RIPOTIA COAST GUARD VA'A TAFEA & PA'ULIA I LEONE

Na va'aia e nisi o le afio'aga o Leone i le taeao o le aso Lua ua te’a le pa'ulia o se va'a fagota i o latou gataifale ma ua manatu ai i latou o le a afaina le fa'asao o lo'o fa'atautaia i lo latou gataifale. Sa lipotia lea va’a i le Ofisa o Leoleo ma le US Coast Guard.

Na tau fai auai uma i ai le vaega o le ASEPA, le DOH, Pulega o le Taulaga, Coast Guard ma le vasega o Leoleo ina ia sailia lea va'a fagota i le mafuaga ua pa'ulia ai i gataifale o Leone.

Taua i le lipoti a le Coast Guard, o lea va'a fagota Chui Zai Fa No.1, e tusa o le 300 iata mai le faga i Leone, e 88futu lona umi, ua pa'ulia ae leai sona auva'a o i ai.

O le aso Lulu na taunu’u ai i Amerika Samoa le va’alele a le Coast Guard mai Hawaii, ma nisi o sui o lea vaega o le fetarale, mo suesuega i lenei va’a fagota.  Ua fa'amaonia mai e le'o i ai se suau'u masa'a i le sami i lea taimi.

E tusa ai ma se fa'amatalaga a se tasi o tama'ita'i mai Leone lea sa tele sona sao i le latou taumafaiga e toe fa'atutupu a latou 'amu i lo latou gataifale, sa ia fa'ailoa ai, "E faigata tele ona matou nofonofo ma tu'u nei ituaiga o mea e tutupu mai i lo matou gataifale, ae tele se galuega sa faia fa'atasi e i matou le autalavou a le afio'aga ma nisi fo'i o matagaluega i matou poloketi fa'asao lea e tauau fo'i ina ia toe fa'aleagaina ona o va'a fa'apenei e tia'ia i le sami ma tatafe mai ai i le matou gataifale."

"O ituaiga mea nei, lea e mafua ai ona le toe fiafia le fanau talavou e faia ni galuega fa'asao, aua e fiu fo'i e taumafai ina ia lelei se mea, ae toe fa'aleaga i nisi o mea fa'apenei e tutupu mai, talosia lava ae moni e leai se suau'u ua masa'a i le ogasami, ae o le uta fo'i a le va'a po'o fea o i ai atoa?,” se toe fa'aopoopo mai lea o se taofi o lea lava tama'ita'i.

Na fa'amaonia mai fo'i e se tasi o sui o le ASEPA, e moni lava e leai nisi i luga o le va'a, ma e le o i ai fo'i se mea e tasi lava e manogi kesi pe lalaoa fo'i i luga o le sami e iloga ai na masa'a se suau'u i lea taimi i gataifale o Leone.

O lea va'a o se va'a fagota mai Taiwan, na lipotia mai na mu ia Novema 4, 2017 i le ogasami fa'avaomalo, ma o le mafuaga lea o le tu'ua e le auva'a o le latou va'a, ma sa o ese mai ai i se latou va'a fa'aola.

Na fa'aolatia i latou uma e se tasi o va'a fagota mai Korea, lea sa latou fa'ae'eina i latou uma i se asi o latou va'a fagota lea ua mae'a taula ma o ese ai le auva'a lea i Fiti. E to'atasi se tasi o le auva'a fa'atasi ai ma le Master o lea va'a, o lo'o misia e le ma'ua se fa'amaumauga po'o fea o i ai.

E tusa ma le 30,000kalone o le diesel e tumu ai le tane kesi o lea va'a, e toe 13,000 kalone o totoe i le va'a i le taimi lea ua pa'ulia ai, masalo o se tele o lea kesi na mu ina ua mu le va'a i le sami.

Ua galulue fa'atasi uma fo'i vaega e tatau ona faia o latou sao i le galuega e mautinoa ai ua le masa'a lea kesi i le ogasami o pa'ulia ai le va'a, ma ua mautinoa e faia mea uma ina ia le afaina le gataifale ma le siomaga atoa.

