IUGAFONO A LE FONO FAITULAFONO FA’AMALO FALETUPE BOH

O le taeao ananafi na o'o atu ai le Failautusi a le Sanete o le Fono Faitulafono, Leo'o Va'a Ma'o, e taua'ao aloa'ia le Iugafono Malilie Fa'atasi a Maota e lua, e taualoa ai le tautua matavela a le Faletupe o Hawaii i malo o Amerika Samoa fa'apea ma ona tagatanu'u uma.

O lea feiloa'iga aloaia a Leo’o ma le pule o le BOH i Amerika Samoa, EJ Tyler Ozu, o le Sui Peresetene o le Faletupe o Hawaii ma o le Pule fo'i o le BOH i Amerika Samoa nei.

“Ona o se taimi ua fa'atali ai pea lenei faletupe seia maua se isi faletupe e fa'aaoga e le Malo o Amerika Samoa ma ona tagatanu'u, o lea ua alagatatau ai fo'i lenei iugafono malilie fa'atasi. Peita'i, o le tautua fo'i e le'i fa'ataga faia, ae na iloga ona fesoasoani fo'i le Faletupe o Hawaii ina ia fautuaina ta'ita'i o le faigamalo a Amerika Samoa ae maise o ona tagata lautele i lea fo'i tautua o lo'o latou tautuaina ai le atunu'u."

Sa fa'ailoa e Leo'o ia Ozu, "O le amana'ia o le fa'atagi a le malo tou te fa'atalia se'i mae'a ona fa'atulaga se si auaunaga fa'afaletupe mo le malo lenei ma ona tagata, o se fa'aaloalo ua sili ona maualuga lea ua outou faia mo i matou uma. Fa'afetai mo lo outou galulue ma le fa'amaoni i le tausiga o le tamaoaiga mo Amerika Samoa ma ona tagata."

"O lenei fa'ailo maualuga ua fa'atino e le Fono Faitulafono a le Malo o Amerika Samoa, e le o se fa'ailo lea mo outou ia outou tula'i ese ai, ae o se fa'afetai maualuga ona o lo outou fa'amaoni  i le galuega fa'afaleteu'oa, ma lo outou agalelei e fa'atino ai le tautua mo i matou, ae le o matou loto ina ia outou tula'i, e mo'omia pea lava outou,” o Leo’o lea.

Ina ua fesiligia Ozu, pe mata o le a tula'i ese ae le toe tatalaina o latou faitoto'a e tautua ai le atunu'u, ae fa'ailoa mai, "E leai, o lo'o i ai mea e ao ina fa'amautuina atili. O lo'o to'atele lava e le'i tapunia a latou teugatupe i le matou faletupe, ae le'i fa'ao'o maia fo'i se tala mai le fa'auluuluga o le BOH i Hawaii i se aso e ao ina fa'amuta ai le tautua i laufanua o le tatou nei teritori."

FOA'I 'NIEL'S ACE HOME CENTER' - $15,000 O OLOA MO AIGA MAFATIA

Ona o Fepuari 14 i tausaga ta'itasi o le aso mo Manamea, ua filifilia ai e le Neil's ACE Home Center le Koluse Mumu i Amerika Samoa e fai ma latou Manamea. O le latou foa'i ua faia mai i le taumafaiga a le Koluse Mumu e tali atu i le tele o aiga na sulufa'i atu mo se fesoasoani, e $15,000 le tau aofai o oloa e aoga mo le tausiga o aiga ua foa'ia mai.

O oloa e aofia ai: Aluga fou ma le mafiafia, ie afu, solo ta'ele, ie ufi moega, kapoleni, suavai mama mo le taumafa, ma kula fo'i e teuina i ai mea'ai fulisa a aiga, ua matua utaina i le taeao ananafi i loli la'u oloa e lua a le ACE.

