Ads by Google Ads by Google

Tala I Vaifanua

"SOUND OF MUSIC" FAATINO FANAU AOGA T.H.S

 

O lo’o tu'ufa'atasia e fanau a'oga a Tafuna High School se fa'atinoga o le ata tifaga "Sound of Music" e avea ma se tasi o poloketi fa'ataoto a le English Department a le aoga maualuga.

 

“O le agaga tonu o lenei fa'amoemoe, ia toe fa'atepa matua ma aiga o le fanau aoga i se fa'atinoga a le fanau, o se tala'aga fa'aleaiga i vaitau o le vevesi ma le le mautonu, lea e agaga i ai lea ata o le Sound of Music. O se ata ua leva ma ua masani ai matua, ae matua matagofie fo'i lona aoaoga mo fanau talavou,” o se tala lea a se tasi o le fanau a'oga sa mafai ona molimauina le latou fa'amoemoe ma le mafuaga ua faia ai.

 

O i latou nei e fa'atinoa lenei tala, o lo'o aofia uma ai le fanau a'oga e tau'avea le fa'aperetania po'o le Igilisi i Tafuna High.

 

O lenei fa'atinoga ua fa’atulaga Aso Tofi, Mati 8, 2018 i le itula e 6:30 i le afiafi ma e i ai le ulufale mo i latou uma e fia maimoaina lea taumafaiga.

 

I le fanau a'oga, sa to'atele nisi na fa'ailoa le maofa i le fa'atinoga, ma ua fa'aalia e i latou, "O se taumafaiga ese lenei ua iloga ona fa'atino e le fanau a'oga fa'atasi ai ma nisi o le aufaigaluega i le a'oga a Tafuna, e fia maimoa lava ae faia uma lavalava ma teuga mo le po iloga o le fa'amoemoe lenei."

 

O se tasi o ali'i fa'atonu o lea fa'atinoga o Joey Zodiacal, ma ia saunoa, "O tamaiti a'oga o lo'o auai i le fa'atinoga o le matua lelei lava, fa'alogo ma usita'i i le fa'atinoga ma lana e fai. O se mea lelei ua iloga mai, e agavaa tele fanau a Samoa i le fa'atinoga o ata tifaga e pei ona maimoaina fo'i pe a faia tauvaga speech festival a a'oga maualuluga uma i le atunu'u i lea tausaga ma lea tausaga.”

 

O le aotelega o fanau ma nisi ua fesoasoani i le fa'atinoga lenei e 65 i latou, ma e nao le tasi lava le taimi e fa'aalia ai fa'alauaitele lea fa’amoemoe i le Faleta'alo o Tafuna High School.

 

TAOFIA SAMOA FA'ATAU MAI LE TALO I AMERIKA SAMOA

 

Ua fa'ailoa e le Fa'atonu o Faato'aga, Filifa'atali Mike Fuiava, i le taimi nei ua fa'asa le tumau mai e Samoa ona toe auina mai le talo i Amerika Samoa, e le o fa'ailoa patino pe 'aisea ua faia ai lea fa'aiuga.

 

"O aiaiga ina ia o'o atu se sui o le tatou nei matagaluega i Samoa e asia fa'ato'aga a i latou o le a sapalaia mai le talo iinei, o se fa'aiuga na faia a'o le'i oo ina taofia le pemita o le talo mai le toe auina mai i Samoa e le tatou nei matagaluega, peita'i, o lea ua toe taofia mai e Samoa, o lona uiga, o le a i ai se isi toe talanoaga e faia i lo matou va ma le Matagaluega o Faatoaga i Samoa ina ia iloa se toe aiaiga e suia, fa'ato'a toe maua ai se tonu i lea mataupu,” o se tala lea a Filifa’atali.

 

I le malaga mai a le Lady Naomi o le vaiaso na te'a, e matua leai lava se talo na auina mai ai i ana uta, peita'i o tagata fo'i sa fia maua le pemita e auina mai ai latou uta talo ma talo mo fa'alavelave o latou aiga iinei, na te'ena uma e le Matagaluega o Fa'ato'aga, ma le latou fa'amatalaga, "Ua taofia le toe auina mai o se talo mai Samoa iinei."

 

Ona o tulaga o fa'ama'i o a'afia ai fa'ato'aga fo'i i na vaitau ua tuana'i, sa puipui fo'i le tatou matagaluega mai le o'o mai i Amerika Samoa, lea sa i ai se fa'ai'uga e taofia le aumaia o talo mai Samoa.