O le aso Faraile ua te’a sa taofia ai su’esu’ega i lea va’a, ona o matagi malolosi mai le afa o Gita, sa aafia ai Tutuila. O le vaiaso nei e toe amata ai galuega suesue.

MOOMIA TAGATA VOLENITIA E LE KOLUSE MUMU AMERIKA SAMOA

O se toe tala mai a le susuga Val Tuilefano o le Koluse Mumu i Amerika Samoa i le aso Tofi a'o le'i a'afia i tatou i le ‘afa o Gita, "O lo'o mana'omia lava nisi e volenitia mai mo le tatou nei tautua. O le faigata o galuega fesoasoani o i ai nei, ua leai nisi e fa'atinoa galuega tau le tatou Ofisa nei."

Saunoa ia Tuilefano, ua to'atele aiga ua vala'au atu mo se fesaosoani ona o matagi malolosi ma lologa i Tututila lea na afua mai le aso Lulu, soso’o ai ma le aso Tofi, ae le’i agi le afa o Gita.

Peita'i o lea ua o'o ina lutia i tatou e le afa o Gita, ua mautinoa nei le toe fa'ateteleina o le mana'omia e lea lava Ofisa.

I le va'aiga lautele i le tulaga o le afa o Gita, sa o'o lava i le Ofisa o Emmergency Response, sa motusia le latou eletise, ma le mafai ai ona faia ni feso'ota'iga ma fafo poo iinei fo'i ma le vasega o Leitio fa'asalalau. E o'o fo'i i lea tautua, na motusia fo'i aua sa leai se eletise, ae fa'afetai mo le malosi'aga o ma'a sa mafai ona fa'atautaia ai pea le tautua i le aso Faraile i le taimi na agi malosi ai le afa.

O le motusia o fa'asalalauga ona ua motusia fa'afuase'i fo'i ma le sapalai o le Eletise ma aafia ai vaega atoa o Tafuna ma Nuuuli ona o La'au, Pouila ma Fale ua fa'aleagaina,  e i ai nai vaega o le atunu'u o lo'o fa'asaoina pea fale.

Sa va'aia sologa i atumauga ma sa afaina tele fo'i atufalega nofo o aiga o lo'o tutu ai.

Na fa'ate'ite'i le toatele i le o'o mai o le afa i le taeao segisegi o le aso Faraile ma e le'i toe mautonu ai se tasi i se tapenaga fa'atopetope o latou maota ma laoa ia puipuia fa'amalama ma mea e masani ona latou taumafai e sefe mai afa.

E tele fo'i la'au tetele ua pa'u'u ma ua suati i luga pogati, e pei o le pulu tele i autafa o le BOH i Tafuna.

E tusa o le tulaga o le suavai, ona o pamu vai ma isi galuega uma e fa'amoemoe i ai le una'ia o le suavai, na matua leai atoa ina ua motusia le eletise, atoa ai ma le fa'aleagaina o le suavai ua amata ona le mama mo le fa'aaogaina e aiga.

Fa'ato'a toe maua le suavai i le afiafi o le aso Sa e le to'atele o aiga e le o uia le suavai mai fa'atanoa a le afio'aga o Nuuuli. Peita'i o le suavai a Nuuuli mai fa'atanoa a le nu'u na toe maua lava i le taeao o le aso To'ona'i mo aiga o i ai lea sapalai.

O alatele sa to'atele lava aiga na galulue fa'atasi i le toe kilia ese o la'au i luga o alatele, ia sao atu taavale a le ASPA fa'apea ma aiga e fia o ese mai latou fale mo fa'atauga ma sailiga o le suavai mama mo latou gaoioiga i o latou lotoifale.

O se tasi lea o mea e iloga i o tatou aiga, e tutu fa'atasi ina ia mafai ona toe fa'aleleia tautua lautele. O le to'atele sa fa'aaogaina vaitafe ina ua mama mai le suavai e ta'e'ele ai ma fa'amama ai latou mea uma i o latou lotoifale a'o tatalia le toe ola mai o paipa vai.