Ads by Google Ads by Google

TALA I VAIFANUA

TIMOTHY DUNSTAN O LE KOLUSE MUMU

 

O se tasi o atali'i talavou sa a'oa'oina, fa'au'u i a'oga maualuluga, ma ola a'e i Amerika Samoa nei, ua talosaga ma talia e le Koluse Mumu San Diego e malaga mai e fesoasoani ia Amerika Samoa i lenei galuega alofa o lo'o latou foa'i mai ai mo tatou tagatanu'u.

 

O lea ali'i talavou o Timothy Dunstan, ma o lo'o a'oga o ia i Chaminade University, peita'i o lo'i ia te ia le avanoa fa'apitoa a le Koluse Mumu e mafai ai ona ia malaga e volunitia i galuega alofa fa'apenei e pagatia ai soo se setete po'o malo o le lalolagi.

 

O lana tala mai, aso Lulu, lua vaiaso talu ai, na ia va'aia ai le emeli i lana komipiuta ua fa'asalalau fa'ala'ua'itele atu ai ni avanoa e mafai ona talosaga atu ai i latou o lo'o volenitia pe afai e fia sau ai i Amerika Samoa. Na muamua vala'au o ia i le Ofisa Ulu i San Diego a le Koluse Mumu pe mafai ona agava'a ai o ia, aua e le o auai Hawaii i le itumalo lea e i lalo o San Diego. Na talia mai lana vala'au, ona toe vala'au loa lea i ona matua, e fa'ailoa i ai e tauau e maua sona avanoa e toe fo'i mai ai i lona atunu'u.

 

"Ia te a'u e iloga lo'u avea ma tagata Samoa aua sa amata mai ai a'u a'oga i le vasega 2 i le South Pacific Academy, ona si'itia lea fa'auma a'u a'oga i le St Theresa i Leone, ma soso'o ai lava ina a'oga i le Fa'asao Marist High i Lepuapua. O lo'u nu'u lenei, na'o na ola a'e lava i Christchurc i NZ, ae amata le olaga talavou atoa iinei." O le tala ata lea a le ali'i o Timothy.

 

E le'i toe faia sana vala'au i ona matua, sa manatu e o'o mai iinei ae fa'ato'a vala'au atu ai i ona matua o ia lea ua iinei, peita'i, e o'o ane i le Malae Va'alele, ua tutu mai ai si ona tama e fa'atofa ia te ia, fa'atasi ai ma le sim card o lana telefonu Blue Sky iinei a'o a'oga, sa teu mau lava e si ona tina, e toe sau toe fa'aola iinei e fa'aaoga, 258-1213.

 

O lo'o to'atele uo mamae a Timothy iinei, aua na'o na savali atu lava o le tusitala ia te ia, ae fai mai, "O lea ou te iloa lelei lava oe, na e pu'ea matou Samoan Day, matou ta'aloga i le Baseball, ma le tele o isi matou fiafia sa faia i le matou a'oga i le Career Day. E lelei ia o lau pu'eata."

 

E fa'aoso fiafia aua o lea na fesiligia mo le tausaga na fa'au'u ai mai le Fa'asap Malisi ae fa'ailoa mai, "Vasega fa'au'u 2017, ae ete le'i alu atu la i le matou fa'au'uga."

 

E le o misi fa'amaumauga a le la'ititi, peita'i o le galuega a si ona tama na mafua ai ona o'o mai Timothy i Amerika Samoa ma ua avea ai o se tasi o lupe fa'alele a le tatou malo i Iunivesite i fafo mo a latou a'oa'oga.

 

"Na talosaga mai lo'u tama i le "Talofa Systems" lea e gaosia le atigi apa a le Star Kist i Satala, ma o iina na mafua ai ona si'itia uma mai ai ma si o'u tina ma lo'u tuafafine matou te nonofo fa'atasi ai iinei, ma fa'aa'o'oga ai ma ma'ua iinei." O se tala lea a Timothy.

 

I ana a'oa'oga o lo'o tausaili lona fa'ailoga i le Psychology lea e manatu o ia e avea sona taimi i le Militeri ina ia mafai ona malamalama lelei i o'otiaga fa'afitafita e afua ai ona faigata gasegase tau le mafaufau ma le fa'ali'i e o'o i ai pe a toe taliu mai i latou ua mae'a le tautua. O lea mataupu e fa'aautu i le foma'i o le mafaufau.

 

SUIGA TOFI LAULAUATOFI KOMITI FA'AFOE A LE TOBACCO/DIABETES COALITION:

 

O le aso Tofi talu ai sa faia ai le fonotaga mo le fa'amoemoe e suia ai tofiga o le laulauatofi a le Komiti Fa'afoe o le Tobacco/Diabetes Coalition i Amerika Samoa, fa'atasi ai ma isi mataupu ogaoga o suiga o tulafono tamau o le Fa'asa ona toe ulaula i nofoaga faitele le mamalu o le atunu'u o lo'o tagofia le sikaleti.

