Tala I Vaifanua

TATALA OFISA TALOSAGA - FESOASOANI A LE FEMA

 

O le aso Gafua na tatala ai le nofoaga a le FEMA, le DRC, e faia ai talosaga a i latou na afaina i le ‘afa o Gita. O lea nofoaga i le Fale Ta'alo tele i Pago Pago lea e fa'amautu i ai le Matagaluega o Talavou ma Tamaita'i [DYWA].

 

I lea nofoaga ua faatulaga uma ai le vaega a le tatou Malo fa'atasi ma le FEMA aua, o le tausaga fo'i lenei, ua i ai le vaega o le fa'atupega e tapena mai e le tatou malo, ae o le tele e fa'atupeina lea e le FEMA po'o le malo tele.

 

Ua fa'atulaga le DRC e tatala i le aso Gafua se'ia o'o i le aso To'ona'i, e tapunia i le aso Sa. E afua mai le taeao i le itula e 8:00 se'ia o'o i le itula e 4:00 i le afiafi.

 

Ua fa'alauiloa mai fo'i, ina ia susu atu lava le tagata ua avea ma ulu o le aiga e faia lenei talosaga.

 

O le aso Gafua ma le aso Lua sa fa’atulaga mo i latou e umia numera mai Ottoville. E le’i mautu mai i le aso ananafi afioaga mo le aso lenei.

 

Mo isi fo'i nofoaga ma latou numera e fa'asolo atu i aso ta'itasi mo tagata e susu ane mo fa'atalanoaga, o le a fa'ailoa atu lava e le Teritori ma le FEMA e ala fa'asalalauga nei.

 

O pepa e ao ina taua'aoina e tagata ma Aiga talosaga: Numera Social Security; Tuatusi o le fale ma meatotino  o fa'aleagaina; Ata ma nisi fa'amaumauga o mea ua fa'aleagaina; Fa'amaoniga o Inisiua  pe afai o inisiua nei meatotino; Ia Iloa lelei le numera Telefoni; Tuatusi e maua ai meli a le aiga; Numera o Teugatupe ma Numera Feso'ota'iga Tau Pisinisi a Faletupe o lo'o i ai teugatupe a le ua talosaga.

 

O i latou uma e i ai mana'oga fa'apitoa ma e faigata ona femaliua'i pe o'o mai i le tatou Ofisa ua fa'atulaga mo talosaga nei, ae o i latou o Ulu o aiga, e mafai ona e talanoa mai i le Laina Telefoni: [684] 633-9017.  E mafai ona o'o atu nisi o le aufaigaluega e fa'atumu mai lau talosaga i lou fale, ae le tau o mai i le DRC e fa'atumu ai tou talosaga.

 

E ao fo'i ina malamalama tagata uma lava, o lenei fesoasoani e le fa'aitu'au ona fa'ao'oina mo oe. E le o faia ma se fa'aituau tau ituaiga tagata, lanu, po'o lou matua, e aofia ai fo'i nisi fa'aituau tau talitonuga, po'o fea e te afio mai ai, po'o i ai ni mana'oga fa'apitoa, pe vaivai fo'i lau fa'aperetania, vaivai le tamaoaiga po'o nisi lava faiga fa'atui'ese, e le a'afia i lenei tautua.

 

O le auga uma o le fesoasoani a le FEMA e le fa'aitu'au, ae fesoasoani i tagata uma sa a'afia, ma o i latou fo'i o asiasi atu ina ia fa'ao'o atu se fesaosoani ua e agava'a ai, ona o au mea totino ua fa'aleagaina, o le mautinoa lea ua galulue fa'atasi i tatou uma i lenei atunu'u e toe fa'atula'i mai mea ua fa'aleagaina, fa'aleleia atili lau taumafaiga ina ia toe fausia ma fa'atumau atili le malosi o tatou aiga ta'itasi, ina ia mautu fo'i le fausaga o le tatou atunu'u, ma ia malosi e fa'ataututu ai fa'afitauli e toe lutia ai i le lumana'i.

 

NONOGATUPE A LE SMALL BUSINESS ADMINISTRATION

 

Ua fa'alauiloa atu i pisinisi i le atunu’u sa afaina i le ‘afa o Gita o lo’o i ai polokalama o nonogatupe i pisinisi ma i latou e i ai fale sa afaina i le ‘afa o Gita mai le US Small Business Administration (SBA).

