Ads by Google Ads by Google

Tala I Vaifanua


O se vaaiga i le fagotaga ua avea fa'amalosi e sui o fa'amalosia tulafono o fagotaga e fa'asa mai afio'aga ua maea sainia latou fa'asao o le gataifale, e aofia ai ma Alega, lea e le'i tatalaina mo fagotaga i le taimi nei. [ata foa'i]

MAUA FAGOTAGA I ALEGA - SOLITULAFONO I LE POLOKALAMA MPA

 

O le vaiaso ua te'a na maua ai nisi o fagota i le gataifale o Alega ma ua faia fo'i le gaoioiga a i latou o lo'o nafa ma le fa'amalosia o tulafono tau fagotaga i le gataifale o afio'aga o le tatou atunu'u ua mae'a fa'atautaia ai le "Polokalama Fa'asao o le Gataifale" - MPA.

 

O le vaega muamua o le sala a nei au faifaiva o le avea atoa o a latou i'a na maua, ina ia fa'aleagaina e i latou na mauaina, pe fa'aaogaina fo'i e le Ofisa mo a latou suesuega i totonu o le Ofisa autu i Fagatogo. Ona toe taua'aoina lea o le pepa fa'ailo o lou fa'amasinoga e ao ina faia i le Fa'amasinoga Fa'aitumalo, e maua ai fa'asalaga tonu.

 

Peita'i, ua fesiligia po'o ai uma afio'aga ua mae'a lisia, ua fa'asa ai le fagota. Ina ia nofouta ai le au faifaiva.

 

I le Falelima i sisifo: Fagamalo, Poloa, Amanave. I le falelima i Sasa'e:  Matu'u ma Faganeanea, Alega, Amaua, Auto, Sailele, Aoa, Vatia ma Fagasa. Ua i ai fo'i ma le afio'aga o Faga'alu, peita'i e le'i mae'a ona fa'atulaga lea fa'asa, ma ua va'aia pea lava o lo'o fa'atauina fagotaga i le tausiusiuga o Faga'alu i le nofoaga o le Lions CLub.

 

“Ona e i ai aiaiga o lea faasa e le'i mae'a lelei ona talanoaina ma fa'amau e le afio'aga fa'atasi ma le Ofisa o le Puipuiga o le Vaomatua ma le Gataifale, o lea ua le fa'amalosia a'ia'i ai lea MPA Fa'asao i lona malosi'aga e tatau ai, ma ua tu'uavanoa ai pea ia i latou o lo'o fa'atau i'a ma fagotaina lea ogasami o le atunu'u,” o se fa’amatalaga lea mai le tama'ita'i o Christina Mata'afa Samau o le DMWR MPA Program.

 

"O aiaiga o le MPA po'o le fa'asao i afio'aga ta'itasi e fa'atulaga lava e le matou Ofisa fa'atasi ma le Pulega a Ali'i ma Faipule o le afio'aga o faia le fa'asao. Ina ia mautinoa o lo'o mulimulita'i le MPA i le mana'oga tamau o le afio'aga, ia le sopotuaoi fo'i nei aiaiga ma le fa'atulagaga ua toina mai e le feterale."

 

O se fa'ata'ita'iga ua tu'uina mai o le Fa'asao a le afio'aga a Matu'u ma Faganeanea, e mana'o lea afio'aga ina ia tapunia le ogasami o lo'o i Faganeanea, ae tatala pea le ogasami o Matuu ina ia fagotaina mo le fofoga taumafa o le afio'aga atoa.

 

"Ia fa'aupu ma aiaia e le afio'aga le latou fa'asao ina ia le i ai se sosia o le soifua faa-Samoa e to'esea e lenei fa'asao. O se tasi lea mana'oga e ao ina ausia i feutaga'iga o fa'asao nei. Aua o le mau fo'i a tatou sui o faigaluega ma mataituina aga ma suiga o le taga'i i le soifua laulelei o le atunu'u atoa, ua mafua ona fa'ateleina o tatou tagata ua ova le mamafa o tino, ona ua suia le mataiai sa masani mai ai Samoa i aso ua te'a i taumafa ua tapena fa'aonapo nei, ma ua le mafai ai ona toe fa'aititia le mamafa o tino o tatou tagat i lenei vaitau,” o se tala lea a Samau.

 

O le agaifanua e fagota mai se i'a, ma faia se suai'a ae ina'i i fua o faaeleeleaga, sa masani ona gafatia ona tino lelei ma soifua laulelei ai o tatou tagata. O lea ua taumafai ai afio'aga i le fa'asao ia tele ia, ma le tatala o se isi vaega ina ia fagota pea tagata, ae le fa'alagolago i mea'ai gaosia i fale'aiga i taimi uma ma aso uma.

