AMATA AOAO SUISUI A LE TAOA SCSEP

Ua amatalia le Aoga Su'isu'i a le TAOA SCSEP i Pago Pago ma e to'a 33 i latou ua fa'atulaga e auai. O i latou nei o le a vaeluaina i vasega e lua, e ta'itasi fo'i le vasega i le vaiaso mo nei vasega uma e lua.

O le aso Lua ma le aso Tofi ua fa'atulagaina e faia ai nei vasega e lua, e le tamaita'i faia'oga su'isu'i a le FCS/CNR ASCC Land Grant o Diana Tarrant. E pei ona fa'ailoa mai e le tama'ita'i pule i lea polokalama a le TAOA SCSEP Merieni Gutu, "O lea ua mae'a sainia le maliliega po'o le feagaiga a le FCS/CNR ASCC Land Grant ma le matou Matagaluega ina ia fa'atautaia nei vasega i le 4 tausaga. A mae'a lea taimi atoa, ua tatau ona mafaia e le tina poo le tama fo'i e fia iloa lea taleni, ona fua lona tino, tipi lana sikaili o mana'o e su'i ma toe su'ia mo ia lava!"

O lea faiga, ua fa'ailoa mai e fa'asaoina ai le tamaoaiga tausi o le aiga, e mafai fo'i ona fa'atauina latou ofu ma ie lavalava po'o puletasi fo'i e suia i le latou faleoloa o galuega taulima o loo gaosia e le vasega o matua uma o aofia i le polokalama a tagata matutua i le atunu'u.

I le taimi nei, e faia fo'i e tagata matutua ie elei vali, ma ua fa'atautau ai mo le fa'atauina atu i le nofoaga tumau i Pago Pago.

Afai fo'i o le a matua lelei lava tomai suisui o tama ma tina matutua, e le toe fa'aitiitia fo'i oloa fa'atau atu i le latou faleoloa lea.

E tolu masina lea o le a faia ai le ulua'i vasega amata o le suisui, ma sa va'aia le pisi o le vasega o le aso Lua i le fuaina o latou tino ma fa'amaumau ina ia oti aga'i i ai latou lavalava e su'ia.

Fa'aalia le agaga fiafia o Tarrant ona o lea avanoa mo le fa'asoa atu i ai o lana taleni o le suisui. "O se mea lelei le ola fa'asoa atu o se mea lelei o ia te oe. O le taleni na foa'i mai e le Atua, e tatau lava ona tufa atu, ia fa'aauupegaina ai nisi tina e to'atele ina ia aoga i latou aiga, po'o i latou lava fo'i. E le gata i lea, afai e te fa'asoa atu, e le mapu fo'i le foa'i mai e le Atua ia te oe o lea tomai, na te fa'alauteleina fo'i mo oe ina ia fa'aauau ona e faia na galuega lelei."

SAUNOA FA'APITOA FAIPULE MELEISEA FONOTAGA CHAMBER

O le ali'i Faipule o Sam Meleisea, le taitaifono o le Komiti o Fefa'atauaiga o le Maota o Sui, o le a saunoa fa'apitoa i le fonotaga a le Chamber of Commerce (CoC) po'o le fa'apotopotoga a le Aufaipisinisi, i le afiafi nei i le Sadies y the Sea.

I le fonotaga lea ua manatu le CoC e vala'aulia fa'atasi le ASTCA, ASPA ma le Bluesky Communications ina ia mafai ona folasia a latou fuafuaga fa'ataoto mo tautua i le atunu’u.

Ua fuafua fo'i o le ulua'i fonotaga lenei o le 2018 e faia ai fo'i ma filifiliga tofi e tutula'i mo lenei tausaga atoa, fa'atasi ai ma le fa'auluina atu i totonu o nisi sui totino fou.

Ua fa'amanatu mai, e na'o sui lava o lo'o ua mae'a totogia le avea ai ma totino, e taulia a latou palota.

