CULTURE CREW & ISLAND BLOCK - MUSIKA MAI AMERIKA

Ua asia le atunu’u e le Culture Crew mai Hollywood i Kalefonia, lea ua malaga fa'atasi mai ma le Au Fa'asalalau o alo o Atumotu o le Pasefika ua fa'aigoaina i latou o le "Island Block".

O lea malaga e faia ni galuega alofa ina ia toe fa'afo'i le fiafia, le agaga alofa ma tausoa fa'atasi faigata ua lutia ai nisi o aiga i lenei vaitau o afa.

Ma o le a fa’afiafia i latou nei i le afiafi o le aso Tofi, aso taeao, i le Suigaula o le Atuvasa i Utulei.

"E le'i manatu o le a matou o'o mai i se vaitaimi o lu'iga i totonu o tatou aiga. Peita'i, a'o se pese malu fo'i e fa'anofo filemu ai ni faigata, ma toe fa'afiafiaina ai loto, ae maise o le lagona alofa mo i latou uma i Samoa na lua, fa'apea isi atumotu uma o le tatou atuvasa, ona sa afatia i tatou ma fa'aleagaina ai le tele o mea totino. O le Atua lava ia o le Atua o le Alofa,” o se tala lea a Joe Savage Fa'avae Fualefao o Samoa, ma o se tasi o le Island Block o se Siufofoga Fa'asalalau i Utah ma Hawaii.

O le latou malaga ta'amilo lenei e o fa'atasi ai alo o atumotu ua mafai ona so'o fa'atasi o latou olaga ona o le Musika - ma ua iloga fo'i, e matua mautu lava lo latou so'otaga, o tamaiti o le Alamoana o tamaiti o le Aganuu Alofa.

E to'afa lava i latou na amatalia le Culture Crew ua aofia ai Big Pati Soi, John, Schlutz, ma Sam. O i latou e le oni Samoa uma a'o tagata o atumotu nisi, Tonga ma Maori. O lo’o malaga fa’atasi mai ma sui ta'ito'atasi o e iloga i le musika. E pei o Tenelle Luafalemana, o se tama'ita'i Samoa na soifua i Laie, Hawaii ma Carson, Kalefonia. Ua lauiloa ana pese, i lana pese lotu, "How Great Thou Art" ma le "Tali Mai, O oe lo'u Au!" i pese fa'asamoa.

O le susuga "Big" Pati Soi, o se tasi ua iloga i ana fatuga ma lona siufofoga i Los Angeles, Carson ma San Francisco fo'i, ae o lea ua salalau atu nei i Utah ma Washington State. Ua lauiloa lana pese "Island Girl" ma o se tasi fo'i o le Culture Crew, lea ua fa'ato'a lua tausaga talu ona amatalia.

Ua i ai fo'i le atali'i mai Guam i le Island Block, ia Joey Quenga, i lona suafa fa'asalalau o "DJ - Q."

Sa muamua malaga i latou i Niu Sila, aua e to'alua sui o le Culture Crew e afakasi Tonga ma Maori, ma o i la'ua fo'i e 'au uso. Ona afea ei latou le atu Samoa, i le taimi tonu o le afa o Gita.

"Ua taunu'u tonu mai lava le malaga i le vaitau e aoga ai. Na matou foa'ia le tele o matou ‘fa'amama o le suavai’ le ituaiga e le tau fa'aaogaina ai se eletise po'o nisi mea faigata, e na'o na fa'apipi'i lava ma faaaoga loa.”

O le ali'i pese o Vaea Aitogi, o le sao lea o Amerika Samoa i le aumalaga. Na soifua a'e i Pago Pago. O le a fa’afiafia foi le SWELLS singers ma le tama o Vaea faapea DJ Seattle's finest na soifua a'e i Masefau ma Leone.

"O le a le fa'ailoa atu matou igoa, e matou te manana'o e o mai uma matou aiga e fiafia fa'atasi ma i matou i le Malae o le Atuvasa i Utulei, ina ia fa'alauiloa atu matou, ae tali mai i latou. Ua mamao le mea e o mai ai e fa'afiafia outou uma, fa'afofoga ma tatou fa'afetaia le alofa o le Atua, aua e silisili lava Ia! O se avanoa lenei e le au maua, ae o lenei ua o'o mai o pagatia aiga pele ma le atunu'u, ia alofagia e le Atua toe foa'i mai le manuia i tatou aiga uma! O le alofa na o mai ai,” o se tala lea a DJ mai Seattle.

O latou pesega sa fa'atautaia i Samoa na faia fo'i i a'oga ma sa muamua fo'i i le Kolisi i Pesega, le laumua o le Ekalesia a Iesu o le Au Pa'ia o Aso e Gata Ai, ma fa'asolo atu ai i isi a'oga. O le fa'afiafiaga tele sa faia lea i le eleele na tapena e le Tourism a Samoa i le lumafale o le Maota o le Malo.

"Matou fiafia tele i le matou fa'afiafiaga lea, ua toe vave ona fafaga atu ai le agaga fiafia ma le alofa i tagata uma o le tatou atunu'u, toe fa'amanatu atu, e le o mea o lenei olaga e taua, a'o le ola, alofa ma le fiafia e sili ona taua,” o se tala lea a le tama o Vaea.

I le tatou motu nei, mae'a pepese i latou i Fagaitua, peita'i sa manatu e pepese fo'i i Samoana ananafi, ae ua tolopoina se'ia toe fa'ao'o i le aso ma nisi fo'i o a'oga ua mae'a fa'atulaga e fa'afiafia ai.

O latou fa'amama o le suavai o lo'o latou faimeaalofaina atu i aiga pagatia, ua fa'ailoa mai e gaosia fa'apitoa e le Sawyers ma o le igoa fo'i lea o nei ituaiga o fa'amama e le fa'aaogaina ai se eletise e galueaina ai, "Sawyers Filters."

KUKA MAI MEA'AI E LE DYWA MO SHELTERS

O le tausiga o nofoaga fa'apitoa mo e ua fa'aleagaina o latou fale nofo i le asiosio o Gita, ua fa'ailoa mai sa le toe kukaina mai e le Aufaigaluega a le SLP a latou mea'ai, ae ua ese le faiga ua fa'atautaia ai e afua mai le fa'aiuga o le vaiaso na te'a nei.

O lea itu o le tapenga ua tofu sao i ai matagaluega e tolu o le Malo, ma le foa'i a le Koluse Mumu o mea e tapena ai mea taumafa ona atoa ai lea o le tautua.

"O mea e gaosia ai mea taumafa ua tapena mai e le Koluse Mumu, ae o le kukaina ua tapena e le Matagaluega o Tina ma Tupulaga Talavou, peita'i o le Fa'aipuina o mea tausami ua lafo atu i le Matagaluega o Alamanuia mo Tagata Lautele DHSS, ma le kiliva i nofoaga uma ua fa'anofoia ai nai aiga pagatia ia Gita, ua patino lea i le tautua a le Matagaluega a le Procurement." O se tala lea na fa'ailoa mai e i latou na vave tula'i mai mo le gaosiga o mea'ai uma.

Ua iloga mai fo'i e na'o Pago Pago lava e tolu nofoaga nei ua fa'atula'ia ai, ae o isi afio'aga uma ua ta'itasi lava nofoaga o lo'o fagaina e i latou.

O le aso lenei, ua alafa'i ai lea tautua, i se fa'asinomaga fou, pe ua i ai se suiga i lea tonu, pe o le a fa'aauau ai pea lava i le faiga tuai lea ua sau a'i talu mai le aso Faraile talu ai.