Ads by Google Ads by Google

Tala I Vaifanua

ASO FA'APITOA MO TAMA'ITA'I - TOE FAFAGU TIUTE FAI

 

I Amerika Samoa e le o fa'ailoga fa'alaua'itele ai le Aso Fa'apitoa mo Tama'ita'i o i le atunu’u, peita'i o le fa'asalalauga faalaua'itele a le sui o Amerika Samoa i le Konekersi, Aumua Amata, o tu'uina mai ai se fa'amalo, o le fa'afetai ae maise o le tima'i mo le lumana'i i le vasega o tama'ita'i uma o le atunu'u, afua mai tina matutua, se'ia o'o i tama'ita'i Samoa o le tupulaga talavou o lo'o fa'amoemoe i matua i lo latou tausiga, va'ava'aiga ma le a'oa'iga, "Ina ia tula'i mai, fai lau vaega, fa'amoemoe i le Atua e alofagia ou faiva e fa'asaga i ai i lea aso ma lea aso, ma ia finau mo so tatou 'ai manuia mai le Atua i le lumana'i o tatou galuega uma o fa'atino."

 

Fa'afetai lea i le sao o le tatou tina i le foemua o Upufaiomalo, aua e moni o le fa'atina o le atunu'u o lo'o faia le faiva o le Fautua i le fa'auluuluga o le tatou Malo, Cynthia Malala Moliga, fa'afetai mo lou sao ma ou tiute e faia pea, aua o iina e mafai ona fetu'una'i ai e le fa'aao o le tatou faigamalo, ana fa'ai'uga. Ioe o lau fautua lava!

 

Tina uma fo'i o fai le faiva o le itu fa'aleagaga o le atunu'u, Faletua o Fa'afeagaiga uma i le atunu'u i so'o se fata faitaulaga, fa'afetai i latou fautua i Tama o le atunu'u, lo outou faiva o le nono manu i le Atua i se manuia mo le tatou Malo ma ona tagata lautele, ae maise o la outou a'oa'o o le fanau ia malolosi i le amiotonu a le Atua ma o latou ola fa'aleagaga, fa'afetai i o outou faiva. E tauia e le Atua galuega uma e faia i lona suafa.

 

Tina faigaluega ma tausaili manuia o le tino mo latou aiga, tina nofo ma tausia ia mautu le fatuaiga tausi i o tatou aiga uma, tina faia'oga ma foma'i o outou e gase atu i ai malolo i tulaga o le soifua maloloina lelei o tatou tagata, fa'afetai le fai o galuega e tau i le fatu o lo tatou olaola lelei i aso ta'itasi. Fa'afetai mo la outou pito la'au tausi ma fa'afailele i le soifua ma'ale'ale o le atunu'u.

 

Tina o lo'o i ai ni mana'oga fa'apitoa i o outou aiga, e le galo outou i talotaloga e masi'i i le Atua mo se manuia fa'asoa mo outou, aua ne'i galo o lo'o silasila le Atua ia i tatou uma, ae aua lava ne'i outou si'ilima i fa'afitauli, tatalo e le vale lou taui, a e tumau i le talitonu ma le fa'atuatua, e maua ma sili atu ou manuia.

 

"O oe o se ma'ataua i fofoga o lou Atua, e i ai lou sao i le tatou nei soifuaga fa'atasi ma oe, e tele mea lelei e maua i lo tatou taumafai fa'atasi e ola i le amiotonu, ma taumafai le mea sili ua gafatia ona faia i lea aso ma lea aso. O oe o le pele a ou matua!"

 

Outou tina o tausi fanau, ia outou iloa, o la tatou manulauti ma le tofi moni lea mai le Atua. E fa'afo'i atu e le fanau ia te oe manuia uma e te le o sailia, o ala na o manuia o natia mai o tatou fofoga i le taimi nei.

 

TUSI FA'ATATAU I FANUA I AMERIKA SAMOA

 

O se tusi ua fa'atauina nei i luga o laina o feso'ota'iga a le amazon.com ma ua fa'ailoa mai e nisi, ua talafeagai lava lenei tusi "The Pacific Insular Case of American Samoa" ma ituaiga mataupu o lo'o ua lavelave nei i mafaufau o le to'atele o aiga, ona o fanua e pulea e matai,  ae ua fa'asolo ina mafai ona fa'atauina ma avea ma eleele tumaoti mo nisi tagata taito'atasi ma isi fo'i o tagata fai mai i totonu o le atunu'u.