Ua fa'ailoa mai e mafai ona tusia lau palota mo sui o le Komiti Fa'afoe ma fa'ao'o ia John Wasko o le CoC. Ua mafai fo'i ona talia talosaga mo so'o se sui e te sapaia i le komiti fa'afoe. E fa'aulu atu ai fo'i ma sui e te fia sapaia i le laulauatofi i lea lava faiga e tasi.

10 ALIA SAUNI FA'AFOU E LE NOFOAGA TOSO VA'A I SATALA

Ua fa'ailoa mai e le pulega a le Mea Toso Va'a i Satala, ua mae'a sainia se ma le Matagaluega o le Puipuiga o le Gataifale ma le Vaomatua (DMWR) e fa'ao'o atu ai le isi 10 Alia fagota ituaiga o Catamaran lea e lua aga, ina ia toe fa'afou mai e le latou vaega.

O le toe soso'oga lea o le maliliega muamua na fa'ao'o atu ai fo'i isi Alia Fagota muamua mo le toe fa'aleleia.

"O le 10 va'a lea na fa'aleleia muamua ua mae'a taua'aoina atu i e ona nei alia fagota, ma ua fa'ailoa mai fo'i le agaga fiafia o nei tautai i le galuega lelei ona fa'atino e le matou aufaigaluega,” o se tala lea a Moefa'auo Bill Emmsley, fa'atonu o lea itu o le tatou malo.

O lea fo'i galuega na fa'apa'aga atu ai le DMWR mo le Mea Toso Va'a, o se taumafaiga lea na fautuaina e le afioga Kovana Lolo Moliga ina ia galulue fa'atasi fa'auluuluga o tautua eseese a le Malo e fesoasoani i isi matagaluega e mafai ona feso'ota'i latou tautua lautele o i ai, ina ia le sisi le tasi matagaluega ae ua matua manuia lava le isi itu.

Ona sa mana'omia ni galuega e fa'atino e le Mea Toso Va'a ina ia fa'aauau fo'i le latou tautua, o lea sa fa'auia loa i ai lea mana'oga o le DMWR, mo alia e tatau ona lipea.

E ao fo'i ona silafia e le atunuu lautele, o le Mea Toso Va'a e le totogia e le Malo ana aufaigaluega, e totogia lava e i latou a latou tagata faigaluega mai tupe e maua i galuega o lo'o latou faia.

O le maliliega i le va o le DMWR ma le Mea Toso Va'a e fa'aauau pea, aua o lo'o tele fo'i va'a a lea matagaluega e ao ina lipea pe a i ai ni mea e fa'aletonu ai. Ua taumafa fo'i ona fa'alauiloa atu le tautua a le Mea Toso Va'a i nisi o malo o le Pasefika. O le isi malo e mafai ona fa'aleleia va'a ma lipea o Fiti, ae a misi loa ona fa'ao'o loa lea i Niu Sila.

"E fa'afetaia fo'i le Malo o Samoa, aua o lea e fa'aaogaina lava i tatou iinei mo a latou galuega lipea i o latou va'a, Fotu o Samoa ma Lady Naomi, e sau lava le va'a e fai lona galuega lipea ma aumai le siaki peimeni, o se mea matagofie lena mea i taimi uma e fa'ae'e ai le Sa folau i luga o le tatou Mea Toso Va'a nei.” o se isi lea fa'amatalaga a Moefa'auo.

Ua i ai pea le fa'amoemoe, e tatau lava ona fa'atino pe fausia sa'o e le aufaigaluega a le Mea Toso Va'a le "Va'atele" lea lava e le'i fausia a le tatou Malo. O lea galuega o lo'o taofiofia pea e le DOC i le taimi nei, mo se fa'atupega e fausia ai, ae o ata o lea va'a, ua mae'a umia pepa uma, na tapena e se tasi o Kamupani Fau Va'a i Seattle, Washington.

"O lo'o i ai le fa'amoemoe e tauofo fo'i le matou matagaluega pe a o'o ina tauofo le fausaga o le "Va'atele" o lo'o ia i matou masini, mea faigaluega ma le tomai e mafai ai ona fa'atino lena poloketi,” o se toe fa'aopoopo lea a Moefa'auo Emmsley i lena mataupu.