 

O lenei ofisa o le malo tele, e i ai a latou polokalama fesoasoani i pisinisi ma tagata tua sa afaina i se ‘afa. Ma o lo’o galulue fa’atasi le SBA ma le FEMA e fesoasoani i le atunu’u.

 

Ua fa'avasega mai e $2miliona e mafai ona o'o i ai le nogatupe a le pisinisi e tasi pe afai e tetele a'afiaga i lea ‘afa. Ua fa'ailoa mai fo'i e mo aiga e agava'a i nogatupe ua fa'avasega le $200,000 e mafai ona o'o i ai lau nogatupe lea e toe fa'aleleia ai lou fale nofo ma mea totino e toe fausia lelei.

 

O le initelesi po'o pasene fa'asili o nogatupe e na'o le 3.58% mo pisinisi ae 2.5% mo aiga ta'itasi. O fa'apotopotoga e le o ni fa'alapotopotoga a le Malo e na'o le 1.183% i latou nogatupe.

 

41 SUI FOU NHS SAMOANA HIGH FA'AULU MATI 8, 2018

 

I le sosaiete a le fanau a'oga e ausia togi maualuluga i mataupu o latou tau'avea i le a'oga maualuga a Samoana, ua ausia ai e le to'a 41 o i latou o vasega 10 togi e ulufale ai i le National Honor Society a le latou a'oga.

 

Na faia fo'i le sauniga fa'apitoa mo le fa'aulufaleina o lea to'a 42 i le NHS i le afiafi aso Faraile ua te’a i le Gov. Rex Lee Auditorium ma sa fa'atasia i ai le to'atele o latou aiga ae maise o matua ina ia patipatia fo'i lea taumafaiga a lenei vasega o le fanau a'oga.

 

O le vaega o sui tuai a le NHS e to'a 61 ma ua i ai nei le tu'ufa'atasiga e 102 i latou ua i ai fa'atasi i lenei tausaga. O i latou na auai mo le ta'ita'iga o le sauniga mamalu na o le tama'itai Peresetene Karlinna  Sanchez, le failautusi Atauloma Sipeli'i, le Teutupe  o Siafiafi Puni ma le sui lautele o AJ Benjamin Liaga sa tofu sao i ai.

 

O i latou o sui fou na fa'aulu e aofia ai: Annievictoria Aveina, Faitoaga Olo, Adriana Puni, Graze Lepau, Antonio Pule II, Luis Lafaele, Eddieliz Husseini, Tweety Ropati, Faafetai Lauti, Vineta Tali, Anthony Feala, Margaret West, Dionysis Nua, Paulina Ioane, Faiga Mavaega, Perosi Vaofanua, Falenaoti Isadora Mageo, Sabrina Uti, Jarom Fuimaono, Salaina Tupa, Joanna Dela Cruz, Tausisi’i Tipi, Johnny Kaleopa, Valomanaia Elizarraraz, Lessei Perelini, Vanessa Covarrabias, Lyca Buenafe, Abcde Tupa’i, Mekiraeanna Taumoepeau, Abigail Foma’i, MJ Matulino, Anjaneane Fruean, Pupulaolela Petelo, Charity Tufele, Matalena Hunt, Daniel McMoore, Michael Tuisuga, Emmanuel Fuimaono, Nikolao Uti, Eseta Enesi, Ripine Mata’u, Elorah Tusiofo, Samantha Tupuola, Erin Jessop, Sierra Fata, Faith Mauga, Susanna Lutali, Fuamatagi Sea, Talatonu Joshua Lutu, Hadassah Young, Tao Leota, Jeff Daniel Fa’alogo, Tevesi Lomu, Julieannie Mata’utia, Tooa V. Fa’alogo, Kobe Lefiti, Tuiolo Aumua, Latasha Anoa’I, Viali Seali’i, Luafata Voigt ma Yasminna Sanchez.

 

Matagofie fo'i le upu apoapoa'i sa vaganaina e lana Auauna a le Atua, Rev. Iasepi Ulu o le EFKAS i Fagatogo, ina ia ola finau le fanau ia a'oa'oina i agava'a eseese e mafai ai ona fesoasoani i nisi, ma tausia lelei matua ae maise ia fai se aoga i le galuega a le Atua, na ia mua'i alofa mai.

Comment Here