 

O le tama'ita'i na tusia lenei tusi o Dr Line-Noue Memea Kruse, o se tasi sa avea ma Teriritorial Planner a le Matagaluega o Fefa'ataua'iga a le malo, ona toe avea lea ma Faia'oga o le National University of Samoa i Apia, Samoa.

 

I lea tusi o lo'o fa'amatala ai e le tusitala, le matua ese lava o le feagaiga a Amerika lea sa aiaia mo Ameika Samoa lava ia. O lea le teritori e ese mai lona lava fa'atulagaga nai lo isi ona teritori uma. O le igoa ua tu'uina aloa'ia mai e "Unincorporated" e le o fa'avasegaina fa'apitoa. E afua lea ituaiga fa'atulagaga ona o eleele mo latou aiaiga o i ai.

 

O lo'o ua aofia ai fo'i ma se tala'aga o mea uma na tutupu i le vaitau o le senituri 19 ma le senituri 20 ma pulega na suia i ai le soifua o tatou tagata.

 

O lenei tusi sa lomia lea i Hawaii o lo'o ua faia'oga ai nei le Tusitala ma ua avea ma se sosia lelei e mafai ona ia fa'atautaia ai ana sailiga mautu i ala o tulafono aiaia ai eleele mai na vaitau e o'o mai i le vaitaimi nei.

 

Ua fa'ailoa mai ai omiga o lagona o aiga ma iuga o nisi o fa'amasinoga tau fanua e a'afia tele ai fanua o lo'o pulea i pulega fa'amatai mo aiga lautele, ma le taumafaiga fo'i e fa'atau motu ina ua lava le tupe i a'ao o nisi o tagata o aiga, po'o tagata fai mai e manana'o i ni fanua e fa'atumau ai i Amerika Samoa.

 

Ua fa'ailoa e se tasi fo'i o tina iloga o Samoa, Maria Kerslake, o lenei tusi ua mafai ona fa'ailo ai nisi o mea o lo'o lavelave i fa'aiuga o fanua i totonu o Samoa na lua. Ae maise i fanua sa avea ma fanua o aiga e pulea fa'amatai, ae toe emo ane le ata ua mae'a fa'atau motu e nisi, ae maise o aia tatau a aiga i o latou fanua nei ua fa'atau ese atu fa'apea.

 

Na mafai fo'i ona fa'ailoa se manatu tusitusia o le afioga le Faipule o Amerika Samoa i le Konekeresi, Aumua Amata, e tusa o lenei tusi, ma "E tatau ona matua fa'afetaia le tama'ita'i tusitala o lenei galuega mae'ae'a sa ia faia mo lana tusi. O lona va'ai toto'a i le tulaga o le fa'amatai i le aga'i atu ina fetaia'i ma lu'iga i nei vaitau ma lona sousou.”

 

STALLONE NUA - FA'AFIAFIA TA'ALOGA A LE MANU SAMOA

 

I ai le to'atele na maimoaina le ta'aloga faitaulia a le Manu Samoa i le USA Sevens na faia i le fa'aiuga o le vaiaso na te'a, ae na o'o i le taimi ua luluti le fiafia o Amerika i le taumafaiga a le latou 'au, lea fo'i ua toe manumalo, ae ua matua fa'anoanoa le itu sa alaalata'i uma ai Samoa mai i ma o i Amerika atoa, ona e le o tula'i mai le Manu Samoa i lona malosi sa masani ai.

 

Tu a'e loa i luga le tama tino lelei, matua fai'ava lava, ma tatala le ofu tino, ae fa'asausau, ma amata ona fai lana fa'aluma. Na i'u ina to'atele na'ua tagata uma na maimoa na auai i taga a le fa'aluma lea na faia.

 

Pepese ma fa'alue i le fatuga sa usuina to'atele ma ua matagofie ai lagona. O se tala na fa'amatala mai e fa'apea, "E le o le 'au ta'a'alo ma le taumafaiga, a'o le 'au maimoa ma le agaga fa'asoa atu i le au ta'a'alo ina ia fa'amalosi ma tausinio pea se'ia mae'a le tausinioga."

 

O le tala mai o le alo o Amerika Samoa lea sa tutula'i, "Shaun Nua”, mai Manu’a. Ma, o le segaula o lo'o alaala fo'i i fafo ma tausinio ai, lea ua fa'asoa atu le malosi i ona uso i le Manu Samoa e ala i lana siva fa'aluma.