TOLOPO TAIMI MA’EA GALUEGA UAFU I FAGATOGO

I le taimi nei  e le’i mae’a lava le uafu, i lona vaega o lo’o toe fa’aleleia ma o lo’o fa’akonekarate ai le Fletcher Construction. I le taimi na suaina ai le eleele e amatalia ai le galuega toe fa’aleleia o lea itu o le uafutele, sa faatulaga ai e tatau ona mae’a lelei lea galuega ia Novema 4, 2016.

Ina ua fesiligia le Sui Fa’atonu o le Matagaluega o Uafu ma Malaeva’alele Gus Godinet e tusa o lea galuega, ae ua ia fa’ailoa mai, “O le galuega lena ua tu’uina nei e tatau ona mae’a lelei ia Aukuso o lenei tausaga.”

I tulaga o galuega fa’apenei, e mafai lava ona taofia le tumau le fa’atautaiga o galuega pe afai ua le lagilelei le vaitau o fa’atino ai tiute o le au kamuta ma Inisinia. Ina ua fesiligia fo’i le Fletcher Construction, ae ua fa’ailoa mai e le sui o lea kamupani, e le mafai ona tu’uina mai e i latou se tala i le galuega, ae fesiligia sa’o pea le vaega o le Uafu ma le malae va’alele i lona pulega i mafuaga ua le maua ai le taimi na fa’atulaga e mae’a lelei ai le galuega.

AMERICAN SAMOA COMMUNITY CANCER COALITION “PO FIAFIA”

Ua fa’atulaga le po fiafia a le American Samoa Community Cancer Coalition (ASCCC) e saili tupe e fesoasoani atu ai i le mamalu lautele e taulosagaina se fesoasoni tupe mo latou togafitiga, poo le totogia fo’i o latou passe e malaga atu ai mo latou talavai i nu’u i fafo. O lea fa’amoemoe o le a faia i le Ta’alolo Lodge i le itula e 5 i le afiafi aso Faraile nei - Fepuari 17, 2017.

O le ulufale e ta’i $10 a le tagata ulufale ma e tele fo’i se pa’u o mea inu ae maise e i ai pupu e tufaina mai.

“O lenei fa’amoemoe, ua fa’atula’ia, aua ua mautinoa lava e mana’omia e le mamalu o le atunu’u o lo ua maua i lenei gasegase fita le fesoasoani, ma e tatau fo’i ona faia se galuega a le ASCCC latou ina ia fa’atupe ai foa’i mo le mamalu lautele,” o se tala lea a Rochelle Reid, peresitene o le Coalition.

O le ASCCC o se tasi lea o Fa’alapotopotoga o lo’o maua mai a latou fesoasoani tupe i le Neil’s Ace Home Care i fa’aiuga o tausaga ta’itasi. E tuufa’atasia e lea kamupani foa’i tupe mai le mamalu lautele o latou tagata fa’atau, ae maise fo’i o le latou toe fa’aluaina o lea aofa’iga o foa’i, ona taua’ao atu i le ASCCC e latou te fa’o’o atu ia i latou o talksaga ane ni fesoasoani tau tupe mo latou talavai ma Pasese i Hawaii po’o NIu Sila mo latou togafitiga. E ese mai lea, sa faia fo’i i ai le foa’i a le “Le Afi” o le Kamupani Kesi i le tatou teritori, ina ua mae’a le latou Ta’amilosaga Tapolo i le faai’uga o le tausaga ua te’a.

“E matou te fa’afetaia le agalelei o nei pisinisi, aua e tofusia i latou fa’amanuiaga mai le Atua alofa, aua o lo’o latou foa’i ma le loto i tagata lautele o lo’o i ai le mana’omia ona o le pagatia i gasegase o le tino, le ma’i fita o le Kanesa,” o a Reid lea.

FA’ATALANOAGA VISA MO AMERIKA

Ua fa’alauiloa mai le vaitau ua toe tatala ai le faitoto’a o le Ofisa o le Emepasa Amerika mo talosaga mo ni pemita e ulufale ai tagata Samoa i totonu o le Iunaite Setete o Amerika, lea ua tula’i mai o Mati 13 se’ia o’o ia Mati 17, 2017.

O i latou ua e fia auai i le Ofisa o le Emepasa o Amerika i Apia ina ia talosagaina se visa, ua tatau ona e fa’auluina lau talosaga i le Emeli: ApiaConsular@state.gov  e afua mai ia Fepuari 28, 2017 i le 12:00 i le aoauli (i taimi tau Samoa). Afai o oe sa i ai muamua sau talosaga a’o le’i oo ia Fepuari 27, 2017 i le tatou taimi Amerika Samoa, ua tatau ona e toe faauluina lau tausaga fa’afou i lea lava aso ua ta’ua i luga.

O talosaga uma na fa’aulu ae le’i oo ia Fepurai 27, 2017, ua e silafia nei ua fa’aleaogaina. Toe fa’afou lau talosaga ma fa’aulu i le emeli i le aso ua tagua i luga. Ua fa’ailoa mai fo’i, “Aua lava ne’i e manatu e te savali atu e pei o le mea masani ai i isi ituaiga visa, ma lau talosaga i le Ofisa o le Emepasa Amerika, ina ia talosagaina ai sou avanoa e faia ai lau fa’atalatalanoaga o sou visa, e le talia lea tulaga. Ua le talia foi se telefoni atu mo se talosaga ia fa’atulaga ai sou taimi e fa’atalanoa ai lou visa.”

Pe afai o le a fa’aulu atu lau talosaga mo se visa i le taimi sa’o, o le a toe tali mai i lau Emeli le Ofisa o le Emepasa Amerika e fa’ailoa mai ia te oe le aso ma le taimi e fa’atulaga ai lau talanoaga ma le latou Ofisa ina ia talosaga ai lou visa e te ulufale ai i Amerika.

Ua mana’omia e lea Ofisa le 72 itula mo i latou e fa’atulaga ai lau talanoaga ma le latou Ofisa mo sou visa, ma o le a fa’asolo lava nei avanoa mo ia aso uma i le fa’asologa o le vave ona fa’aulu atu o lau talosaga i le Emeli a le Emepasa Amerika ua i luga:ApiaConsular@state.gov