Ads by Google Ads by Google

Tala I Vaifanua


[ata: SN]

$2.6MIL TUPE MO LE MALO AMERIKA SAMOA - SALA STAR KIST:

 

Ua fa'ailoa mai ua mae'a toe taga'i ma ua pasia e le USEPA le latou fa'aiuga tamau mo le sala tupe e ao ina totogia e le StarKist Company ma ana Kamupani Fa'apa'aga e aofia ai le StarKist Samoa Company, ina ia agatonu ai vaega o tulafono tau le tausia lelei o le Siosiomaga ua fa'amaonia ua solituina a'o fa'ataunu'u galuega gaosi a le Kamupani I'a lea i inei. O le sala na mua'i fa'atulaga e le USEPA e $6.5 miliona ia Setema 2017.

 

Peita'i e ese mai lea $6.5miliona, ua fa'aopoopo i ai ma le $200,000 e afua mai lea ina ia usita'ia tulafono o le Suavai Mama [Clean Water Act] lea fo'i na mua'i maua o solituina a'o le'i fa'ailoa lea sala e le Fa'amasinoga.

 

O se tasi o suiga ua i ai i le maliliega fou ua fa'ataoto mai nei, ua avea Amerika Samoa ma se tasi o vaega e totogia i ai se vaega tupe o lenei sala a le Kamupani I'a, StarKist Samoa. O le $2.6 miliona o le a totogia lea ia Amerika Samoa, ae o le $3.9 miliona e totogia lea i le Iunaite Setete o Amerika.

 

E ese mai lea sala, ua fa'atulaga fo'i e ao ina auina mai e le Kamupani I'a ni mea faigaluega e e faaaoga i fa'alavelave fa'afuase'i i le latou lala i Amerika Samoa nei, ina ia lelei ona tali atu i nisi o fa'aletonu e ono a'afia ai tagata i kasa o'ona e pa atu i le siomaga o le atunu'u. O le tau o ia masini e o'o i le $88,000.

 

"O lenei maliliega ua fa'amautu mai e ao ai i le StarKist ona fa'aleleia tulaga o le suavai tatafe i vaitaimi o timuga tetele, lea e ao ina le a'afia ai le sami o Pago Pago i le mau lapisi o le a fa'amautu mai i ai ona o tafega," o se fa'amatalaga lea a Alexis Strauss o le Pulega a le USEPA i ona Teritori ma Setete i le Pasefika i Saute.

 

Ua ia fa'ailoa mai fo'i, "Ua mae'a fa'atulaga le matou so'otaga lelei ma le ASEPA ina ia mataituina le faagaosloga o galuega uma nei e ao ina toe fa'aleleia, ia mautu ai le agava'a o lea Kamupani e fa'aauau ana galuega gaosi, ina ua mae'a usita'ia fa'aiuga uma o lenei maliliega ma le USEPA."

 

O lo ua aofia ai fo'i i lenei maliliega le toe fa'aleleia e le StarKist o le tulga tau le suavai tatafe lea ua maua ane o lo'o sasa'a atu sa'o i le ogasami o Pago Pago ae le'i mua'i fa'atagaina.

 

O le suiga ua i ai nei, e ao i le StarKist ona sailia se latou fa'atagaga e fa'auia ai tafega o latou suava lapisia i le sami o Pago Pago, fa'ailoa atu i ai ala e fa'aitiitia ai lea tulaga ma i'u ai ina matua'i le toe i ai nei suavai lapisia e tatafe aga'i atu i le sa'o atu i le sami.

 

Pe afai e usita'ia uma nei aiaiga o suavai lafoa'i ua fa'atulaga o le a fa'aitiitia le aotelega o nei suavai lafoa'i ma latou lapisi e tusa o le 85%, silia lea ma le 13miliona pauna.

 

O lenei i'uga ua malilie fa'atasi i ai le USEPA ma lea Kamupani e tu'uina mai mo le 30 aso e fa'ailoa atu ai ni manatu o le mamalu lautele i itu na lua, ona faa'to'a fa'amauina lea ua pasia ma fa'amalosia loa ona totogia sala fa'atulaga.

 

O le ulua'i talosaga na toe fa'aulu fa'atopetope e le  Sui o Amerika Samoa i le Konekeresi, Aumua Amata, ina ia totogia mai se vaega o lea sala a le Kamupani ia Amerika Samoa ina ia fesoasoani i tagata faigaluega lea ua motusia galuega ona o le toe fa'asa'oina o mea uma ua fa'atulaga mai e le USEPA i le StarKist Samoa, na ala ai ona toe iloilo se maliliega fou. Fa'afetai foi i le sao o le tatou sui faipule i le Konekeresi mo lana taumafaiga ua fa'aopoopo mai ai lea seleni mo le tatou malo.

 

E LE'I TELE NI SOLITULAFONO O LE VAITAU KERISIMASI 2017

 

I le taimi o poloka a leoleo sa fa'atino mo le tau taofiofia mai o le mamalu lautele i le so'ona fiafia ma a'afia ai mafutaga pele ma mamae i fa'alavelave fa'afuase'i i luga o alatele ma feoaiga a le atunu'u, ua maua mai a latou fa'amaumauga, e matua maulalo lava pe a fa'atusa atu i le tele o tausaga ua mavae.

 

E na'o le 27 nisi na saisaitia e leilei i le vaitau lenei o le Kerisimasi e afua mai le taimi na amata ai poloka a leoleo i luga o alatele se'ia o'o mai i le aso Lua na te'a nei. E to'a 17 i latou na fa'asoesa ma malomaloa ua lepetia ai le nofo filemu, ma o le tele lava e afua mai ona ua fa'asua'ava ma fia malosi ai.

 

Peita'i e nao le to'afitu lava na maua i le 'ave ta'avale fa'asua'ava i luga o le alatele. O le poloka lea a leoleo, ua aoga tele i nei tausaga uma ua fa'atautaia ai, aua ua mafai ai ona tu'u eseeseina mai i latou e solia le tulafono ma i latou o tumau e tausi tulafono.

 

"O le mea taua lava e leai ma se tasi na maliu i se fa'alavelave fa'afuase'i ona o feoaiga i ta'avale, o lea ua iloga ai, ua nofo filemu mai tagata i lenei tausaga,” o se saunoaga fa'apitoa lea a le susuga le Komesina o Leoleo, le tofa ia Le'i Sonny Thompson.

 

Pau o le mea tele na tupu i lenei vaitau, ona ua mafai ona ua mae'a ona fa'amalosia le tusi saisai mo le sui na tafanaina le ta'avale a leoleo i Tafuna.