Ads by Google Ads by Google

Tala I Vaifanua


O le va'aiga i nisi o Tiakono Toeaiina o le Ekalesia Afoe Moega Lutu, o ia fo'i lea o le Loia a le Ekalesia mo galuega fa'apenei ma le Komiti a Toeaiina, Tiakono Toeaina Mamea Sala ma se tasi o Fa'afeagaiga. [ata: Leua Aiono Frost]

O se vaaiga i faiaoga e toalua a Marist St. Francis Elementary ma i latou e to’atolu sa saunoa fa’apitoa i lenei aoga i Lepua i le vaiaso o aoaoaga a le Ekalesia Katoliko i Amerika Samoa. [ata foai]

TATALA GALUEGA TOE FA'AFOU MALUMALU KANANA FOU

 

O le taeao o le aso Lulu na fa'ataunu'u ai le sauniga pu'upu'u ma le taua ina ia tapua'ia ai faiva o le afioga le Agaiotupu ma le falefa o le latou aiga Salemalama, lea ua toina nei i le susuga Papali'itele Lauli'i Alofa ma lana pisinisi faufale o le Paramount Builders.

 

O lea sauniga sa ta'ita'ia lava e le susuga le Taitaifono o le Fonotele a le Ekalesia Fa'apotopotoga Kerisiano i Amerika Samoa, Faife'au Toeaina Mamoe Eveni.

 

O se tala o lea galuega, ua atoa le taualuga o le Malumalu "Ua Taunu'u" ma ua fa'aaogaina ituaiga apa e mafai ona lolo'u ma ua aoga ona o le fausaga o le malumalu lenei e fa'apena lona atoapa.

 

I le talanoaga ma Eveni sa ia fa'aalia ai, "O lea ua toe fa'akonekarate le Paramount Builders ina ia toe fa'afouina le Malumalu...o le fa'ato'a fa'alua ai lenei ona fa'afou lea malumalu talu mai le tausaga na mae'a fausia ai. E tusa fo'i na'o le lua tausaga talu mai ona fa'afou muamua, peita'i ona o le tetele o matagi malolosi lea na afua ai ona ta'ei le fa'amalama tele i luma ma ua fai ma ala e ulu atu ai fo'i ma le vai i totonu i totoga o le fale. O le ala la lea ua toe fa'aiugafonoina ai, ina ia toe fa'aleleia le malumalu ma toe va'ai lelei ona apa e toe suia, ae i ai lava vaega o le taualuga e le tau toe suia fua."

 

O le galuega atoa lenei, o le a taga'i atoa lava le Paramount i vaega o le malumalu fa'atasi ai ma lona fola o le a ave'esea le kapete malulu lea e i ai, ae fa'ama'a atoa le fola i totonu. E suia ai fo'i ma nofoa uma o le malumalu, o lona uiga o le a tele lava se suiga e va'aia e le usugafono ia Iulai 2018 i le tino mai o le malumalu tele lenei."

 

O le tau na manumalo ai nei le Paramount i le tauofoga e $450,000.

 

VAIASO FA'ATAUA AOAOGA EKALESIA KATOLIKO

 

O le vaiaso lenei, talu mai le aso Gafua, sa fa’atautaia ai le vaiaso fa’apitoa o aoaoga a le Ekalesia Katoliko i Amerika Samoa - Catholic Education Week.

 

"O se tasi lava o mea muamua e mafai ona e maua i le a'oga a le Ekalesia, e le maua i a'oga a le Malo, o le a'oa'oina ai lea o le Upu a le Atua i se tasi o ana vasega i vaiaso ta'itasi. E fa'ataua lava le olaga a'oa'oina i le Tusi Pa'ia,” o se tala lea a se tasi o faia'oga a le Ekalesia, Marist St Francis Elementary School i Lepua.

 

E iloga fo'i le maualuga o le la'asaga o lo'o o'o i ai a'oa'oga a le fanau o lo'o a'o'oga i a'oga a le Ekalesia Katoliko, e mafua lea, ona o latou faia'oga sa auina mai fafo, peita'i o lenei vaitaimi ua fa'aaogaina lava faia'oga i le atunu’u.

