Tala I Vaifanua


I latou na aofia i le a'oa'oga fa'apitoa a le "INSPIRE" lea sa fa'atautaia ia matauina ai aga ma uiga o so'o se Kanesa atoa ma ala e te fa'amama avega atu ai ia i latou o a'afia ai. Sui na auai i le fa'atasiga i le Tradewinds e aofia ai: Wynona Lee, Dr. Angela Sy, Magdalene Augafa-Leauanae, Vaa Tofaeono, Tofoi Unutoa-Mageo, Salote Aoelua-Fanene, Solinuu Savusa, Luana Scanlan ma Dr. Kathy Tong. [ata: Leua Aiono Frost]

KANESA - A'OGA MO TAGATA SUESUE ITUAIGA KANESA

 

O le aoaoga fa'apitoa mo i latou e fa'atautaia suesuega i ituaiga Kanesa eseese, o aga ma uiga e iloga ai, ae maise o togafitiga ma ala ua mafai ona fa'afo'ia ai tuga o lea gasegase fita, na fa'atautaia lea e nisi o foma'i na malaga mai, Dr Angela Sy ma Dr Kathy Tong ma i le INSPIRE.

 

O i la'u nei sa fa'auia mai e Dr Tofaeono & Luana Scanlan ma le nisi e aofia ai Va'a Tofaeono ma le tama'ita'i so'oupu o Salote Aoelua-Fanene ma sa faia latou fonotaga fa'alea'oa'oga i le Ofisa Autu o le American Samoa Community Cancer Coalition i le latou potu fono i Nuuuli ae fa'ai'u ai i se latou mafutaga fa'atasi i le Tradewinds Hotel ma mae'a ai.

 

O le aoaoga lea o le INSPIRE e lima aso na fa'atino ai ma ua aota'uina ai nisi o alo o le atunu'u sa latou naunau e fia iloa fo'i lea agava'a ma malamalama'aga tau le ma'i Kanesa i ona ituaiga eseese ma suesuega ma latou fa'amaumauga ua mae'a tamau ai.

 

O i latou na auai ma ua mae'a tau'avea lea kosi na aofia ai Dr Tofoi Mageo, Magdalene Augafa Leauanae, Wynona Lee ma Solinu'u Savusa. O le fa'aumaga o lea polokalama matagofie sa maua ai ma le nonofo fua i po e lua i le Tradewinds fa'atasi ma latou faia'oga na malaga mai, ina ia fefa'asoa'i atili ma fiafia fa'atasi.

 

O i latou nei sa auai ua fa'ailoa fo'i lo latou fiafia, aua o suesuega ma latou tusitusiga atoatoa nei ua fa'ailo, o nisi nei o tomai e sili ona mana'omia ona fa'amalamalama ai i latou e fa'auia atu ni fautuaga ma tima'iga i le lautele o i latou ua a'afia i le kanesa. O lea aoaoga na mae'a lelei i le fa'aiuga o le tausaga ua te'a, ia Oketopa 2017.

 

AOAOGA MO I LATOU E TAUSIA TAGATA I AI MA'I TUMAU

 

O lo ua fa'alauiloa mai le a'oa'oga fa'apitoa mo i latou uma o e tausia tagata e i ai gasegase tumau tau le tino po'o le mafaufau, tausia fo'i tagata matutua i tua i aiga ma falema'i, ma ia patino fo'i tomai eseese e ao ina fa'aleleia atili ai lo latou iloa ona tausia lelei o a latou pelega.

 

O lenei a'oa'oga e tatau ona e fa'amauina lona avanoa e te auai ai, ma e lesitala ai suafa a'o le'i tuna'i le aso 26 Ianuari, 2018. O le aoaoga o lo'o fa'atautiaa e le Pacific Youth & Community Development, ae amatalia le a'oa'oga lenei ia Ianuari 31, 2018.

 

O le telefoni e maua ai lau feso'ota'iga ma le PYCD o le 699-7923 po'o le emeli info@pycd.com e fesiligia ai nisi fa'amatalaga i lenei a'oa'oga taua.

 

I a'oa'oga o le a fa'atautaia, e aofia ai le agaga tonu e afua ai o lau tausiga - Le alofa i e gasegase tumau, alofa i pelega ua matutua ma le fa'amalosiga sili o lau aganu'u, e afua mai le tausiga o matua, ou manuia.

 

O le a'oa'oga lenei e mafai ona fa'ailoa ai ia te oe, le tausima'i, ituaiga tomai eseese e tatau ona e iloa lelei i tausiga o i latou ua matele ina tele itula o le aso e moe ai, ia le maua i ni palagia o nofoaga ma le tua ona o le umi ona taooto i latou i moega. O le tausiga lelei o ni palagia e mafua mai lea tulaga, ma mea fa'apena.

 

O nisi o tomai aoga lava e a'oa'oina ai tausima'i, o ala e fa'ailoa mai ai le tiga e i latou ia te oe, ae maise i nisi o le fanau na soifua mai e le atoatoa le malosi o le tino ma le mafaufau.

 

O ala fo'i e fa'aitiitia ai avanoa e mafai ai pa'u se tasi o lo'o tausia fa'apitoa mai luga o le moega, po'o le taumafai fo'i e tula'i i luga ma savali. Ia iloa fo'i ona a'oa'o gasegase i ala e mafai ai ona fa'ate'a filemu atu le manatu i le tiga o le tino, ae fa'afiafiaina le mafaufau i nisi mea matagofie o le olaga, e sili lona taua i lo tiga.

 

Ia iloa lelei fo'i ala e tausia lelei ai le soifua maloloina o gasegase tausi fa'apitoa, ma ia tumama i moega ma ieafu ma solo, o mea e fa'aaoga uma i le tausiga o gasegase. Ia manogi mama mea uma ma ia fa'alala fo'i moega i taimi e avanoa ai ma mugala lelei.

 

E o'o lava i tulaga tausisia o le soifua maloloina lelei o nifo ma fofoga, ua auiliilia uma i lenei aoaoga fa'apitoa mo tausima'i, ae maise fo'i o le gaosiga o mea taumafa mo e gasegase fa'apea ma ituaiga mea'ai e ao ina fa'atele i ai le latou 'aiga fa'atolu i le aso e tasi.

 

Ua i ai sini e fa'atutu e mafai ona ausia e se tausima'i, ona fa'ae'e lea ia te ia e fa'afetaia ai le auaunaga matagofie ua mae'a fa'atino, ae maise o se matati'a ua ausia i le taumafaiga ma le auaunaga. E le o nei mea le sini atoa o le fa'amoemoe, ae ia tausia pelega uma ma le fa'aeteete tele ma le alofa moni.

 

Ia iloa fo'i e tausima'i so'o se tautua feso'ota'i ma latou galuega, ina ia fesoasoani i nisi o sapalai e mafai ona mo'omia i taimi e tula'i mai ai le mana'omia. O lenei auaunaga o le a maua sina taui e le sui e auai ma mae'a lelei le kosi lea e ao ina ausia le 480 itula o e auai i a'oa'oga i le tausiga i le Fatuoaiga Hope House ae fa'atautaia e le vasega o Foma'i fa'apitoa mai le UH i Hawaii.

Comment Here