Tala I Vaifanua

POLOKALAMA SPED A.P. LUTALI ELEMENTARY - AUNU'U

 

Mai le vaiaso atoa sa fa'atautaia ai le polokalama fa'ataoto a le SpEd i le a'oga tulaga muamua a A.P. Lutali i Aunuu, na fa'amae'a aloaia lea vaiaso i le aso Faraile i le sauniga e fa'alelea ai paluni o lanu eseese.

 

"O aso ta'iasi o le vaiaso mai i le aso Sa na faia ai le sauniga lotu, Aso Gafua amata loa ona fa'amalosia lanu eseese e la'eia e le fanau ma faia'oga, ina ia fa'amanatu ai i le fanau a'oga uma le vasega o Fanau Faapitoa ma latou mana'oga tupito o lo'o soifua ai. Fa'afetai lava aua e va'aia lava le sapaia faatasi e le fanau a'oga, faia'oga ma le vasega o matua o lenei taumafaiga,” o se tala lea a le susuga Misifoa Umi, le Resource Specialist a le SPEd i le aoga i Aunu’u.

 

Ona o paluni e ao ina fa'alelea ese i lea ituaiga taimi ma faia ai le latou 'aiga fa'apitoa e fa'amae'a ai le polokalama, o se aiga na saunia e le vaega o faia'oga ma ta'ita'i o le SPEd e fa'afetaia ai fo'i le galulue fa'atasi uma o le pulega, faia'oga ma fanau a'oga i le vaiaso atoa na atofa mo lea fa'amoemoe.

 

O tusiga o saini po'o Laupapa fa'asalalau e fa'ailoa ai le manulauti tau'ave o lenei tausaga ina ia fa'amanatu pea i le fanau a'oga ma faia'oga, e fa'ataua fanau fa'apitoa i lona sini  "Ua Tatou Omai Fa'atasi”, sa faatautaia mai fo'i i le vaiaso atoa.

 

Va'aia le matagofie o lea vaega o le fa'aaliga, ma ua galulue fa'atasi vasega ta'itasi ina ia mautulaga a latou Posters po'o Fa'ailo mo le Autu ua mae'a filifilia.

 

"O le taumafaiga i lenei tausaga, e to'a 9 i latou o le fanau fa'apitoa o lo'o a'o'oga fa'atasi ai ma vasega eseese i le A.P.Lutali Elementary, ma ua matua finau fo'i le fanau a'oga ma latou faia'oga ina ia mautulaga a latou Fa'ailo,ae o le aso Faraile lava e fa'ailoa mai ai le tulaga o lea tauvaga, la'ei ai le ofu pa'epa'e e tagata uma, ma fa'alelea ai loa paluni felanulanua'i  ma tapunia aloaia ai le fa'atofala'iga o lenei fo'i tausaga."

 

O le tama'ita'i Pule A'oga, Asenati Umi, sa fa'afetaia le fanau aoga, faia'oga ae maise le to'atele o matua sa auai mo le fa'amoemoe mulimuli o le SPEd.

 

"O le auau o le fa'amoemoe maualuga o le DOE, ia tatou galulue fa'atasi e manuia ai mea uma! Peita'i po'o le a lava fo'i le tele o ni mana'oga fa'apitoa o le fanau o soifua ma i latou, afai tatou te galulue fa'atasi ina ia fesoasoa i atu ia i latou, e faigofie fo'i ona latou ola fa'atasi ma i tatou. Fesoasoani atu, ina ia gafatia e i latou ona tau'ave mana'oga fa'apitoa nei. Fai sau vaega lelei, mo lo latou fa'amoemoe e soifua fa'apei o i tatou uma!"

 

O le saunoaga a Misimoa Umi e fa'afetaia le a'oga ma matua fo'i ona o le fesasoani  sa latou ofoina atu mo le fanau fa'apitoa, ua gafatia ai ona ola fiafia i latou i aso ta'itasi ma fiafia e fa'atasi atu pea i a'oa'oga.

 

Sa auai fo'i le Peresetene o le PTA mo le sapaia o mea uma e faia i le lotoa a le Laumua, ma sa ia fa'ailoa ai, "E to'alaiti lava si matou a'oga, ae fa'afetai e le masepu lava se polokalama e fa'atino uma lava tiute o ali'i ma tama'ita'i faia'oga, ma e ese fo'i le matagofie o lea polokalama e fa'atino ai le alofa moni i fanau o lo'o soifua ma mana'oga fa'apitoa. E le faigofie mo i latou, ae a tausoa fa'atasi o latou mana'oga, ona maua lea o se to'omaga ma o le a fa'afiafiaina lava i latou e mafuta mai i le a'oga."