 

O nisi o polokalama o fa'atautaia i a'oga ta'itasi e lima a le Ekalesia Katoliko e aofia ai Montessori e lua: Mary the Mother i Atuu ma le Hope House Montessori i Fatuoaiga; o Elementary Schools e lua lea e aofia ai Marist St Francis i Lepua ma le St Theresa i Malaeloa Pope Paulo ll, ae maise o le A'oga Maualuga e tasi Fa'asao Marist High School i Lepuapua Leone; ua fa'atalatalanoa nisi o tama fanau a Amerika Samoa ua iloga a latou taumafaiga i galuega o lo'o galulue ai, ma ua tatau fo'i ona fa'apea ane, "Ua fa'amanuiaina latou taumafaiga."

 

O nisi o nei sui ua aofia ai le tama'ita'i o Fatima Langkilde ma Lusia Bartley - o nisi o tama'ita'i sa tauva i le tofiga Faipule mai o la'ua afio'aga o alaala ai. Peita'i, e le'i fa'amanuiaina.

 

Na vala'aulia i la'ua nei e saunoa fa'apitoa i le Marist St Francis Elementary, lea e a'o'oga i ai le to'a 146 o fanau a'oga a le atunu'u.

 

Ua fa'ailoa mai fo'i e le Ofisa o le susuga le Taitai o le Ekalesia lea, Epikopo Peter Brown, "O le a i ai se taimi ona fa'alauiloa lea o le aoga o nei a'goa uma i le atunu'u e ala i taumafaiga a nisi o le fanau o lo'o a'oa'oina i a'oga a le matou Ekalesia, aua e moni lava le tala, e iloga le la'au i lona fua!"

 

O lo'o tapenapena e le latou Ofisa autu le tele o tauvaga o lo'o tausinio ai fanau a'oga i le teritori, ma va'ai pe tua mani taumafaiga a fanau a'oga i latou a'oga tulaga muamua ma le lua.

 

I folasaga sa fofogaina e Bartley, sa fa'ailoa e ia le agaga fa'a-Katoliko, e tumau le fa'avae o le fa'akerisiano, e le maluelue. E ui fo'i ina tetele mea e fa'afeagai ma le tagata soifua e ola tauva fa'apolokiki, ae le tu'ua ai le alu e saili le filemu o le Atua e onosa'i ai i mea tiga.

 

"O le ituaiga taua lena e le faigofie, e matua o'o mai le tiga o le faiai ma o'o mai ai le tulaga fia lalau atu i lea ma lea, ae se'i e manumalo ai. Peita'i o le finagalo o le Atua na a'oa'o mai ai a'o la'ititi, ia ola fa'amagalo atu i nisi, ona fa'amagalo fo'i lea o oe e le Atua. Ia e onosa'i i mea e tiga ai, ona e maua lea o le manuia o le Atua.”

 

O le aotelega o fanau o lo'o a'oa'oina i a'goa a le Ekalesia Katoliko Roma ua fa'ailoa mai: Montessori Mary the Mother e to'a 46 fanauiti o i ai; Montessori Hope House i Fatuoaiga e 71 fanau iti o i ai; Marist St FRancis i Lepua e to'a 146 fanau a'oga o i ai; St Theresa i Malaeloa e to'a 121 fanau a'oga o a'o'oga ai ma le Fa'asao Marist High School e tasi lava a le Ekalesia ua a'oa'oina ai le 310 o fanau a'oga talavou.

 

I tausaga ta'itasi fo'i e fa'ao'o atu ai e le malo i ona ta'ita'i ma le matagaluega o a'oga le fa'afetai i lea fo'i Ekalesia ma lona sao i le a'oa'oina o alo ma fanau a le atunu'u lautele, e le faigofie lea faiva i le Malo, ae fa'afetai i le lagolagosua a nei fo'i Ekalesia ua fa'atautaia a'oga, ona o le latou tau'au i lea tautua e aoga tele i le lumana'i o so'o se malo lava i le lalolagi atoa.