 

TAUALOA TAUMAFAIGA TAUSALA LALELEI O LE PASEFIKA

 

O le afiafi o le aso To'ona'i na te'a nei sa fa'ataunu'u ai se 'aiga fiafia a le MASI ma ana pa'aga, ina ia taualoa le taumafaiga a le tama'ita'i Tausala Lalelei o Amerika Samoa, lea na taliu mai i fanua ma le pale o le manumalo i le tofi, Tausala Lalelei o le Pasefika.

 

O se po na fiafia fa'atasi pa'aga a le MASI sa latou vala'aulia fa'apitoa, e afua mai le fa'atina o le Atunu'u, le faletua o le Kovana Sili Cynthia Moliga, le afioga le Aloali'i ma le faletua Etenauga ma le fanau Christina ma Sanchez lea e ona le Kamupani sa sapaia le taumafaiga a Matauaina Gwendolyn Toomalatai i lona tauva ai i le tofi Miss American Samoa, le vasega o aiga o le tama'ita'i Tausala o le Pasefika, o pa'aga mautu a le MASI i pisinisi ma nisi.

 

"O lenei afiafi e avatu lava le fa'afetai i le Atua ona o le to'atele o i latou uma i Amerika Samoa ma fafo atu, i le tapua'iga o le taumafaiga sa alo faiva atu i ai, e le gata i le taumafaiga e avea ma tausala lalelei o Amerika Samoa nei, ae maise ai o le tapua'iga i le atuvasa. E le faigofie, ae ou te fa'afetai sa ou lagona le mafanafana o a outou tatalo si'itia mo la outou auauna vaivai, sa ou malosi ai,” o se tala lea a Toomalatai.

 

"E afua atu i lo'u malo, o le vasega o faipisinisi uma sa tofu sao i lenei taumafaiga, ae maise o le vasega o Ekalesia  ma matua fa'aleagaga, e o'o lava i la'u ekalesia o tautua ai i lou Atua, lo'u afio'aga pele o Onenoa ma lo'u aiga, fa'afetai lo outou faitama, e iloga lava lou outou ma'ema'e i a outou fa'amanuiaga. Ana outou le malosi i le fa'atonu, fa'apoto ma le tatalo, e le maua se mea e pale ai la tatou taumafaiga i lenei tausaga. Fa'afetai lava!"

 

FA'ATAUA FANAU E LE MAFAI ONA TAUTALA

 

O le vaiaso lenei o lo'o fa'aauau ai le tele o polokalama e fa'ataua ai fanau ma tagata o lo'o ua soifua ma mana'oga fa'apitoa i le tino po'o le mafaufau, aua o lenei le masina o le tausaga atoa, ua fa'apoloaiga e le afioga le Kovana Sili, ina ia fa'ataua ai i latou.

 

Ua fa'ailoa mai e le Ofisa autu o le SPEd, o le aso 8 o Mati e fa'atasi uma ai fanau High Schools a le SPEd i le Malae ta'alo, le Veterans Memorial Stadium i Tafuna mo ta'aloga i le taeao.

 

Ua fa'ailoa uma atu lenei fuafuaga i faia'oga SPEd uma lava i a'oga maualuluga i le atunu'u aua lenei polokalama.

 

E pei ona silafia o le Special Olympics lea e faatautaia lea aso ta'alo i le tatou nei malo, ma e pau fo'i lea o le a'u ta'a'alo a Amerika Samoa o lo'o mautinoa lava le o atu i Olimipeka fa'apitoa, ma toe taliu mai ma Pine Auro mo le atunu’u.

 

I le fa'aiuga o le masina o Fepuari sa faia ai le semina fa'apitoa e fa'ataua ai le tausiga fa'apitoa ma le va'aiga fa'apitoa o fanau e le mafai ona tautala mai e fa'ailoa o latou mana'oga ma lagona. Ua fa'ailoa atu i matua ma e tausia fa'apitoa i latou, ae maise fo'i o faia'oga uma o lo'o nafa ma le tausaiga a'oa'o ma talanoa i nei fanau, ala ua fa'aaogaine i metotia o lenei vaitau.

 

O Sandra Scanlan, o se tasi o tina sa fesoasoani malosi ina ia fa'atulaga lea semina fa'aleaoaoga e fefa'asoa'i ai lagona e tusa o le auaunaga e ao ina fa'ao'o i nei fanau fa'apitoa.

 

O le aso ua fa'atulaga ai se asiasiga a le vasega SPEd a Matafao i le Gov. Tauese PF Sunia Marine Center i Utulei, ma soso'o ai ma se latou taimi fa'apitoa e fa'aalu i le faletalimalo a le Sadies by The Sea ma tu'ua ai lea aso a'oga o le fanau fa'apitoa.

 

Manatua fai sou sao i le tautuaina o tatou tagata fa'apitoa, i latou o lo'o soifua fa'atasi i tatou a'o o lo'o i ai mana'oga tupito i le tino poo le mafaufau.