Ads by Google Ads by Google

Tala I Vaifanua


Le tina o Niukini Matamu - Luani ma si ana tama 23 tausaga le matua, Shalom Luani mai le Oakland Raiders e ta'alo ai i le NFL i le ta'aloga Football. O Shalom na amata mai lona soifua, e ta'alo i le Soccer, peita'i, na o'o loa lana a'oga i Fagaitua High, ona avea loa lea ma Quarterback a le Vikings Star. [ata: Leua Aiono Frost]

SHALOM LUANI - RAIDERS MONI LAVA - ASIASI MAI I AIGA:

 

Ua toe asiasi i le atunu’u le ali'i talavou, Shalom Luani o Masausi, ae ua fou se la'asaga ua o'o i ai lana taumafaiga ina ua avea o ia ma se tasi o tama ta'alo a le Raiders mai Oakland, Kalefonia.

 

O ia o le alo o le tina o Niukini Matamu Luani mai Pata i Falelatai ma le tama o Penitio Luani mai Samusu Aleipata i Samoa ma Masausi, Amerika Samoa. E le galo ia te ia lana Ekalesia Fa'apotopotoga Kerisiano i Masausi, i ona matua faaleagaga ma lana autalavou, le aufaipese ma le A'oga Aso Sa.

 

"O le olaga na ola a'e ai, e le mafai ona galo. E tutusa le ola taumafai o tagata uma, le alolofa i matua ma aiga, e le mavae lea, e taumafai i le mea sili e tau si'itia ai se olaga o le aiga i le lumana'i, e tumau lava lea i le loto ma le agaga i taimi uma. E atili ai ona lu'ia le loto e taumafai pea,” o sana tala lea e tusa o lana taumafaiga e afua mai ina ua mae'a lana a'oga maualuga i Fagaitua High, ma ua le maua se sikolasipi e totogia le a'oga, ae ua lava ma totoe le iloa i fa'agatama e taumafai ai.

 

I le amataga mai o lona taumafai i le Kolisi Chaboot College, na taumafai fa'atasi i latou e to'a 20 na nonofo fa'atasi, ma tau saili avanoa e maua ai ni Kolisi e fa'aaoga ai latou iloa i le football. Ina ua le toe nonofo fa'atasi i latou nei e to'a 20 na mafai ona auai o ia i le vaega o i latou na taumafai e ulufale i le San Francisco City College, lea na maua ma ua mafai ai ona piki e ulufale i le Washington State University (WSU) lea e faia'oga ai le ali'i Amerika Samoa, Joe Salave'a i le au football.

 

Na fa'atasia fa'atasi o ia ma uso mai Amerika Samoa e to'aono, ma ua mafana le nonofo ma ta'a'alo mo le WSU lea ua toe fili fa'apitoa mai ai nei o ia e le Oakland Raiders mai Las Vegas. I le WSU, na tofia Shalom e avea ma Kapeteni i le latou tausaga lona lua 2016.

 

Na iloga mai e tele ina mafaia e Luani ona iloa le ta'alo o foufou mai a le isi 'au, o se taleni ua matauina ia te ia e le to'atele o ona faia'oga, ma ua avea ma se mea ua mautu ai lona filifiliga e le Raiders. Talu mai le latou camp ia Me 2017, na mautinoa mai ai, e lelei tele Luani i le mea e aga'i i ai le polo, ma e tele ina ia mauaina le polo.

 

O alo o Niukini ma Penitito Luani e to'aono, e laititi ai lava Shalom i le fanau tama e to'atolu ma teine e to'atolu. E matua lona tuafafine, lea sa na'o i la'ua na mafai ona motu mai i Amerika e taumafai saili se lumana'i manuia o si o latou aiga.

 

"E ui ina umi le ala, e faigata fo'i pe a toe tepa i mea na tauasa mai ai, ae sili atu ona faigata le ala na uia e matua i le taumafaiga ona tausi, fa'aa'oga ma toe fai uma fa'alavelave fa'aleaiga, ae tainane le tautua i le Ekalesia e fa'auia ai auaunaga i le Atua ae a se manuia mo i matou uma. Lea ua maua le avanoa e fa'amanuia mai ai le Atua ia te a'u ma la'u sailiga, e muamua lava le fa'afetai i le Atua i mea uma. Fa'afetai i matua ona o le tausiga, le alofa ma le fa'atonu e le motusia ia manatua le Atua ma lana amiotonu. E ui la ina e le tonu i taimi uma le atali'i, ae ua fa'amanuia le Atua i le a'oga, soso'o ai ma le ausia o lenei sini sa fa'ataoto ma tatalo ia mautu, o le fa'afetai e ao ina matua fa'ateleina,” o se tala lea a Shalom.

 

O lana asiasi mai, o fa'alavelave tau le aiga, ae maise o le toe fo'i mai e fa'afetaia nai ona matua fa'aleagaga ma le Ekalesia ae maise le tapua'iga le mavae a nai ona matua ma aiga. O lea o le a sauni mo le isi vaitau o ta'aloga e koleni fa'apitoa atu aga'i i ai, ae ua fa'afetaia e ia manuia ua ia maua i lenei vaitau.

