Tala I Vaifanua


O se va'aiga i le aufaigaluega a le Koluse Mumu o tau fa'asoasoa a latou sapalai ma faia fo'i fa'amaumauga o mea uma ua alofagia ai nai aiga pagatia. [ata: Leua Aiono Frost]

"OPERATION LOVE LETTER 2018" - POLOKALAMA FITAFITA O TAUA:

 

Ua fa'apolokalamaina le tapenaga o lo ua sapaia fa'atasi e le "Sosaiete a Aiga o Fitafita o Taua" le Samoa Baptist Academy i Happy Valley ma le Kolisi Tu'ufa'atasi o Amerika Samoa i le Itu o A'oa'oga o Tu ma Aganu'u Fa'asamoa, mose polokalama e fefa'asoa'i ai lagona o'otia ma lagona aualofa o pelega o soifua pea a Fitafita o taua ua maliliu, a'o tautua i tafa o taua.

 

O lea Sosaiete ua masani ona latou faia lenei polokalama talu mai le tausaga 2014, ina ia fesoasoani ai i lagona o'otia o i latou uma ua motusia le mafutaga ona tiute, ae maise lava ina ua maliliu pelega a'o tautua i le vaega au. E afua fo'i ona tu'u atu le taua'u i nai nei aiga uma, ona e le o toe faigofie le faiva o lo'o feagai ma matua o totoe i le lotoifale o aiga, aua o lo'o tausia fanau, ma ua avea o se lu'iga le faigata o tiute fa'amatua ae faia to'atasi nei.

 

O le polokalama e mua'i tatala e le Samoa Baptist Academy i lo latou sao ua ofo mai e afua i le Sauniga Lotu o le a faia lea i le Maota Tatalo a le aoga, itula e 6:00 i le afiafi, ma ua talosagaina Sui uma o Aiga o le Operation Love Letters ina ia la'ei papa'e mai, ae o so'o se tasi lava e fia auai, e le tau la'ei papa'e, e talia ma le fa'aaloalo lou sapaia o lenei fa'amoemoe.

 

O lenei fo'i tala ua tusia nei, ia avea ma se ala e fa'ailoa atu ai lenei fa'amoemoe, i so'o se tasi o lo'o fia tapua'ia fa'atasi Faiva o latou Fitafita Samoa i tafa o taua, po'o tiute fa'avaega au, ina ia auai mai, o le to'atele fo'i o e tatalo, e avea lea o se fa'amalosi'au fa'aleagaga mo nai a tatou pelega i tiute fa'amiliteri o malaga atu e fa'atino i nofoaga eseese a le vaega au.

 

O le aso 16 o Fepuari o le a fa'atasi uma ai i le Veterans Memorial Stadium i Tafuna ina ia fa'ataunu'u ai le polokalama fa'apitoa mo le tapunia o lea fa'amoemoe i lenei tausaga. E amata lea fa'amoemoe i le itula e 8:30 i le taeao.

 

A mae'a lea polokalama ona vala'aulia lea o le aofia uma e fa'atasi atu i le Army Reserve Center le aoaoga fa'apitoa e fa'atautaia lea e le tasi o pa'aga a le Operation Love Letters, ASCC Samoan Language & Pacific Studies.

 

Ua fa'ailoa e le tama'ita'i ta'ita'i o lea Sosaiete, Dr Julia Salilo Levi -Foifua, "O lenei tausaga ua ese fo'i le matagofie o se polokalama ua fa'ataoto nei, ina ia tu'umamaina ai le tiga o le motusia o le mafutaga fa'aleeaiga ona o tiute ma faiva i tafa o taua, po'o le motusia fo'i o le mafutaga ona o le tiga ma le matuitui o le oti. Ae o le fa'afetai tele lava, ona o le so'otau'au mai a le Samoa Baptist ma le ASCC Samoan Language & Pacific Studies."

 

Na ia toe fa'amalosi mai lava, "Manatu afai o e misia lava si au tama o malaga i le vaega au, po'o lou to'alua, ia malaga mai e fa'afiafiaina fa'atasi i tatou ma tu'umamaina na lagona o'otia pe a tatou fuifui fa'atasi!"

