Ads by Google Ads by Google

Tala I Vaifanua

OSOFA'I ST. THERESA MA AVE SIPIKA TETELE E LUA

 

I le fa'aiuga o le vaiaso na te'a nei, na osofa'ia ai e nisi le falea'oga o le St. Theresa i Malaeloa Pope Paul ll po'o le Malisi Tuai ma ave 'ese mai le Computer Laboratory sipika tetele lava e lua, e tatau ona to'a fa tamaiti talavou e si'ia fa'ato'a mafai ona ave.

 

O se tala faanoanoa mai le tama'ita'i pule, Kathy Taleni, sa ia fa'ailoa mai ai, "Ona ua pau fo'i lea o se fa'aiuga o se vaiaso ua ou le sau ai i le falea'oga tatala ma fai ai ni a'u galuega, ua manatu fo'i ia faia se aoga i le fatuaiga latou, ae ua o'o mai ai i le aso Lua, ua mavae atu le fa'aiuga umi o le vaiaso, ua osofa'ia le matou falea'oga, o i le Coputer Laboratory, ma 'avea nei sipika matua tetele."

 

O lo'o maofa le tama'ita'i pule ona e le gafatia e se talavou se to'atasi ona si'i le mamafa o le sipika lea, ae lua lea ua avea. O nei fo'i sipika e na'o na teu ai i le potu o Komipiuta ae fa'aaoga i le taimi o tu'ufa'atasiga a le Aoga, po'o ni fiafia po'o fa'au'uga, ae o lea ua si'i fa'atasi e nei tagata talepe fale.

 

Ua mae'a se lipoti a leoleo i lenei mataupu ma ua fa'autagia fo'i e leoleo le aoga ina ia mataala ma fa'alogo i talanoaga a le fanua a'oga, ina ne'i mao masalo i nisi mai mamao, ae o se tasi lava latou te iloa lelei nei mea totino o lo'o aofia i lenei soligatulafono.

 

"O le tau o nei sipika e $1,200 i le sipika e tasi, peita'i, e leai lava se isi mea o fa'aleagaina o le potu o masini pe avea fo'i. Pau le mea na matauina sa matala le faitoto'a i tua o le falea'oga, aga'i mai le tagata i le sitepu aga'i i luga talepe le puipui o le potu komipita e oso atu ai i totonu. O le toe ave'esea o sipika nei, sa matala le faitoto'a o le potu komipiuta e pito i luma, o iina na si'i ese atu ai ma avatu ai i lalo i se ta'avale o fa'atali mai ai. E le mafai ona sa'esa'e atu e nisi e to'a fa pe to'alua se sipika fa'apena, e iloa mai lava e le lalolagi uma o avatu,” o se isi lea fa'amatalaga fa'aopoopo mai a le Taleni.

 

Ua fa'ailoa atu ai fo'i i le mamalu lautele, aua o lo'o matele mea e gaoia e i latou o talepe fale i Sipika po'o masini taugata e mafai ona fa'aaogaina e i latou e maua ai le Initeneti. A i ai fo'i se pisinisi po'o se aiga e fia fa'atau atu i ai e se tasi ni sipika tetele ituaiga o le Pevey, o lea ua silafia ua gaoia atu nei Sipika a le a'oga a St. Theresa.

 

MOLITA'I VA'ALELE A LE TALOFA AIR NA LEAGA LE KIA

 

Ua maea ona toe auina atu i Samoa le va'alele 9 nofoa a le Talofa Air lea na i ai ni faaletonu i le taimi na tulaueleele ai i le malae va'alele i Pago Pago nei i le aso Tofi ua te'a.

 

O le toe avatuga o lea va'a i Samoa ina ia toe fa'aleleia atili ae o lo'o i ai le va'alele lona lua a le Talofa Air o lo'o fa'aaogaina fo'i mo ana femalagaiga i le va ma Tutuila fa'apea fo'i ma le Malo o Tonga.

 

Ua mae'a fa'ailoa mai, na tu laueleele lelei lava le va'alele i le Malae i Fagali'i i Samoa e le'i toe i ai se fa'aletonu i lana malaga lea, ina ia toe fa'aleleia se mea na leaga.

