Tala I Vaifanua


O le va'aiga lea i le aufaigaluega totofi mo le Poloketi ma le fa'atinoga o le "Malosi Fa'atasi" e fa'afailele tupulaga o a taeao, ma ua latou tinou fo'i mo le latou lea tiute e fa'atalatalanoa ai tina ma'itaga ma tina ma fanauiti. [ata: Foai]

FA'AFAILELE TUPULAGA O A TAEAO, SUESUEGA FAIA MO TINA MA'ITAGA

 

Ua mae'a fa'atautaia le polokalama ua fa'aigoaina, "Malosi fa'atasi e fa'afailele Tupulaga o a Taeao" ma o se polokalama na afua mai ona o se fa'anoga sa tusia i se pepa ma tu'uina e se tina sa auai atu ma lana fanauiti i talavai a tamaiti, ae ua fiu e fa'atali le taimi e o'o ai le fa'asologa o le talavai ia te ia.

 

O lo'o taumafai fo'i tama'ita'i na atofa mo lea polokalama mai fafo, Ms Nicky Hawley, mai le Iunivesite o Yale ina ia fa'atautaia lenei suesuega. O ni fa'aiuga lelei mai lenei suesuega e mafai ai ona fa'ailoa mai, pe ua i ai ni suiga lelei i amio ma le olaga o tupulaga faia'e o Amerika Samoa, ona sa mua'i tapena lelei tina na soifua mai ai i latou, i mea e ao ina latou faia, ia mautinoa ai le soifua maloloina lelei tau le tino ma le mafaufau o fanau o le lumana'i o le a latou fanaua.

 

O le taimi tonu e faia ai lenei fa'atalanoaga fefa'asoa'i ma tina uma o faia talavai a latou fanau, po'o tina ma'itaga fo'i o fa'atalitalia latou talavai ma siakiga, o le a fa'aaoga tatau lea taimi e tufa atu ai nisi fa'asoa mo i latou, e aoga i le tausiga o le fanau i ona itu uma, ma le tausiga lelei fo'i o i latou a'o ma'itaga.

 

O nisi o nei polokalama o le a fa'aaogaina tatau ai nei taimi o tatalia ai talavai a tina ma fanauiti, e aofia ai le faitau tusi i fanau a'o fa'atalitalia le taimi e moe ai, o le tausiga lelei o fanau i totonu o maota ma laoa o lo'o nonofo ai, ma tulaga uma tau le tumama i totonu o aiga.

 

O nisi fo'i o nei aoa'oga ua aofia ai ma le ituaiga o tui puipuia ma lo latou aoga i le olaga tuputupu a'e o talavou le fanau se'ia o'o lava ina matutua. O le mea'ai paleni ma le aoga o le pa'e'e lelei o le tino a'o talavou ma fa'asolo atu ina tagata matua.

 

Ua a'oa'oina fo'i tina i le tulaga fa'amalositino, le aoaoina o fanau, ma aua le so'ona fagaina fanau i mea'ai e tele ai le masima ma saga fa'ainu i apainu ma vai suamalie ae matele ina inumia le vai auli.

 

E matua faia a'oa'oga fa'apitoa mo tina e tima'ia ai i latou ina ia taofia le ulaula tapa'a po'o le sikaleti i totonu o aiga. "Aua e le na'o le tagata ulaula e afaina i le asu o lana sikaleti, e afaina ai fo'i ma le fanau uma lava i totonu o le fale fa'atasi ai ma oe le tina,” o se tala lea a Hawley.

 

"O le tima'iga sili lava, o le mautinoa lelei, o fanau e pei o le mea pu'eata i le olaga nei. E so'o se mea lava e faia e matua, e fa'apena fo'i ona fa'aa'oa'o e le tamaititi, i le taimi e le'o toe laititi ai, ae o le taimi ua matua ai ma talavou ua ia manatu ai e fa'aa'oa'o i ona matua,” o sana toe tima'i mai lea.

 

O le fa'atautaiga o lea fetufa'iga e tu'ufa'atasia tina uma o lo'o tali tutusa o latou masina e fananau ai.

 

O le a fo'i sau gaoioiga lelei e faia i lau pepe ao le'i fanau mai, ma ua latalata fo'i i lou masina? "Faitau i ai sau tusi, e fa'ailoa i ai lou leo ma le aga e te fiafia e faia e le tamaititi pe a o'o ina fanau mai ma ua e taumafai e fa'amoe o ia, faitau i ai le tusi i le taimi e le'i fanau mai, se'ia o'o i le taimi ua tu'ueseeseina ai oulua."

 

O le a tele ni mea aoga e mafai ona maua e tina nei i a latou fefa'asoa'iga ma nei sui mai le STRONG TOGETHER, po'o le Malosi Fa'atasi.