"O lenei foa'i e matua talia ma le fa'afetai tele, aua o lea fo'i fa'ato'a matou mauaina lea o se foa'i fa'apenei mai le aufaipisinisi a le atunu'u talu mai ona lutia i tatou i le Asiosio o Gita, fa'afetai tele Ace i le tou pulega ma le aufaigaluega uma, o le aiga fo'i e ona lenei faleoloa, ia fa'amanuia le Atua ia te outou uma i le agalelei ma le alolofa fa'amaoni i o tatou tagata ua pagatia i lenei vaitau. Foa'i e le Atua mau i la outou pisinisi,” o se tala lea a le ali'i pule i le faleteuoa a le Koluse Mumu, le susuga Lipea.

O le susuga a Opeta, o se tasi o Floor Managers a le ACE na malaga mai ma le foa'i, sa ia fofogaina le latou fesoasoani i le aufaigaluega uma a le Koluse Mumu sa latou talia lenei foa'i taua tele.

E tusa ai ma se lipoti ua mae'a fa'amaumauina, i tagata lava ua o'o ane i le Ofisa o le Koluse Mumu, i le taimi nei ua silia ma le 700 aiga ua mae'a fa'atumu a latou pepa ma fa'atalia le taimi e o'o atu ai le asiasiga i tua i o latou afio'aga.

"E leai se mea e popole ai le tatou atunu'u mamalu ae maise o nai aiga o lo'o tausia fa'apitoa i nofoaga ua fa'avasega e le Malo mo lea fa'amoemoe, e o'o atu lava le asiasiga a le Koluse Mumu i o outou lotoifale. O mea fo'i ua foa'ia mai e le Neil's Ace Home Center, o le a aofia uma i mea e foa'ia atu e le Koluse Mumu i aiga e tau fesoasoani e fa'aleleia le tausiga o nai aiga, ae maise ia i latou ua fa'aleagaina fale nofo e alaalata'i ai,” o lea se fa'amalamalamaga a le tama'ita'i o June Maeva, o se tasi o volenitia a le Koluse Mumu o i ai i le taimi nei.

E tusa ai o le foa'i mai le Ace sa fa'ailoa mai le agaga fa'afetai tele o Maeva, le sa ia faia se vala'au fa'apitoa i le CEO Ngaire Taufa'asau o le Neil's Ace Home Center, "E matua ou fa'afetaia lava le pulega a le ACE, Ngaire ma le pulega, ona o le vave ona tali mai i se fa'atoga atu ona ua leai se mea e tagolima i ai le tatou Koluse Mumu e avatu i nai o tatou tagata o mafatia ia Gita. Fa'afetai o lea ua outou tali fa'atupu, fa'amalo le alofa, le pulega ma le aufaigaluega atoa. Fa'atumu e le Atua mea ua fa'agaogaoina ma ia saga fa'alauolaola pea le pisinisi."

AUKUKA SLP -FA'AAOGA MO LE TAUSIGA O I LATOU I SULUFAIGA:

O le aufaigaluega a le SLP i le a'oga a Tafuna Elementary lea ua fa'aaogaina atoa mo le saunia o taumafa mo le tausiga o e uma ua nofoia sulufaiga ua tapena e le Malo. E 12 nofoaga sulufai, ma o lo’o faaogaina ai faleaoga ma nofoaga a ekalesia i le atun’u.

"O le fa'amoemoe lea ua i ai, ia lava le taimi e tapena ai falea'oga mo le fa'aauau o a'oga a le fanau i le aso Lua o le vaiaso a sau. O le a le faigofie lenei tapenaga ae fa'amoemoe o le a lava le taimi o faia'oga e fa'avasega lelei ai latou potu a'oga a'o le'i feiloa'i ma le fanau a'oga i le aso Lua a sau,” o se tala lea a le tama'ita'i Sui Fa'atonu Fa'auifono Vaitautolu.

"Talu mai le amataga ona tausia o nofoaga o sulufa'iga e silia lava ma le 700 ipu mea taumafa e fa'atolu i le aso ona tapena ma auina atu i nofoaga uma o lo'o alaala ai le mamalu o le atunu'u o lo ua afaina o latou fale nofo i le Gita. O iinei fo'i lea e tapena uma atu ai lava latou mea taumafa fa'atolu na a'ai i le aso. Peita'i o le aso lenei, ua fa'atonuina mai ia na'o le lua 'aiga e tapena, ae mamafa uma lava taumafataga na.” o a Vaitautolu lea.