 

Ua mae'a fa'ao'o le lipoti i le FAA e tusa ai o lea fa'aletonu, peita'i ua mae'a fa'ailoa mai fo'i le tala aloa'ia a le FAA, o le mea na tupu i lea malaga a le Talofa Air e le o se fa'alavelave fa'afuase'i e ao ina fa'ailo e ono lamatia ai le soifua.

 

O le tala mai, o le kia o le va'alele na leaga ao aga'i mai i e tu'u ese le pasese, ae ua mae'a tulaueleele.

 

Ua fa'ailoa fo'i e le sui o le FAA Ian Gregor, "Ua mae'a lipotia mai e le Talofa Air le fa'aletonu, ma ua faia fo'i le suesuega a le FAA.”

 

Ona o se tasi o ali'i Senatoa sa i luga o le va'alele i lana malaga na tau fa'aletonu, o lea sa vave ai ona o'o i iloiloga a le Maota Maualuga se fa'asea, e le'i vave ona o'o atu se galuega fesoasoani a le Pulega a le Malaeva'alele i le taimi na tupu ai lenei fa’alavelave, ma ua avea fo'i ma se lape i le auaunaga a le Matagaluega o Malaeva'alele ma Uafu.

 

11 TA'AVALE A LE MAO TAOFIA SIAKIGA A LEOLEO

 

O le siakiga o ta'avale a le Malo e le Matagaluega o le Puipuiga o le Saogalemu Lautele na fa'atautaia I le aso Faraile na te'a nei i Pago Pago, ua taofia ai le 11 o ta'avale mai le toe femalaga'i, aua o nei ta'avale e le o lesitalaina ma laisene mo lenei tausaga ua amata.

 

E tusa ai ma le fa'amatalaga a le ali'i Komesina o Leoleo, sa ia fa'ailoa ai, "O lenei siakiga o ta'avale a le Malo, o le toe siaki lava po'o ua mae'a ona faia le galuega mo ta'avale a matagaluega taitasi aua o lo'o matele lava ina galo ona fa'afou le laisene o ta'avale ae o lo'o fa'aaogaina lava i galuega ma feoa'iga i alatele."

 

"O le tiute lava lea e fai o le DPS ia mautinoa o lo'o ave'esea mai ta'avale e le'i lesitalaina ma Laisene mai luga o le alatele,” o se toe fa'aopoopo mai lea a le Komesina.

 

O lenei vaiaso, e o'o ai le siakiga o ta'avale a le malo i le itu i sisifo.

 

FANAU SA AUINA ATU I LE JPS I HAWAII

 

O le afiafi o le aso Gafua na toe taliu mai ai fanau a'oga sa auina atu i Hawaii e tauva i Ta'amilosaga a le JPS i ta'aloga Football ma le Volley Ball. O latou ta'aloga sa alofaiva i ai na manumalo ai Hawaii West i le tatou All Stars i 'ai e 23-21. Peita'i o le tatou 'au football a tamaiti 7 & 8th Graders na manumalo ia Hawaii West i 'ai e 22-8.

 

O le tatou Au a Teine Volley Ball na o'o lava le latou taumafai i le ta'amilosaga e saili ai le Auro ma sa latou mauaina le tulaga tolu i le to'afa maualuga lea na saili ai le Siamupini o lenei tausaga.

 

O le tama'ita'i o Cher Nomura sa ia mauaina le fa'ailoga o le ta'alo lelei i le Volley Ball, o Cisco Mauigoa na ia mauaina le ta'alo lelei i le Football Division 1 ma le susuga Tala Sufia sa ia mauaina fo'i le fa'ailoga o le ta'alo lelei mai le vasega o tama ta'a'alo vasega 12 i lenei tausaga.

 

O lo'o malaga mai fo'i le tatou 'au Football Division 1 ma se fa'ailoga fa'apitoa na taua'aoina ona o le auai atu i lenei tausaga ma le mataina fo'i o le latou ta'a'alo malosi na fa'ailo i a latou ta'aloga na maimoaina.