ASOSI FAIPISINISI - TAITA'IA PAUL YOUNG

Ona ua fa'amavae le Taitaifono o le 2017 a le Asosi a le Aufaipisinisi, le susuga Taotasi Achie Soliai, na ta'ita'ia ai le Sui Taitaifono Paul Young fonotaga na fa'atautaia i le afiafi o le aso Lulu ua te’a i le Sadies by the Sea.

E tusa ma le to'a 60 sui faipisinisi sa auai ma le to'atele o i latou o au faipisinisi talavou, ma ua naunau fo'i i latou e fetufa'i i ala e mafai ona fa'amautu atili ai latou pisinisi i le teritori.

Ua fa'ailoa mai, ua mafua ona fa'amavae Soliai mai lona tofiga, ona o le tele fo'i o mataupu o lo'o tatau lava ona fa'atulaga sa'o e le Malo, ma ua fa'afaigata fo'i ona ia toe tau'avea le tofiga e fete'ena'i mataupu o a'afia ai Le kamupani o galue ma feutaga'iga o faia i le va ma le malo.

O le afioga i le faipule o le Tualauta Rep Sam Meleisea ma o le taitaifono fo'i o le Fefa'ataua'iga & Faletupe & Atina'e mo le Maota o Sui sa saunoa fa’apitoa i lea fonotaga a le Aufaipisinisi.

Sa fa'afofogaina fo'i e sui faipisinisi galuega fa'atino a le ASPA, sa tapena lea ripoti e le susuga Paul Young, fa'atasi ai ma le Bluesky Communications. O le avanoa sa talosaga atu mo le ASTCA, ua iloga mai e le'i maua mai ai se avanoa o le susuga le CEO Puleleiite Tufele ona ua fa'ailoa mai sa faia se isi a latou fonotaga taua i lea fo'i afiafi.

O le susuga Tilafau Douglas Greevy avea ma sui o le Bluesky ma ua fa'ailoa ai, "E mafua ona vaivai pe tuai ona maua le tautua initeneti i le tele o taimi, ona ua to'atele naua tagata o lo'o latou fa'auia mai a latou tifaga mai le Netlfix i le taimi lava lea e tasi."

O se tima'i mai a Young, o lo’o galue i le ASPA, "I le taimi nei, ua matua fa'aletonu lava le tulaga o le tamaoaiga tausi o le Malo, e ao ia i tatou uma le 'au faipisinisi ona taga'i toto'a i lea tulaga. O lo'o feagai fo'i ma le ASPA lea lava tulaga e tasi."

Na fa'aalia fo'i ni manatu o sui faipisinisi sa auai, ma ua latou fa'ailoa mai ai latou taofi, e le mafai ona lelei le tamaoaiga o le Malo pe afai o le faiga lenei o mea e tutupu mai i totonu o matagaluega o le Malo. O lo ua alia'i le tele o mea fa'aletonu ma ua le fa'amaoni tele tagata i o latou tofiga o tau'avea, ua faigata atili ai ona mau fa'atuatuaina nisi mo nei ituaiga o tofi e galulue ai.

O tofiga foi o le Asosi a le aufaipisinisi mo le komiti fa’afoe: Paul Young mai le ASPA; Ella Gurr - Pago Pago Trading company; Kahleena Strachan - Panamex Pacific; Genevieve Gregg - Tradewind Tours; Tom Drabble - Dateline Industries, John Wasko - Calumet Industrial Service ma Lee Stewart - McConnel Dowell.

O le a toe fono le Komiti lenei mo le tofia o latou laulauatofi o lenei tausaga 2018-2019.

AMATALIA MALAGA HAWAIIAN AIR I LE VA'ALELE AIRBUS

E amata i le po nanei ona fa’aaogaina e le Hawaiian Air i le va o Pago Pago ma Honolulu le ituaiga va’alele o le AIRBUS 300-200 ae o le a le toe fa'aaogaina 767-300 lea sa masani ai.

