Ads by Google Ads by Google

Tala I Vaifanua

TOE SAILIA ATOA TAGATA A'AFIA FATU I LE TERITORI

 

Ua i le atunu’u ni sui se to'alua mai le Duke University Medical Center, David Adams ma Peg Knoll mai le University of California Irvine Health, ina ia la'ua fa'aa'oa'oina le fa'aaogaina, atoa ai ma le ala ua faitauina ai e le Masini Fou o le Fatu ua i le falema'i o le LBJ, suesuega o le fatu o le a fa'atautaia i o tatou tagata.

 

E lua vaiaso lea o le a nonofo ai pea nei sui iinei ina ia mautinoa ua malamalama lelei tatou foma'i o le a fa'aaogaina lenei masini o le fatu, i le faitauga ma iloa patino ai i latou ua fa'aletonu o latou fatu, ma nisi fo'i e ao ina fautuaina malosi, ia fa'aeteete o le a afaina o latou fatu. O le fa'aaogaina o le masini, e ao fo'i ona malamalama Foma'i.

 

E ese mai lea, e lua nisi masini ua fa’ao’o i le Matagaluega o le Soifua Maloloina mo le suesuega o fatu o tagata lautele o le ituaiga o le Philips CX50 CompactXtreme Ultrasound Systems.

 

E to'afitu tagata faigaluelga a le Matagaluega o le Soifua Maloloina ua  a'oa'oina fa'apitoa e nei sui e to'alua mai fafo, mo le fa'aaogaina o masini nei.

 

O le masini tele muamua, ua fa'aaogaina lea e pu'eina ai ata o le fatu ma lona tata. E le lagona fo'i se tiga e le tagata o lo'o siakia lona fatu. Pe afai o le a mae'a nei a'oa'oga fa'apitoa ae o le a si'itia fo'i le ala e sailia ai i latou ua afaina fatu i totonu o le tatou malo.

 

O le afuaga o le maua mai o lea fesoasoani mo i tatou, o le suesuega sa fa'atautaia e le Oregon Health & Science University ma o a latou fa'ai'uga maumaututu sa fa'alauiloa fa'alaua'itele i le tausaga 2017 ma sa fa'aulutala "O le Puipuia o le RHD i Amerika Samoa: 12.9% - O se faitauga pito i maualuga lea i le Lalolagi, pe a fua fa'atatau i le faitau aofa'i o Amerika Samoa e na'o le 55, 519 i le tusigaigoa o le 2010."

 

Pe fa'atusalia i atunu'u e to'atele o latou faitau aofai o tagata e alaala ai, e matua maualuga lava le pasene ua maua atu i Amerika Samoa.

 

O se tasi fo'i o fa'ai'uga na fa'ailoa mai e lea suesuega, na latou fa'amautu ai, e tatau ona i ai masini nei e vave suea ai tagata ua tau afaina fatu ma vave iloa e moni lea tulaga ma fa'autagia ai lapata'iga mo ia tagata ina ia usita'ia fa'atonuga e tausia ai le malosi atoatoa o latou fatu, nai lo le tu'u pea se'ia o'o ina afaina tumau le fatu.

 

I le sailiga a le Potu Talavai a le fanau talavou sa fa'ailoa mai e 284 talavou ua mae'a maua i le ma'i fatu Rheumativ Fever.

 

Peita'i i le suesuega na faia e Oregon Health & Science University, na maua ane ai e matua maualuga lava le latou faitauga, ona sa latou fa'aaogaina masini nei ua o'o mai i le tatou Matagaluega o le Soifua Maloloina.

 

Pe afai e fa'atusatusa le aofa'iga o le fanau ua a'afia fatu i le aofai o tamaiti a'oga uma i le teritori e mafai ona maua mai le faitauga aofai o fanau ua a'afia o latou fatu i e aotelega e 2,199 tamaiti mai le 17,048 o le aotelega o fanau a'oga i le teritori atoa.

 

Mai lea faitauga aofai o fanau ua a'afia fatu ua fa'ailoa mai e na'o le 15% o i latou na ua mafai ona togafitiga i le ma'i fatu RHD, ae o le isi 85% o le fanau a'oga i le taimi nei i Amerika Samoa, e tauau e afaina tetele fatu a'o le'i fa'ao'o maia lava i le falema'i.

