Ads by Google Ads by Google

Tala I Vaifanua


[ata: SN]

OSOFA'IA OFISA KAMUPANI I NUUULI GAOIA MEA TAUA:

 

Ua mae'a ona o'o atu leoleo i le fale o lo'o fa'atulaga mo fonotaga a le Chinese Association i Amerika Samoa i Nuuuli, mo se ripoti aua na osofa'ia lea fale i le po o le Lua, Ianuari 02, 2018.

 

O lea fale e tu lata ane i se Malumalu i tua atu o le faleoloa o Paea i Nuuuli, ma ua masani fo'i nai aiga i lea vaia'ai, e faia ai lava fonotaga a nai uso mai Saina, lea e ta'ita'ia fo'i e le susuga Manu'a Chen.

 

E le gata la i le susuga Manu'a, ae ua faia ai fo'i fa'atasiga ma fonotaga a le Komiti Fa'afoe o le Asosi Volley Ball Federation a Amerika Samoa.

 

O le Failautusi o lea asosi volipolo, e fa'aaogaina le masini komipiuta o lo'o i ai i lea ofisa, ae ua iloa ai, sa osofa'ia i le po ma avea ai komipiuta e lua ma le masini lolomi e tasi.

 

Ua i lima o ali'i leoleo lea mataupu, ae o lo'o mana'omia lava se fesoasoani e sui o lea Asosi Volley Ball po'o ai na va'aia se tasi o lo'o aga'i mai lea fale i le afiafi o le aso Lua.

 

O le taimi nei ua amata ona faia galuega ma suesuega a leoleo, ma ua fa'asolosolo fo'i ona latou fesiligia nai aiga tuaoi. Ae ua fia maua fo'i se isi fa'amatalaga i se pisinisi ua fa'atau atu i ai, po'o se aiga fo'i, ua te'i fa'afuase'i ona maua se latou komipiuta ma le se masini lolomi, e atagia ai, o ni mea taugata, e le gafatia e le fanau ona fa'atauina i se totogi e tasi mai lana galuega.

 

O mea fa'apena e mafai ai ona fa'ailoa ane i se tasi o sui o le Komiti fa'afoe o le Asosi Volipolo a le ASVBF ma tau sailia ai lea masini aua o lo'o i ai uma fo'i fa'amaumauga a lea asosi mo a latou galuega fai i lenei tausaga.

 

Fa'ailoa e le Ofisa o leoleo, e le mafai ona fa'ailoa mai, ae ua mae'a i ai sui ua va'ai toto'a i i ai i latou mo le fa'amaoniga, fa'ato'a saisaitia ai se tasi ua mautinoa sa ia faia lea tulaga.

 

O le faitoto'a i tua o lea fale, sa vane e le sui na osofa'ia lea Ofisa, ma ulufale ma toe ulufafo ai fo'i.

 

GALUEGA KOMITI FA'AFOE AUFAIPISINISI I AS 2017:

 

Pe a toe tepa i lenei tausaga ua mavae atu, 2017 ma galuega na mafai ona fa'atino e le Komiti Fa'afoe a le Aufaipisinisii le atunu'u ina ia fa'afaigofie ai a latou galuega tau atina'e i totonu o Amerika Samoa, ua aotelega i se toe tima'ia o le Malo ina ia toe magafagafa lelei lafoga totogi o Oloa fa'atau mai fafo i luga o Uafu.

 

Na latou taumafai fo'i ina ia auau fa'atasi o latou taofi ma se fa'ai'uga a le fono faitulafono i nei pili na fa'aulu atu e le faigamalo.

 

Fa'afetai e maea lea tausaga ma ona tauaofiaga, o lo'o te'ena pea le pasia o nei pili i le fono faitulafono. O se manatu fa'aalia lea o le susuga John Wasko, lea e fa'auluulu i ai le itu o tima'iga ia silafia a le Chamber of Commerce (COC) po'o le Komiti Fa'afoe mo Fefa'ataua'iga a le Aufaipisinisi.

 

O se tasi o sui o le Komiti lava lea, Paul Young, sa mua'i tula'i ma fa'ailoa atu nisi o vaega e le talafeagai ai lea pili tau fa'aulu i lafoga totogi mi oloa na fa'atau mai fafo i luga o Uafu, lea e fa'alauiloa o le Lafoga 7%.

 

O le ta'ita'ifono o le COC, Taotasi Archie Soliai sa matua galue malosi ina ia silafia e le mamalu o le fono faitulafono a'afiaga o lo'o atugalu i ai le Komiti Fa'afoe o Fefa'ataua'iga a le Aufaipisinisi, pe a pasia lea pili.

 

E ese mai nei galuega sa matua fa'afinaua e le COC i le tausaga ua mavae, ae ua fa'ailoa fo'i e Wasko, o lo'o i ai isi fonotaga taua sa manatu le latou komiti e ao ina pasia e le aotelega o le COC ina ia fa'atuputele ai feso'ota'iga tau fefa'ataua'iga ma i latou i Amerika Samoa nei, ae le'i pasia fo'i e le Komiti Fa'afoe aoao.

 

O nisi o nei mataupu e aofia ai se latou fonotaga na tapena e vala'aulia mai ai sui iloga o malo fa'aatumotu o lo'o tuaoi ma Amerika Samoa e aofia ai: Emepasa o Saina lea e alaalata'i i Samoa, Emepasa o Amerika lea e alaala ma galue i Fiti, le Sui Mamalu o le United Nation Development Program Resident Representative lea e alaala fo'i i Samoa, fa'atasi ai ma le Peresetene o le Chamber of Commerce a le tatou malo.

 

E ese fo'i mai lea mataupu, sa talanoaina fo'i se nusipepa mo fa'amaumauga ma tusitusiga a le COC e aofia ai ma sona itu e mafai ona talosaga ai se  kamupani e fia avea ma Totino o le Komiti Fa'afoe a le Aufaipisinisi i Amerika Samoa, peita'i e le'i pasia fo'i lea si'itaga taua o le tautua a le COC mo ana totino uma o lo'o ua mae'a avea ma sui i le fa'alapotopotoga.

 

I sona taofi fa'aalia, "E tatau lava ona vave faia galuega a le COC e fa'aleleia atili ai so'otaga a le Komiti ma pa'aga faipisinisi i le atunu'u, ia maua fo'i avanoa lelei o na sui e fa'ailoa mai ai latou taofi, e ala i so'otaga fa'ainiteneti nei, ma fatufatu aga'i i ai manatu ma ni suiga e alagatatau ona faia mo le aga'i i luma o le Fa'alapotopotoga a le Aufaipisinisi iinei ae maise lava o le atina'e o le atunu'u."