 

Mo le tupulaga talavou o tausaili avanoa i kolisi ma Iunivesite ina ia mafai ona ausia nei avanoa i le NFL, ua ia fa'asoa mai ai, "E le faigofie le ala, ae matua fa'afetaia ona manuia pe a o'o ina e mauaina. O se avanoa fo'i e te toe fa'afo'i ai se mea sili mo nai ou matua ma aiga, ae maise o le galuega a le Atua i fata faitaulaga o tatou tapua'i ai. Aua ne'i vave mou lou fa'amoemoe, ae ia tausisi i le fa'atonuga a ou matua ma ia usiusita'i lava, e le vale sou taui. E le tofu i tatou ma ni avanoa fa'asikolasipi, ae mautinoa, e i ai isi ala e maua uma ai lava le sini o fa'amoemoega! E le'i faigofie fo'i ona ou maua lenei avanoa, ae mautinoa sa ou taumafai ma le tiga!"

 

Na toe tu'ua e Shalom lona aiga mo le fa'aauauga o lana taumafaiga i le Oakland Raiders ua maua ai nei e ia le #26 ae a le amataga o le vaitau o ta'aloga o soso'o mai.

 

TULAGA FA’ALETONU CI E FEMALAGAI AI - TALOSAGA TUSI FOLAU

 

I le taimi nei e to'atele tagata ua fa'ate'ia i le oo atu e taumafai o latou Certificate of Identity (CI) e faimalaga ai i Amerika, ae ua poloka mai, ua le toe mafai ona fa'aaogaina ni CI mai le Ofisa o le Loia Sili.

 

"I le taimi nei, ua toe tuuina atu le isi vaiaso e tasi ina ia taumafai ai le suiga, aua na mua'i fa'ailoa mai e le Matagaluega o le Saogalemu Fa'alotoifale [Homeland Security] ua le toe aofia le CI i ituaiga o ID po'o pepa fa'amaonia e talia e le TSA ina ia femalaga'i ai tagata mai le tatou teritori nei e ulufale atu ai i Hawaii ma Amerika,” o se tala lea a se tasi o sui sinia o le Ofisa o le Loia Sili.

 

"I le taimi nei ua toe tu'uina atu i le aso 05, Fepuari 2018 ina ia tamau ai lea fa'asa, ma o i latou uma sa fiafia e talosaga o latou pepa CI mai le Ofisa o le Loia Sili e malaga ai i Amerika po'o Hawaii fo'i ma le Malo Tuto'atasi o Samoa po'o nisi malo o le Pasefika, ua le toe talia nei talosaga mo ni CI ae ua na'o Tusi Folau e talosaga sa'o i le falemeli tele i Fagatogo, e mafai ona malaga ai tagata Amerika Samoa uma,” o sana toe fa'apupulaga lea e tusa o le taimi o totoe nei mo CI.

 

Mai le Ofisa o le Saogalemu Fa'alotoifale, sa latou fa'ailoa mai, "O le matou Ofisa e pau le mea e ao ina faia, o le usita'ia lea o le faamalosiga ua tu'uina mai fafo ina ia fa'atautaia ai galuega. Ua o'o mai tusitusiga ma ua fa'amalosia mai e le fa'aaoga atu o Tusi Folau. Ona o le saogalemu lautele o lo ua tatau ona mataituina e le USHomeland Security, o lea ua tatau ai ona fa'avave ona fa'amalosia le fa'aaogaina o Tusi Folau. O isi ituaiga ID uma sa masani ona fa'aaoga, o lea ua taofia ona toe fa'aaogaina e o'o lava i Laisene Aveta'avale."

 

Sa i ai a kamupani va'alele ma i latou e tusi pasese o tagata femalaga'i, sa latou taliaina laisene ave ta'avale ma isi ituaiga ID e talia ai tagata feoa'i, ae ua toe fa'amamafaina lava na'o Tusi Folau ma ID tusi folau, e mafai ona fa'atautaia ai latou galuega.

 

O lenei tima'iga ua fa'amamafa ina ia mautinoa lava le sui o faimalaga, o le tagata moni lea e ona fa'amaumauga ua va'aia ma fa'ataga e faimalaga.

 

O lenei fo'i se avanoa e tima'ia ai le mamalu lautele o lo'o fia malaga i le masina fou, ina ia vave ona talosaga tusi folau ina ia gafatia ai ona faimalaga. Manatua fo'i, afai ua tauau ina uma le taimi e aoga ai lou tusi folau, ua le toe atoa se 6 masina o totoe ona le aoga lea, e le toe mafai fo'i ona e ulufale ai i atunu'u e ese mai Amerika pe afai o oe o se Nesionale o Amerika.”

 

E le'i maua se avanoa e talanoa mai ai le susuga le Loia Sili e tusa o lenei mataupu.