 

I le tatou maketi fo'i i Fagatogo ma isi lea e fa'atutu solo i le alatele, o lo'o va'aia lava le i ai pea o talo o fa'atau atu ai i le mamalu o le atunu'u, peita'i, o le fa'i lea ua iloga ona afaina i le afa na tuana'i atu nei.

 

Taua e Filifa'atali, "E le'i o'o ina a'afia tele le fofoga taumafa o le atunu'u ona o le afa, peita'i, e i ai se taimi e le o toe mamao e fai ai si umi ae le toe maua fua o fa'i, i le tele o afio'aga sa fa'aleagaina tele fa'ato'aga i le ‘afa o Gita, a'o le talo, e pau lava le tulaga o tau a'afia ai, ona ua le toe totoina e tagata fa'ato'aga i lenei vaitau, ae naunau ina ia asia muamua i latou e le vasega a le FEMA.”

 

O le tulaga fo'i o le taofiga o i ai nei a Samoa i le latou talo, o lo'o fa'ailo e le tumau, peita'i o lo'o i ai fo'i afaina i fa'ato'aga a Samoa i lenei vaitau, talu mai ona sofa'i mai Gita i lona malosi.

 

TOLOPO ASO FA'ATULAGA TALOSAGA SIKOLASIPI WPRFMC

 

Ua toe fa'ailoa mai mo le silafia uma a le fanau talavou o lo'o manatu ina ia maua se avanoa e a'oga ai i sikolasipi a le Western Pacific Regional Fishery Management Council lea e aofia atu ai i tatou ma Guam, CNIMI, Saipan ma Hawaii, ua toe tolopo atu, e fa'ato'a fa'amuta lea avanoa mo talosaga i nei avanoa sikolasipi ia Mati 15, 2018.

 

O lea avanoa fa'asikolasipi e mafai ona totogia ai le a'oga i so'o se Kolisi ma Iunivesite i Guam ma Hawaii.

 

O i latou e talosaga mo nei avanoa e tatau ona maea pe o lo ua toetoe mae'a le tausaga lua i se kolisi po'o le Iunivesite i Guam ma Hawaii i kosi e aga atu ina tautuaina ai le gataifale ma ona sosia. Ua fuafua fo'i nei avanoa mo i latou uma lava e umia le Sitiseni po'o le Nesionale o Amerika lea e agava'a uma ai tagata sa sofia a'e i Amerika Samoa.

 

Ua taliu mai nei se tasi o alo o le atunu'u sa fa'aaogaina e ia i ana a'oa'oga maualuluga lea fo'i sikolasipi ma ua fa'afaigaluegaina nei o ia i le Matagaluega o lo'o Puipuia le Vaomatua ma le Gataifale, DMWR i Fagatogo. O lea tama'ita'i o Fa'asalafa Kitiona.

 

Pe afai e te fia malamalama atili i nisi fa'amatalaga tau lea avanoa fa'asikolasipi, e mafai ona e fa'afeso'ota'ia WPRFMC i le latou telefoni [808] 522-5341 po'o le emeli  info.wpcouncil@noaa.gov.

 

FITAFITA USARMY I SAMOA- TAUSALA AVATU FANA & PULU

 

I lipoti mai Samoa, o lo’o fa’ailoa ai, se fitafita tuai a le US Army sa molia ma ua ta'usalaina e le fa'amasinoga Maualuga a Samoa ona o le aveina atu i totonu o le atunu'u o auupega malosi ma pulufana o auupega ia e le fa'atagaina i Samoa.

 

Peita'i ua toe solofua nei moliga fa'asaga ia Mualia Salamo ina ua mae'a ona ia ta'utino e moni lava ua ia taumafai avatua i totonu o le atunu'u pulufana o se ituaiga auupega e fa’asa i Samoa.

 

O le tausaga 2015 na avatua ai se pusaoloa a Salamo i Samoa, ae maua ane ai kilipa o se ituaiga fana e le o fa'atagaina i Samoa. Peita'i i le taimi lava e tasi, sa molia ai fo'i ma Salamo i lona avatua o nisi o fuala'au fa'asaina i le atunuu, peita'i mulimuli ane ua solofua ai ona moliga e tusa o fuala'au fa'asaina.

 

I le taimi na tolaulauina ai le fa'aiuga a le fa'amasinoga e tusa o lea moliga e fa'asaga ia Salamo, sa mua'i fa'atonuina ai leoleo ina ia ave le kilipa pulufana e fa'aleagaina e le latou matagaluega, ae fa'atonuina Salamo e totogi muamua le sala tupe e $400 Samoa.

 

Ua fuafua atu e le fa'amasinoga maualuga ua umi o lokaina le alii fitafita tuai, ma o le a tatalaina i tua, e leai se isi vaega o lona fa'asalaga e tulia.