Tala I Vaifanua


ata: foa'i]

POLOKALAMA FANAU MO LE ESETA - TAUSALA LALALEI PASEFIKA

 

Ua i ai se polokalama fa'apitoa ua tapena i ai le Tausala Lalelei o le Pasefika, o le tausala lalelei fo'i lea o Amerika Samoa, Matau'aina G. To'omalatai mo le fanauiti a le atunuu i le vaitau o le Eseta i lenei tausaga.

 

O lea fa'amoemoe e fa'ataunuuina i le Su’igaula o le Atuvasa i Utulei ia Mati 31.

 

“O le polokalama lava e masani ona faia mo fanau i lea aso i so'o se mea o Amerika atoa, o le sailiga o fuamoa. O le ala fo'i lea o le manatu ai i lea fo'i polokalama e fa'afiafia le fanau ma fai se latou fa'amalositino i ni ta'aloga i lea malae o le Atuvasa, fa'atasi ai ma se ta'elega fa'atasi ma latou aiga,” o se tala mai lea a Matauaina mo le silafia e le atunu'u.

 

E le gata i lea, o le aso ananafi na fa'atasi atu ai le Tausala Lalelei o le Pasefika i le Tafuna Elementary, mo lana polokalama fesoasoani e faitau tusi i le fanau.

 

O lea taumafaiga ina ia una'ia ai matua ma fanau e faitau tusi fa'atasi, ae maise o le fa'aosofia lea o le lagona fia faitau tusi i le fanau i taimi uma o latou olaga, nai lo le matamata televise i taimi uma ae le tele se aoa'iga lelei e maua ai e o latou olaga a'oa'oina.

 

O nisi na o tautua o lo'o fa'atautaia pea e Matauaina, ina ia fesoasoani fo'i i le fanau ia naunau e faitau tusi, ma e mafai lava ona vala'au ane e vala'aulia o ia mai so'o se fa'alapotopotoga, a'oga po'o vaega fo'i o le tatou Malo.

 

I le vaiaso atoa sa faia ai le polokalama e fa'ataua ai le fanau fa'apitoa i totonu o Tafuna Elementary, peita'i o le susuga le faia'oga KJ Ameperosa o le vasega lima, e finau lava o ia mo avanoa lelei e valaa'ulia ai nisi o tama'ita'i lauiloa i le atunu'u, ina ia latou o'o atu i potu aoga ma faitau ia i latou ni tusi.

 

"O le taumafaiga faifai pea, aua o lo'o matauina lava le vaivai o le faitau ma le malamalama lelei o le fanau i le gagana Peretania po'o le Igilisi. O lea e finau pea i ai aua e fai lava le galuega a'oa'o ma le fa’asino a i matou, ae fa'amoemoe e ulufia i le agaga o le tamaititi ina ia to'aga e faitau tusi, ia malamalama lelei i le tala o lo'o ua tusia, ma faitauina e i latou,” o a Ameperosa lea.

 

Ua fa'ailoa fo'i na vala'auina fo'i isi faia'oga o le tausaga a le tatou malo, ina ia faitau tusi i nisi o potu a'oga. Ma ua iloga ai, "E le na'o A'u" le auga o le taumafaiga i lenei tausaga mo le fa'ailo a le Fanau Fa'apitoa ma le SPEd i lea Laumua.

 

Na amata mai lenei fa'ailo i le aso Gafua ae fa'amae'a i le aso ma ua i ai fo'i le latou polokalama fa'atautaia mo le toe aso. Ua fa'ailoa mai le agaga fiafia o le fanau, ina ua o'o atu le Tausala Lalelei o le Pasefika ma Amerika Samoa fo'i, i le latou lotoa ma le potu a'oga, ina ia faitau ia i latou se tusi.

 

Ua fa'ailoa i se ata tifaga pu'upu'u lava sa pu'eina a'o faia le polokalama i le aso ananafi. Na auai fa'atasi atu fo'i ma le tama'ita'i Peresetene o le Miss American Samoa Inc (MASI), Fou Imo i lea vala'aulia.