 

TALOSAGA AVANOA FAIGALUEGA TAMAITI AOGA I LE SUMMER

 

Ua amata ona fa'avasega taimi ma aso e talosaga atu ai fanau i ni avanoa mo galuega i le vaitau mafanafana i le le tu'uaga o a'oga.

 

Ua fa'alauiloa i se fa'asalalauga tausaga e afua mai le 14 se'ia o'o i le 24 tausaga o le fanau e mafai ona gasolo atu i le Ofisa o Tagata Faigaluega a le Malo (DHR) ina ia fa'atumu talosaga. Peita'i o fanau e 18 -24 tausaga le matutua e amata ona fa'atutumu talosaga mai le itula e 9:00 se'ia o'o i le 4:00 i le afiafi.

 

O le fa’atulaga o aso mo talosaga: Mati 19-20 e auai atu ai i Leone High School, ma ua i ai fo'i sui i Manu'a mo le fa'atutumuga o pepa talosaga mai le Manu'atele mai ia Mati 19 se'ia o'o ia Mati 29, 2018. O Ofu ma Olosega ia Mati 26-29, 2018. I le aso 19 - 20 Mati, o le a auai atu ai fo'i sui DHR i le A'oga Maualuga a Fa'asao Marist High mai le itula 3:00-6:00pm.

 

I le Nuuuli VocTech High o le a i ai sui mai ia Mati 21-22, ae o le itula 3:00 - 6:00pm o le a auai atu ai ia Kanana Fou High i aso lava ia. Manumalo Baptist lea ua fa'avasega le DHR e o'o atu i ai mo Mati 23 -24, ae o le Pacific Horizon ma le South Pacific Academy lea e o'o ane i ai i latou nei i le itula 3:00-6:00pm i aso lava ia.

 

Aso 24 Mati, o le a tatala lea avanoa mo so'o se tamaititi i so'o se a'oga ua misia le avanoa sa o atu ai sui i a latou a'oga o i ai. O le itula e 9:00am se'ia o'o i le 4:00pm i lea aso e mafai ai ona fa'atutumu a outou talosaga i le Ofisa Autu o le DHR i le EOB Maota o le Malo i Utulei.

 

Mo le fanau a'o'oga i Tafuna High ua fa'atulaga ia Mati 26-27 ae o'o atu sui nei ia Iakina Academy i le itula e 3:00 - 6:00pm i aso lava ia. Fagaitua High School mo Mati 28, mai le 3:00-6:00pm ma Samoana High School ua fa'atulaga mo Mati 29, mai le itula e 3:00 se'ia o'o i le 6:00 i le afiafi lava.

 

Ona soso'o lea ma le isi aso fa'agafua mo nisi fanau e le'i maua se avanoa e talosaga ai ia Mati 30-31mai le itula e 9:00am se'ia o'o i le 4:00pm.

 

O mea e ao ina taua'aoina, e aofia ai le Pepa Aso Fanau, SSN ma kopi o ni siaki a le tagata faigaluega i totonu o le aiga fa'atasi ai ma ni kopi o siaki a le saogalemu a nisi o maua na alamanuia i totonu o lou aiga, fa'atasi ai ma kopi o tax a i latou e faigaluega o le aiga atoa.

 

FA'ATUPEGA O POLOKETI FESOASOANI TAUGATA O LE ELETISE:

 

Ua maua e le DOI se vaega tupe e mafai ona talosaga atu ai  nisi o Matagaluega, Pulega Tumaoti ma le Malo, ma A'oga e fa'atula'ia ai poloketi e fesoasoani i le taugata o le eletise i lenei vaitau.

 

O lea vaega tupe ua mafai ona fa'auia mai le DOI e o'o i le $2.8miliona, peita'i e mafai ona toina mai vaega tupe e $150,000 lona maulalo.

 

Ua aofia uma teritori o Amerika i le Pasefika i lenei fesoasoani a le DOI lea e aotelega ai Amerika Samoa, Guam, US Virgin Islands ma CNMI. O le taumafaiga lenei ua fa'ailoa mai, ina ia taofiofi ai le fa'amoemoe pea o le atumotu i le sapalai o le Suau'u mai fafo. O talosaga uma mo lenei fesoasoani e tatau ona fa'ao'o i le DOI ia Me 31, 2018.

 

Faitau aiaiga o lea alagatupe ma agava'a e te talosaga ai i le tuatusi tafa'ilagi: Grants.gov i le Catalog of Federal Dometic Assitance of CFDA Number 15.875.

Comment Here