Ads by Google Ads by Google

Tala I Vaifanua

GALULUE ASCC & NATIONAL PARK - AOGA TUSI ATA!

 

Ua amatalia ona so'ofa'atasi i se polokalama e fa'atautaia ai aoaoga ma matua una'ia ai le tusia o ata o measina a Samoa e ala lea i le toe tima'i o fanau talavou i vasega laiti i a'oga tulaga muamua, ia toe fa'amasani e tusia ata o measina a Samoa.

 

Ua amatalia i se maliliega a le ASCC ma le National Park a Amerika Samoa se polokalama mo le lua tausaga lea ua mua'i fa'ata'ita'ia ai, pe tua ma ni a lea taumafaiga

 

Ua fa'amalosia nei le fanau a'oga i le Kolisi ina ia fa'amaumauina foliga mai o Measina a Samoa, ia taumafai ona taina, tusia ata, pe gaosia fo'i nei measina uma. O nei measina e aofia ai le gaosiga o le siapo, ta o fa'atagata po'o meatau a Samoa, ma le lalagaina o ietoga a Samoa.

 

O nei galuega alofilima uma ua mae'a fa'aalia i le National Park o Amerika Samoa i le latou Ofisa e asiasi atu i ai tagata lautele ma malo mai fafo ina ia maimoaina ai.

 

O le fa'amatalaga mai, na afua ona fa'aosofia lea lagona lelei i le va o le National Park ma le ASCC ina ua talosagaina le fanau o tau'avea le Atisi a le Kolisi e le a'oga tulaga muamua i Midkiff Leone e avea ma nisi e fa'ata'ita'i i ai le fanau a'oga talavou, i le potu a'oga o le Vasega 3, i Leone Midkiff.

 

O iina na amata ai ona fa'aofi atu e le fanau a'oga Atisi a le Kolisi le tele o tala logomalie i le fa'afofoga a nei fanau talavou lava o le vasega 3 a Midkiff, ma latou taumafai loa ona gaosia nei Oloa Samoa po'o measina a Samoa. O tala ua latou fa'alogo ai, ae o lea fo'i ua latou toe taumafai e fa'atino mai Measina nei e fa'amatalatala i nei tala Samoa logomalie.

 

Ua le gata i le fanau a'oga, ae ua avea fo'i ma se avanoa lelei ua fa'alogo ai nei sui mai fafo o le National Park, le vaega a Park Rangers, ua fa'aaoao atu ai ma i latou i le gaosiga o nei Measina Samoa. Lea ua fa'aosofia loa ma lagona, e ao ina mataituina ma maimoa ai nisi o fia iloa nei Measina ma o latou aoga.

 

"O le avanoa lelei lea ua maua e le fanau talavou lava o le tatou atunu'u e silafia ai nei talatu'u a Samoa, ofi atu ai ma le iloa ona gaosia, ma tusia ata o nei measina o aofia ai talatu'u nei, ma toe maua ai le avanoa e lagona ai le taua o measina i lo latou olaga a'o tuputupu a'e i le tatou atunu'u. Mo nisi o uso mai fafo ua maua lenei avanoa, ua fa'afetaia e i latou le ala ua latou maua taitaia ai le gaosiga o measina taua a le atunu'u, ma o latou foliga mai. Ua latou naunau e fa'aalia, aua o galuega lava na aofia ai ma i latou i le gaosiga,” o se tala lea a le tama'ita'i Faia'oga Atisi a le ASCC, Regina Meredith.

 

O le tulaga tau le iloa, gaosi ma toe fa'aalia, o se vaega sili lea ua maua e le National Park e avea ma latou pitola'au i lenei feagaiga matagofie. O le latou fa'anaunauga, ia fa'amauina ma iloa lelei gaosia mea taua a Samoa e ona augatupulaga faia'e i le lumana'i.

 

FA'AFEILOA'I 2018 SAUNIGA LOTU & FIAFIA SAMOA MUSIKA FOUNDATION

 

E ese mai le tele o sauniga lotu na fa'atautaia ina ia fa'afeiloa'ia ai le tausaga fou ma le manuia e ekalesia ta'itasi i le atunu'u, sa oso fo'i le fa'afiafiaga tele a le Samoa Musika Foundation Inc.

 

O lea fa'afiafiaga sa faia lea i le Tradewinds Hotel ma sa amatalua i le itula e 6:00 i le afiafi ae fa'ato'a tapunia aloa'ia i le 1:00 i le vaveao. Na fa'atulaga ai le tele o laulau sa fa'atauina atoa e Kamupani i le $500 ma pepa ulufale mo e ta'ito'atasi ma ni pa'aga mamae fo'i o lo'o fiafia fa'atasi i lenei tausaga.

 

O le tala mai sa matua matagofie le tulaga o tausami ma le vasega o fa'afiafiaga na maimoaina e i latou na auai. O se avanoa lelei fo'i lea mo pulega o kamupani eseese sa fa'atauina latou laulau, po'o aiga fo'i na manatu e avea lea avanoa ma se fa'atasiga lelei o latou auaiga e amatalia ai le tausaga fou ua aulia ma le manuia.

 

O i latou na fa'afiafia e aofia ai Ulale Pusi Ulale, BETS, Failauga Peke Anoa'i, mai isi, peita'i sa matua iloga le sao o Tui ma Malie Letuli, fa'apea ma Jonita Fruean ma Mal Lavata'i.

 

O lea fiafia na fa'ato'a amatalia ina ua mae'a lelei fo'i sauniga lotu sa alofaiva i ai le to'atele o Ekalesia i le tulua o po ma ao o le aso Sa na te'a atu. O nei sauniga mamalu e mua'i avea ma taulaga si'itia a le to'atele o aiga.

 

E muamua lava ona gasolo i latou i sauniga lotu ina ia talosia fa'atasi fa'amanuiaga a le Atua mo lenei tausaga fou ua amatalia, ae muta ai le toe tepa i tua i mea sa o mai ai.

 

"Ua tuana'i mea tuai, fa'auta ua fa'afouina mea uma!" O le tima'iga ia ola ai, ia le tu'ua le fa'afouina o lou sui e tusa o lau amio, le va'aiga ia te oe, ae maise o le suia atoa o lou talitonuga ia te oe ma lou malosi ma agava'a mai le Atua mo oe e te fa'aaoga tatau e te soifua ai!"

 

O tima'iga mo se amataga fou, ia fou le faitauga o le numera, ia fou fo'i lagona ma fa'anaunaugata'iga lelei e fia soifua fa'atasi ai aiga. Ia ala mai ai fa'amanuiaga a le Atua ona o le savavali i le amiotonu a le Atua, ma ia soifua matata'u lava!

 

Na faia fo'i se fa'ailo a le Sadies by the Sea i Utulei ma sa fa'amaualuga fo'i pesega matagofie mo le tausaga fou, ae tutu fa'atasi tagata uma na aofia ma fa'ataulia toe minute o le tausaga tuai, ae to'ai mai le tausaga fou ma ona aluga.

 

Na tatala fo'i le Ice Breakers latou i le Airport Road mai le 10:00 i le afiafi se'ia pasia fo'i le itula o le aso fou, ua ausia ai Ianuari 01, 2018.