Ads by Google Ads by Google

Tala I Vaifanua


O le pule o le Faletusi, Feleti Barstow Utulei, Justin Maga lea ua ia sainia se tusi o "Ata o le Suiga i le Parataiso" o lo'o ua lomia ai ata na pu'ea i le vaitausaga 1907 - 1913 i Amerika Samoa. [ata: Leua Aiono Frost]

ATA & FAAMAUMAUGA O AMERIKA SAMOA - 1907-1913

 

E tele taimi e pu'eina ai ata, ae le mautinoa le umi e taofia ai, ae maise o le taimi e aoga ai. Peita'i o le umi ona i ai o se ata ia te oe o se tasi po'o va'aiga o mea na tutupu i lou aiga, ekalesia, nu'u po'o le atunu'u atoa, o lona taua lea!

 

O le taua lea o le galuega ua mae'a tu'ufa'atasia i le tusi a le tama'ita'i tusitala o Karen Wheat, o ia o le alo tama'ita'i o se augatupulaga lona fa i le ali'i fitafita a le USNavy i le pulega o le Malo o Amerika Samoa i le vaitausaga 1907-1913.

 

O lea tusi ua fa'aigoaina: "Ata o Suiga i le Parataiso," tusia i le amataga o le Senituri 20, ma ua tusia ma fa'amaumau mo Tagata o Samoa, Ananafi, Nei ma Taeao.

 

I le maimoa atu i ai, o ata nei e ta'atele i le tatou Faletusi ma le Fale Mata'aga i Fagatogo, o ata na tapu'ea lea e Joseph Dwyer, lea e tupuga mai ai Wheat.

 

E fa'afa lelei ona sau Wheat i Amerika Samoa, ma nofo ai mo sina taimi, ina ia mafai ona feso'ota'i ma le atumotu ua matua fiafia tele i ai lo latou tama matua ua loa fo'i ona maliu.

 

O Joseph Dwyer, sa avea ma Failautusi o Mataupu Tau Samoa i le teritori mai le 1907-1913. O le fa'alua ai lenei ona taua'aoina e se sui o lenei aiga, o foa'i taua i le tatou faletusi ma le atunu'u.

 

"O le foa'i muamua sa taua'aoina fo'i lea e Karen Wheat i le tausaga e 1997, a'o tula'i le faigamalo a Kovana Tauese Sunia. O lea foa'i sa mua'i faia i lena tausaga o Ata uma lava nei ua mae'a ona fa'ava'a ma ata o se toe va'aiga lea i le faigamalo ma le Fitafita Guard a Amerika Samoa. O se sao ua iloga lona taua, aua ua toe iloa ai e tatou mea na tutupu i nai ulua'i vaitausaga o le pulega a le US Navy i le tatou lotoifale,” o se tala lea a le susuga Justin Maga, Pule o le Faletusi Feleti Barstow i Utulei.

 

A'o i ai Wheat i le teritori, sa malaga mai na'o le tasi le vaiaso mo le fa'amoemoe e tatala fa'atauga o lana tusi lenei, ma tu'u fo'i ni kopi i le faletusi.

 

Na faia i le aso Faraile ua te'a se fa'atasiga i le faletusi, ina ia sainia ai ana tusi fa'atau atu, ma toe feiloa'i ai i le pulega o le tatou faletusi ma maimoaina ai fo'i ata uma sa taua'aoina i le 1997, ua fa'atautau uma i le faletusi mo le maimoaga a le atunu'u.

 

I le taimi nei ua aga'i atu o ia i Samoa ma fa'asolo atu i Niu Sila, aua o le tele o nei ata o lo'o i ai fo'i ma nisi e mafai ona fa'amaumau i Samoa ma Niu Sila, o vaitau o fesuia'iga o pulega i le Atu Samoa atoa.

 

I le taimi na feiloa'i ai Wheat ma nisi o lo'o masani ai i le tatou nei malo, aua sa i ai se taimi na malaga mai ai ma nofo e a'oa'o lana tusi ata i le ASCC, ma avea ai fo'i le tama'ita'i o Reggie Meredith ma ona faia'oga i le Fine Arts.

