo'i ona e sauni e ulufale i le Kolisi Tuufa'atasi o Amerika Samoa ma o le GPA e ao ina 3.5 ma aga'i i luga. O oe fo'i o le tamaititi a'oga na fanau i Amerika, fanau i Amerika Samoa po'o se tasi ua Nofomau[ Permanent Resident] i Amerika Samoa.

O le agava'a o tamaiti sa a'oga i le Kolisi ae ua sauni e fa'aauau a'oga i se Iunivesite i Amerika, e ao ina maua e oe le GPA 3.5 ma aga'i i luga, ma ua mae'a mautu mai lou avanoa e te a'oga ai, ua talia mai ai lau talosaga i se Iunivesite i Amerika e te ulufale ai i le isi afa tausaga o totoe o le 2018, a'o oe fo'i o se tagatanu'u o Amerika, Amerika Samoa ma o se Permanent Resident o Amerika Samoa.

Faia tusi talosaga i le ofisa ulu o le McDonald po'o lou feso'ota'i fo'i i le Facebook a le MacDonald's American Samoa e fa'atumu ai lau talosaga. E fa'amuta talosaga i nei avanoa fa'asikolasipi ia Aperila 27, i le itula e 4:00 i le afiafi.

Telefoni 699-8686 pe afai e fia malamalama atili i nei avanoa mo le fanau a'oga.

POLOKA MASINI ATM MA MASINI TUPE - MAFUA I LAINA A LE ASTCA

Fa'ailoa mai e le ANZ  Bank i le aso ananafi, o le tele o fa'aletonu a latou masini tupe ATM ma faleoloa fo'i i le fa'aiuga o le vaiaso na te'a nei, e afua mai laina o feso'ota'iga a le ASTCA.

Ese mai lea fo'i tulaga, ua atili ona matua pisi lea fo'i itu o le auaunaga, aua ua mae'a fa'aliliu uma siaki a le Saogalemu i Card Tala Tupe, ma ua mana'omia atili ai le fa'aaogaina e i latou uma ua maua saogalemu masini ATM.

Ua le gata i lea, o tupe a le Red Cross e maua uma mai lava i Cards Tala Tupe.

Ina ua motusia uma le so'otaga o lea tautua e aga atu i faleoloa taitasi ua i ai masini e fa'aulu ai le Card mo le totogia o fa'atauga, ua oti mai fo'i lena itu o le tautua, ae afua uma na fa'aletonu, ona o laina o telefoni a le ASTCA lea e feso'ota'i ai ina ia mafai ona faia na ituaiga o tautua.

I le itula e 1:30 i le aoauli ananafi, ae fa'ato'a faamautu mai e le sui o le Faletupe ANZ Amerika Samoa Bank, ua mae'a nei ona toe tatalaina le auaunaga mai a latou masini ATMs uma lava i le atunu'u, ma ua fa'ailoa mai fo'i lo latou agaga fa'amaulalo ma fa'ato'ese i le mamalu lautele ona o le motusia o le tautua.

E le gata i lea, ae o le fa'aiuga o le vaiaso na te'a nei, ua fa'ailoa mai ai fo'i na motusia uma laina o telefoni na mafai ona vala'au mai ai tagata o aiga mai Amerika i aiga i Amerika Samoa.

MAUA SIAKI O LAFOGA - TAX REFUND ASO ANANAFI

O le aso ananafi na maua ai tupe o siaki o lafoga - tax refund - a i latou sa faila mai le aso 1 Ianuari, se'ia o'o i le aso 24 Ianuari. O lenei tala fiafia ua loa fo'i o tatalia e le to'atele sa faaagaaga lea fa'amanuiaga mo ni fa'atauga fo'i ma le tele o mea sa manatu e fa'atino ai a le aiga atoa.

O le aotelega o siaki sa mae'a saunia mo  le aso ananafi e $684,905 - e aofia ai le $254,369 mai le malo o Amerika Samoa ma le $430,536 o lafoga a le fanau lea e totogia e le feterale.