 

FOA'I AIGA PAGATIA IA GITA - CHARITY & HOPE MINISTRIES

 

Ua mae'a ona tatala faitoto'a o le sapalai o lavalava o so'o se ituaiga a le Charity & Hope Ministries i le latou nofoaga i Tula i le amataga o lenei masina. Ua maua fo'i le tala fiafia mai le tama'ita'i sui peresetene i lea fa'alapotopotoga fesoasoani, o le a tatalaina fo'i i le tatou itu i sisifo se latou fale'ie e mafai fo'i ona gasolo ane i ai le mamalu o tatou aiga i sisifo o le tatou motu.

 

Ua fa'ailoa le agaga fa'afetai tele o le Charity & Hope Ministries, ona o le foa'i tele na fa'ao'o atu e le Kamupani Va'a ale Matsons, lea na mafai ona maua ai e i latou nei oloa tau lavalava mea mea'ai sa taua'aoina. O le susuga le ali'i Pule o le Matsons Victor Tuilaepa Angogo ma le latou sui, Lanu Pen, na o'o atu e taua'ao le foa'i.

 

E le gata i lea o le tele o foa'i o mea'ai ma isi fo'i oloa sa fa'ao'o ane e le "Estate mo Lefagaoali'i Soliai Beaver" ma ua fuafua ai o le fa'ai'uga o lenei fo'i masina o le a fa'atuina ai le fale'ie e o ane fo'i aiga mafatia i le ‘afa o Gita, fa'atasi ai ma nisi aiga o lo'o mana'omia le fesoasoani i le tatou atunu'u, e avatu ai ni latou lavalava ma mea'ai tu'u apa.

 

I le mamalu sa maua latou fa'amanuiaga mai le tufatufaga muamua, ua latou fa'aalia fo'i, "Ua aoga lava le foa'i, fa'afetai i nei Kamupani Va'a a le Matsons ma le Tina matua fo'i ua malolo ona o le agaga alofa i le pagatia sa lutia ai le to'atele o aiga o le atunu'u na matua fa'aleagaina o latou fale nofo i le asiosio na sei mavae atu nei. O le agaga fa'afetai e ao lava ina fa'aleo, aua ua fa'aaogaina nei oloa ma le fa'afetai."

 

GITA - FA'ALEAGA NOFOAGA MO PE'A MA MANUFELELEI

 

Ua le na'o tagata ua a'afia i le ‘afa o Gita, ae ua matua iloga ona feoa'i mai ai manulele ma pe'a fo'i i lalo i fa'ato'aga a tagata, ma ua atili ai ona vave 'aina fa'i, esi ma fua o la'au fua fuata, aua ua oge manu felelei i a latou mea'ai.

 

Ona ua luluina ese lau ma fuga o la'au sa avea ma mea taumafa a mani felelei, o lea ua aga'i mai uma i lalo nei meaola i fa'ato'aga a tagata, sa le masani ona va'aia ai.

 

O nei meaola uma i le laueleele, ua latou mana'omia se tatou fesoasoani pe afai o le a fa'atumauina le tuai ona toe fuga o la'au ma fuata mai e tusa o taimi e masani ai.

 

Ua fautuaina mai ai le mamalu lautele o le atunu'u, ia alofagia fa'apalepale i nai meaola. O i latou fo'i e le so'ona fiafia e fa'amasani ma tagata, peita'i ua le toe segisegi i latou, ae va'aia ua lalata mai ona o le sailiga o mea'ai.

 

"O le taimi nei ua fafaga fa'apitoa lava a'u moa i le taeao ma le afiafi fa'atasi ma le anoanoa'i o Manulele ituaiga o le Mina. Ua lalata ua le toe segisegi ma ua pei lava ua to'atele ai le lafu moa. Ua iloga mai ua leai ni fuga o la'au i le vaomatua sa masani ona latou 'aina,” o se tala ata lea a le tina e usupo lava e fafaga ana moa a'o le'i alu e faigaluega.

 

"O pe'a fo'i latou ua 'aina fua moto o esi ma fa'i, ua le toe fefefe ma sosola pe a faalogoina ta'avale ma tagata feoa'i, ua tautau ai lava i le ao, ae o le masani o pe'a e na'o le afiafi po ma le taeao segisegi ona toe fo'i lea i ofaga pogisa e momoe ai."

Comment Here