O le Airbus e 40 nofoa e sili atu ai nai lo le Boeing 767-300, lea sa muta lana tautua mo Amerika Samoa i le aso Faraile ua te’a.

O le suiga o lenei va'alele mo femalaga'iga o se tasi lea o tautua ua si'itia nei e le Hawaiian Air mo i tatou, ae maise e aoga mo le to'atele o le atunu'u e femalaga'i, fa'atasi ai ma le tele o uta e fia fela'ua'i i le ea.

MATAUPU FA’ATAU TUSI FOLAU A SAMOA

Mai Samoa, o lo’o lipotia e le vaega fa’asalalau i Apia fa’apea ose tasi o tagata faigaluega i le Ofisa o Femalaga'iga i Samoa, David Nomereta Uaine mai Tuana'i, ua ia te'ena ona moliga e 32 i le fa'amasinoga, i lona saunia o tusi folau ma fa'atau atu i nisi sa talosagaina.

O tu'uaiga e afua mai i le tele o tagata Samoa e alaala i fafo, ae ua talosaga mai ni o latou tusi folau e fa'auia mai ia Uaine i le vaitaimi e afua mai ia Tesema 2016 se'ia o'o mai ia Me 2017.

O nisi o moliga ua tu'ua'ia ai nei o ia e afua mai i le fa'aaogaina o fa'amaumauga sese i luga o tusi folau sa ia tapenaina, totogi fo'i ia te ia le tinoitupe ma o ela faiga ua ia solituina ai tulafono a le malo tau le talosagaina o tusi folau. O le taimi na tu'uaia ai o ia, na fa'amalolo mai ai fo'i o ia mai lana galuega i le Ofisa o Femalaga'iga.

O lea suesuega i se tasi o lo'o saunia fa'aalatua Tusi Folau Samoa ina ua mae'a tusia se tala ma fa'asalalauina i le Nusipepa a le Samoa Observer, i nisi ua talosagaina mai fafo tusi folau, ae le'i maua atu lava ni tusi folau.

FAI LE FA'AIPOIPOGA I TUPE GAOI

I se lipoti i fa’asalauga mai Apia, o lo’o fa’ailoa ai o se tama'ita'i Samoa na manatu ina ia faia lana fa'aipoipoga i Samoa ma la'u mai ai le 31 tagata o lona aiga ma ana uo mamae i lona aso fiafia, ae o tupe sa ia fa'aaogaina mo lea fa'amoemoe sa ia fa'auia mai i ala fa'asolitulafono mai kamupani e lua sa faigaluega ai i Ausetalia.

O Chritine Tupu, 26 tausaga le matua ua fa’asalaian i lona ave fa'agaoi o le $341,000 Ausetalia mai kamupani sa ia faigaluega ai Electrolux and Toll.

Ua fa'ailoa mai o ana mea e faia sa ua fa'auia ai peimeni a tagata e tatau ona totogia i Kamupani nei e lua, ae ua ia tu'uina i ai numera o la'ua teugatupe ma lona to'alua fou e fa'aaogaina e nei tagata fa'atau.

O Tupu, lea o le a lima tausaga o fa'afalepuipuia nei, o lo ua mae'a fa'aipoipo i le ali'i Tonga Hekeai Piutau i Samoa i lona aiga i Saipipi ma Siuniu i Falealili, o le fa'aipoipoga a faia ia Novema 2016, ma na faia le fa'aipoipoga tele i le St Theresa, Leauva'a.

E le o toe i ai nei se vaega o lea tinoitupe o totoe, ua mae'a ona fa'aalu uma i le tafaoga ma nonofo i faletalimalo, malaga ai i va'a ma felelei ai i va'alele, fa'atau ai fo'i le tele o meaafale.

O se mea na fa'amafanafanaina ai Tupu, ona sa to'atele sui o lona aiga sa auai ane i lona fa'amasinoga, peita'i ua matauina fo'i, o nisi nei sa latou malaga i Samoa mo lona aso fiafia e fa'aaogaina ai nei tupe e tele. I le taimi nei, e le o afaina Piutau i se tasi o nei moliga.