 

Ona o lea tulaga, ua ave ai le fa'amuamua a le DOH i le ma'i fatu ina ia toe matua saili mai le fanau ua matauina o le a a'afia fatu i se taimi o lumana'i, i latou fo'i ua maua i le Rheumatic Fever,  po'o le Rheumatic Heart Disease, ma ua mae'a fo'i ona tofia se Komiti fa'apitoa e taga'i toto'a i galuega tima'i, ma sailia o le fanau ua amata afaina fatu.

 

KONESETI A LE CULTURE CREW, ISLAND BLOCK & 'AU PEPESE

 

O le afiafi o le aso Tofi na fa’atumulia ai le malae o le Su’igaula o le Atuvasa i Utulei i le konekseti a le Culture Crew, le Island Block ma ali'i ma tama'ita'i pepese sa malaga mai fafo e fa’afiafia talu mai le ‘afa o Gita.

 

I le amataga sa i ai se sao o nisi lotoifale e lauiloa i le musika mai le Musika Samoa Society ma le Pouesi Band.

 

Na tatala le sao o le aumalaga i le sausaunoaga a le Tausala Lalelei o le Pasefika, o le tausala lelei lava lea o Amerika Samoa, Matauaina Toomalatai, ona soso'o ai ma le foa’i a le ASTCA i le Koluse Mumu, i le CEO San Diego Red Cross Sean Mahoney, ma saunoa, "Fa'afetai ASTCA ma Amerika Samoa i le agaga foa'i ua mafai ona matou va'aia ma fa'amaonia nei. O outou o le atunu'u alolofa, ma le agaga foa'i. E talia ma le fa'afetai lenei foa'i."

 

O Vaea Aetonu mai Pago Pago, fa'apea ma Seattle's Best, Jordan Papatu ma Nuuuli ma Leone na muamua mai e pepse. Na matua fa'afiafiaina o la'ua aiga ma e masani ai sa o ane e fia fa'alogo ai.

 

A'o le'i toulu mai timuga, sa matua fia fa'afofoga tagata i le tama'ita'i o Tenelle, lea sa tapena mai mo le toe sao o le Culture Crew ma le aumalaga uma i lea afiafi.

 

ASIA FA'AELEELEAGA A LE ATUNU'U UA LEAGA

 

Ua mae'a le asiasiga a le Matagaluega o Fa'ato'aga i le tele o fa'ato'aga ua fa'aleagaina e le ‘afa o Gita i Tutuila.

 

Saunoa le Fa'atonu Sili o le Matagaluega o Fa'ato'aga a le malo, Filifa'atali Mike Fuiava, "O le asiasiga a le FEMA e iloga mai e le agavaa ai faifa'ato'aga lea e fa'amoemoe e na'o na fagaina ai lona aiga. O le a agava'a na'o faifa'ato'aga ua mae'a lisi o latou suafa i lisi o au faifa'ato'aga e sapalaia le maketi ma le polokalama o Mea'ai a Fanau A'oga."

 

Peita'i, "ua matou talanoa ma sui nei e malaga mai a le FEMA ma ua latou iloa lelei, e moni lava le latou mau, ae tutusa pau lava le fai fa'ato'aga o lo'o tausia lona aiga, ma i latou o lo'o sapalaia le Maketi po'o le polokalama o Mea'ai a le fanau a'oga. E toto fo'i meatoto a na faifa'ato'aga ina ia fagaina ai lona aiga. Afai e leai ni a latou mea toto, ua oge fo'i lona aiga ua le a'ai."

 

"O lo ua fa'ailoa ia i latou e pau le ituaiga mea e toe fa'aaogaina e le malo e fagaina ai ona tagata pe afai e le lava meatoto e fagaina ai aiga uma o le atunu'u nu'u, o le fa'atele lea o le sapalai o le alaisa e aumaia i totonu o le atunu'u."

 

"E moni lava o loo lelei le talo ma le ta'amu, ufi ma le manioka, peita'i e le tele fo'i ni fa'ato'aga o le talo ma le ta'amu. E tele fo'i le fa'i ua fa'aleagaina lava. E i'u lava ina oge, ma ua tatau fo'i ona oka loa e faleoloa le sapalai fa'atele o le alaisa, ina ia mautinoa o lo'o lava le sapalai lena e tua atu i ai le atunu'u, i se vaitau e le o toe mamao.”