 

"E le misia lava fo'i ona tima'i tina uma i tulaga o tumama i le fatuaiga, fa'apea ma le tausia lelei o manu'anu'a o le fanau ma vave togafitia pe a lavevea i latou a'o laiti, ina ia le ulu fo'i siama o ni fa'ama'i i o latou tino e ala i nei manu'a. O le ituaiga fa'ama'i fo'i e maua ai le fanau ona ua palapala auvaivai ma vaitafe e o ma ta'e'ele ai, o le isi lea mataupu e aoga tele mo tina ina ia latou silafia,” o se tala lea a le tama'ita'i o Kima Fa'asalele -Sauvasa, o se tasi tama'ita'i o lo'o avea ma tama'ita'i e fa'asamoa maia nei a'oa'oga taua i nisi o tina e malamalama lelei atu pe a faia folasaga i le Gagana Samoa, nai lo le fa'aperetania.

 

O i latou ua fai ma Sui o le Malosi Fa'atasi ina ia fa'atalanoa mataupu uma i tina ma'itaga ma tina ma fanauiti, e aofia ai Hawley, Fa'asalalele-Sauvasa ma Miracle Loia.

 

IESU LE MALAMALAMA - SE'I UA TOLOPO FA'ATOLU ONA SE'I

 

Ua faafetai ua leva ona tolopo so'o lenei fa'amoemoe, ae o le to'atele sa nofo popole mo latou numera ma tusi na fa'atau ae le mailoa po'o le a le aso e se'i ai, lea ua fa'asalalauina atu, o le a faia ia Aperila 14, 2018.

 

O le fa'atolu ai lenei ona tolopoina mai o le taimi e se'i ai lenei Lulu Laki Number e 10, ma o le fa'asea na o'o mai a le to'atele sa sailia i latou na fa'atauina mai ai latou tusi ma pepa se'i, "Ua leai se fa'ailoa mai pe o'o pe leai ona se'i o le latou Lulu, ae po'o le a fo'i se isi aso e toe tu'u atu i ai le fa'ataunu'uina o lenei fa'amoemoe."

 

O nisi o i latou na fa'asea ai ma ali'i malu o le Malo, peita'i na fa'ailoa atu ia i latou e vala'au numera i luga o tusi se'i, ae vala'au atu fo'i numera e i'i fa'asoloatoa.

 

O se talosaga ina ia fa'autagia o le mamalu o le atunu'u e le mailoa e i latou le Ekalesia aua o lo'o tusia mai "Iesu le Malamalama" ae leai se igoa o le Ekalesia e i ai, o le igoa lea o le Malumalu ua fa'aigoaina mai ai le se'i.

 

Ma o lea ekalesia, o le Ekalesia Fa'apotopotoga Kerisiano I Ottovile, fa'afesaga'i ma le Cost-U-Less.

 

Afai ua leiloa aupepa na avatu e taofi mo a latou tusi se'i, e mafai ona e o'o ane i le ekalesia lena i Ottoville Tafuna, e feutaga'i ai se isi faiga e toe avatua ai au pepa e taofia mo lea fa'amoemoe.

 

O se fa’asalalauga totogiina mo lenei se’i sa lomia i le Samoa News i le aso Faraile ma le aso ananafi.

 

LE TAUALOA NUMERA FALETUPE TERRITORI AMERIKA SAMOA MO PILI MAI FAFO?

 

Ua i ai se tina na fa'aletonu lona mafaufau ina ua o'o atu i le faletupe ae fai mai e le mafai ona taua'aoina mai le numera mo fefa'ataua'iga i le initeneti a le Faletupe o le Teritori o Amerika Samoa (TBAS)

 

"Ua uma ona fa'asalalau fa'alaua'itele mai i luga o le televise me nusipepa ua mae'a ona i ai le tatou Numera lea mo Fefa'ataua'iga i luga o Laina o le Initeneti, ae o lea ua ou sau ae fai mai e le mafai ona fa'aaogaina e a'u,” o se faitioga lea a le tina.

 

"Ua i ai le numera, ae le mafai ona fa'aaogaina mo nei ituaiga o tupe e fa'aulu mai fafo, po'o fefa'ataua'iga fo'i e faia i luga o laina o tafa'ilagi, aisea, e le'i mae'a pasia leleia uma mai aiaiga a le feterale e tusa ai o lea numera. Pe afai e mae'a pasia ona fa'ato'a mafai lea ona toe fa'asalalau fa'alaua'itele atu ina ia fa'aaogaina loa lea numera e fa'aulu mai ai tupe mai fafo, e totogia ai pili mai fafo ma le tele o fa'atauga i luga o laina o le initeneti lea ua matele ina fiafia i ai le to'atele i lenei vaitau,” o se tala lea a Shalini o le TBAS.

Comment Here