 

"O iina sa a'oa'oina ai a'u i le valiga o le Siapo Samoa ma lona tusia o mamanu ma fa'ailoa mai ai fo'i ma latou uiga. O lena taimi na a'o ai fo'i ma le Siva Samoa ma taumafai ona pese i fatuga Samoa. Matagofie lea tulaga i le tusia ai o la'u nei tusi, e pei lava ua i ai lo'u so'otaga ma le ola ai iinei, ma ua toe fafagu mai ai le tele o manatunatuga lelei ma le matagofie a'o tusia lenei tusi. Tau ina ia aoga mo tupulaga faia'e o le atunu'u pele o Amerika Samoa,” o se tala lea a Wheat.

 

O lenei tusi sa toe siakia lea e le susuga John Enright, o se tasi sa galue ma nofo i Amerika Samoa nei, ma avea ma Pule o le Historical Preservation Office. O lo'o tumau pea lona naunau e faitau ma galue mo se lelei o tatou tagata ae ua aumau nei i Rhode Island ma lona aiga.

 

SIKOLASIPI - FA'AMANATU AI - FALEOMAVAEGA ENI HUNKIN:

 

I le atoaga o le tasi le tausaga talu ona maliu le tofa Faleomavaega Eni Hunkin, lea sa avea ma sui o Amerika Samoa i le Konekeresi mo le 26 tausaga, ua tu'ufa'atasia ai e le faletua Hinanui Hunkin se fa'asikolasipi mo alo o Amerika Samoa e talosaga atu i ai.

 

Na malaga fa'apitoa mai Hinanui ma nisi o le fanau i le atunu’u, ma latou fono fa'atasi ai ma le pulega o le ASCC, Peresetene Dr. Rosevonne Makaiwi Pato, ina ia latou talanoaina lea avanoa fa'asilolasipi ua fa'atula'ia nei, ina ia manatua ai pea le tofa a Faleomavaega.

 

"O lea sikolasipi, ua i ai le fa'amoemoe maualuga o le ali'i Faipule mo Amerika Samoa ua malolo, ina ia aoga i se taumafaiga a se alo o le atunu'u ina ia fa'amanuiaina. Ia gafatia ai e ia ona tauva fa'atasi ma nisi, ma fa'aleleia ai o latou tomai i a latou sailiga fa'aleaoaoga e tapena ai e avea ma ni ta'ita'i agava'a o le tatou atunu'u,” o se tala lea a le faletua i le tama'ita'i peresetene o le ASCC.

 

Na faia fa'asalalauga fa'alaua'itele a lenei aumalaga, Hinanui ma le fanau e to'afa i luga o le alaleo fa'asalalau e fa'ailoa fa'alaua'itele ai lenei taumafaiga, ina ia au pea se tautua sa gapatia ai le tama o le aiga a'o soifua ma galue mo le tatou atunu'u.

 

O i latou na malaga mai o le tina o Hinanui, ma ona alo tama'ita'i o Temanuata, Leonne ma le atali'i o Nifae lea sa latou fa'alauiloa ai fo'i ma nisi o latou mo'omo'oga alofa ua misia ai lo latou tama. O nisi o vaega o lana tautua sa mafai ona fefa'asoa'i ai lo latou aiga, ma mea fo'i e faigata ona fa'agalo ai lo latou tama, ona o lona siufofoga malie i fatuga e pele ia Samoa.

 

O nisi o nei pese sa taina fo'i ina ia toe fa'afofoga i ai le lautele o le atunu'u ma toe fa'amanatu ai si o latou tama i agaga o ona tagata sa pele tele ia te ia a'o tautua ma soifua i lenei olaga.

 

E tusa ai ma se fa'amatalaga a Hinanui, "O Eni e matua pele ia te ia le tupulaga talavou o Samoa, e naunau lava ina ia tofusia tamaiti uma ma le avanoa lelei e fa'alautele ai lo latou tomai i so'o se agava'a ua fiafia e tautua ai ma toe fa'afo'i ai sona sao i lona malo o ola ai. E manatu tele o ia i le a'oa'oga mo fanau a lona atunu'u ina ia lelei."

 

O pesega ma fatuga i CD pese a Faleomavaega, o lo'o maua lea i le so'otaga "iTunes" ma o tupe uma e maua mai i lea so'otaga ona o lou fia fa'afofoga i ana pese Samoa, o le a tu'ufa'atasia lea i le sikolasipi lenei mo nisi o le fanau a'oga e agava'a ai i le tatou Kolisi Tu'ufa'atasi.