 

O i latou ua pasia lelei ma o le a tutula'i mai lenei tausaga, ua toe tofia ai nei le tofiga Peresetene ma o le Ta'ita'ifono fo'i o le laulauatofi o le susuga le Patele Vaiula Iulio, o le Sui Peresetene ma o le Sui Ta'ita'ifono fo'i o le susuga le Faipule Meauta Mageo ma le Failautusi o le Teutupe fo'i lea ua tula'i mai ai nei le susuga Clemence Crichton.

 

Ina ua mae'a ona fa'amautu a latou tofiga mo lenei tausaga e galulue ai, ona fa'aauau lea e le laulau tuai ona fa'atautaia o le fonotaga i le latou lisi o minute sa fa'avasega e talanoaina i lea aso.

 

O le toe tepa i suiga ua mae'a tamau e tatau ona fa'aofi i le tulafono ua mae'a pasia e taofia ai le ulaula tapa'a i nofoaga faitele.

 

O lea itu o le lipoti sa tapena mai e le ali'i Loia o lo'o avea ma sui mamalu o le Komiti Fa'afoe mo le Tobacco/Diabetes Coalition, Jedidiah A Bigelow, o ia fo'i o le Loia mo le vaega a le Consumer i totonu o le tatou malo, lea e gafa ma le va'aiga o ituaiga oloa eseese o fa'atauina mai i le atunu'u pe talafeagai pe le tatau ona fa'aofi mai i le atunu'u.

 

ULUA'I KOLISI E FA'ATAUTAIA FA'A-ELETORONISI I LE ATUVASA:

 

Ina ua mae'a ona pulea nei e le SCOPA, Asosi a Tama ma Teine Tuai o le Kolisi o Samoa, le Kolisi o Samoa i Vaivase, ua ese le suiga lea ua la'asia e i latou ina ia fa'atautaia ai a'oa'oga uma i totonu o Samoa. "O lo ua mae'a tapena mo le fa'amoemoe e amatalia a'oa'oga ia Iuni 2018, ua faia fa'aeletoronisi uma mea uma. Ma o se fuafuaga ua leva ona faupo fauao, ina ia matua'i avatu i le fanau aoga, tapenaga fa'aonaponei e "Saili ai le Atamai e Tautua Samoa." O le latou manulauti lea e tau'ave a'o e a'otau ai i le Kolisi o Samoa. " O se tala lea a Lealailepule Rimoni Afiafi.

 

Ina ua toina le a'oga e tau'avea lona pulega e le Samoa College OLd Pupil Association [SCOPA] o le latou mana'oga tupito lea na afuafua e tatau ona si'itia iai a'oaoga a le fanau i lea kolisi pito i maualuga i Samoa. Na amata atu i latou ua i ai mea ua tau amatalia o lea mana'oga, ae toe taga'i toto'a atu i ai, e mo'omia le $150,000. e mafai ai ona fa'amae'a lelei lea manaoga ma amata ai loa a'oa'oga i ala fa'aeletoronisi fa'aonaponei.

 

"Ina ia ave'ese le tulaga o le sioki pea o meaa'oga e fa'aaoga e le fanau, ua tatau loa ona matua tu'u uma i ai mea tau feso'ota'iga tau initeneti ma ona sosia ina ia mafai e le fanau ona fa'aaoga mo a latou sailiga ma suesuega uma."

 

"E o'o lava fo'i i le to'agaogao o faia'oga, o le a gafatia fo'i ona faia a'oa'oga i lea faiga ma fa'aitiitia ai le faitau aofai o faia'oga e mo'omia i potu a'oga ta'itasi."

 

"O lenei faiga o le a matua tatala le avanoa i le fanau i so'o se ituaiga o suesuega, ua maua uma lava e i latou i luga o feso'ota'iga fa'ainiteneti." O se tala lea a Lealailepule.

 

O le fa'amatalaga a le ali'i pule a'oga, sa ia fa'ailoa ai, o lo'o galulue vavalalata i latou ma le Emepasa o Saina ma lona ofisa i lenei poloketi.

 

Ina ua asia e le ali'i Emepasa o Saina le Kolisi o Samoa, le susuga Wang Xuefeng, sa ia fa'ailoa ane i le pulega, "O le a'oga sa'o lava lea o lo ua ia mana'o e fa'aulufale tonu i ai lenei ituaiga o a'oa'oga, ua matutua ma o le a soloa'i atu i fafo ae ua mae'a masani i le fa'aaogaina o nei ituaiga o mea faigaluega e sailia ai le atamai lautele. Ua a'oa'oina lelei fo'i i latou i le fa'aaogaina o nei mea faigaluega."

 

O le Emepasa lenei ma lona Ofisa, e tele na'ua ana fesoasoani e fa'ao'o ane i le Kolisi o Samoa e ala i a latou mea faigaluega i tulaga o fa'amaumauga ma masini e fa'aaogaina ai, ina ia fa'aaogaina e le fanau a'oga i suesuega.