 

27 AIGA FESOASOANI I AI KOLUSE MUMU AE LE'I AGI GITA

 

E ui ina e utiuti lava le aofa'i o tagata o lo'o ofo mai le latou tautua pe ua fa'aigoaina o Volenitia a le Koluse Mumu i Amerika Samoa, ae to'a 27 aiga ua mae'a ona fesoasoani i ai talu mai le amataga o le 2018, a'o le'i agi mai le Afa o Gita lea na se'i mavae atu.

 

O lo'o ua mae'a fa'ao'o mai se fanoga ona o le tulaga fia maua o nisi e ofo atu le tau'au mo le tautua a le Koluse Mumu a le tatou malo. Afai o lava lou taimi avanoa i lou aiga, ia fa'aaoga tatau sou taimi mo lea tautua.

 

O i latou nei o lo'o ua aofia i le vaega o le aufaigaluega galulue malosi a le Koluse Mumu sa latou asia, fesoasoani ma avatu fo'i le fa'amomoli mo nai aiga pagatia nei: June Maeva, Fritz Fiatu, Sam Scanlan, Etuati Ene, Kerisiano Vaoga, Filisita Tuimoloau, Seug Su Lee o le faletua o Leilani Tilo ma le ali'i pule i galuega, Operations Manager Val V. Tuilefano.

 

O afio'aga sa o'o mai ai talosaga mo ni fesoasoani e aofia ai, Utulei, Gataivai, Fagaalu, Onenoa, Tula, Alao, Fagaitua, Nuuuli, Malaeimi, Fagaima ma Kokoland i Tafuna, ae maise foi o Malaeloa.

 

O lenei tautua sa latou o fa'atasi lava ma le vaega a le TEMCO ina ia faia fo'i asiasiga ma fa'amaumauga tatau, ina ia fa'ao'o fo'i i fafo i ni talosaga pe mata e talia mai ai se fesoasoani tau tupe e toe fa'aleleia ai falenofo ua fa'aleagaina i le suavai ona o lologa ma sologa.

 

Ona o matagi malolosi fo'i ae le'i agi lava le Gita i le atunu'u, o lea sa pa'u'u ai nisi o la'au i luga o falenofo o nisi o aiga nei ua aofia i le 27, ma ua fa'amaumau fo'i ina ia talosaga ai se fesoasoani. O mea o lo'o mafai ona taua'aoina atu e matele i lavalava , o vaiinu mama, o nisi o mea e faaaoga e le aiga mo le gaosiga o mea'ai fa'atasi ai ma sina seleni ua mafai ona fa'asoa atu mo le mamalu lautele o nai aiga pagatia.

 

Saunoa Tuilefano, "I le taimi nei, ua mo'omia lava fo'i ni lavalava e foa'i mai, aua ua amata ona leai se lavalava e aoga mo fanauiti, ae maise o mitiafu ma ofuvae mo fanau talavou. Afai fo'i o i ai ni aiga o lo'o tele le lavalava e le o toe fa'aaogaina ae o lo'o ua mae'a fa'amama lelei, ia fa'ao'o ane lau foa'i lena e aoga mo nisi o nai aiga pagatia."

 

"Ua o'o fo'i i ie afu, solo ta'ele, ma mea e fa'aaoga i le faleta'ele, ua le toe maua i le matou sapalai. Ua talosaga atu ai fo'i, ona o le tele o nai aiga, o lo'o mo'omia moega ma taga aluga, ie afu ma solo."

 

Na fa'ailoa mai e nei sui Volenitia a le Koluse Mumu fa'atasi ai ma le TEMCO, ua o'o atu i le nofoaga ma le sui na vala'au mai, e to'atele atu isi aiga lea e le'i vala'au mai ae o lo'o afaina fo'i i lologa. Ona o le tagata na vala'au e fa'amuamua lava, ona fa'ato'a fesoasoani ane ai lea i nai isi aiga tuaoi ua va'aia lava le pagatia, ae masalo e matamuli e fa'ailoa mai le tulaga o iai latou lotoifale."

 

Fa'afetaia e le Koluse Mumu a Amerika Samoa so'o se foa'i ua e taua'aoina, "Po'o se seleni i totonu o le atigiapa a le Koluse Mumu i so'o se faleoloa i le teritori, po'o ni lavalava ua mae'a fa'amama ma avane i le latou Ofisa, po'o moega, aluga ma taga aluga, ie afu ma solo, fa'afetai i lou manatu alofa i le isi ou uso a tuaoi. Fa'amanuia le Atua ia te oe."

Comment Here