Tala I Vaifanua

KI MOLI KERISIMASI AFIO'AGA NUUULI PO KERISIMASI!

 

Ua tula'i mai fo'i le afio'aga o Nuuuli i le latou saofaga mo le fa'amanatuga o le Kerisimasi fiafia 2017, ua fa'atulaga ai latou moli uma o maota fa'asolo i totonu o le afio'aga, ina ia ki ma fa'aalia atili ai le agaga o le Kerismasi i le aotelega o le afio'aga.

 

Na fa'atautaia se sauniga mata'ina mo lea fa'amoemoe a'o loma le afiafi o le Kerisimasi ma sa fa'aalia fo'i le agaga foa'i ina ua tufatufaina mai fo'i ma le 'aiga mama o le afiafi a tamali'i.

 

Ua iloga ai ona matagofie le sauniga mamalu, ina ua ki moli uma ua mae'a saunia e aiga ta'itasi i totonu o Nu'uuli e faasolo lava i le ala. O fale ua teuteuina i moli fe'ilafi atoa ai ma Falesa, o pou moli i la'au tutu i autafa o fale o aiga ua le iloga se ma ua teuteuina.

 

"O le agaga lea o se mea, ia fa'aosofia lagona lelei, aua o le lagi lea tatou e aga atu i ai, ua tatou iloa e pei ona fa'ailoa mai, e teuteuina i auro ma ario ma ma'a taua uma. E mama ma le matagofie,” o se tala lea a se tasi o tama matua o le afio'aga na fesiligia i sona lagona e ala ai ona faia lea galuega lelei, i lenei vaitau o le Kerisimasi.

 

Ua so'o fa'atasi fo'i Ekalesia tetele i totonu o Nuuuli i lea fa'ailo, ma sa tau fai tofu sao ta'ita'i i le sauniga fa'apitoa e ki ai moli uma i lumafale o aiga taitasi ma ekalesia i totonu o le afio'aga.

 

O le afio'aga fo'i o Aoloau lea sa latou muaimalae i lea fo'i fa'ailo matagofie, ma e mautinoa fo'i, e soso'o i lea tausaga fou lea fo'i fa'ailo ma atili fa'ateleina ai le olioli ma le fiafia o tagata uma i lenei vaitau o le tausaga, le vaitau e fa'ailoa atu ai lou alofa i se tasi, fa'amagalo i se tasi sa lua feseta'i, ma fa'asoa atu se mea ua ia te oe mo se tasi i lea vaitau o lagona lelei.

 

O se tasi o le afio'aga sa ia fa'ailoa mai, "O lenei fa'amoemoe ina ia galulue fa'atasi tagata uma i le afio'aga e fa'ailoga le aso soifua o le Mesia, ma ia gatasi fo'i le agaga o tagata e fa'atino ai lenei fa'amoemoe. O lea ua ausia uma nei mea, fa'afetai i le Atua."

 

FAI MEAALOFA LOU TUAOI, FA'ASOA LOU MANUIA UA TELE!

 

O le agaga tonu o le tautalaga fa'apitoa a le fa'auluuluga o le faigamalo a Amerika Samoa i lenei tausaga, Kovana Lolo Moliga sa ia saunoa ai, "O le fa'asoa atu o lou manuia i se tasi e ala i le soifua foa'i, o se mea e ao ina fa'asilisiliina lea e tagata uma i lenei vaitau o le soifua mai o le Mesia, ma lona fa'amoemoe e toe osia ia te ia le taulaga fa'aola mo tagata agasala uma."

 

"O se meaalofa lea ua sili lona tau i lo se meaalofa ua tatou maua i le olaga nei. Peita'i, ua fa'ailoa ma fa'amautu atili ai le mafuaga o lenei vaitau, lea ua fa'ailo o le vaitau na soifua mai ai le Fa'aola."

 

"Pe afai lava ua leai se isi mea e te mafaia ona avatua, ua e iloa se tasi o lou vaipanoa o e alaala ai o lo'o i ai se mana'omia, foa'i atu i ai. O le fa'atinoga fo'i lena o le alofa foa'i atu o lo'o 'auga i ai lenei vaitau."

 

"A'o tatou avatua mea lelei uma mo a tatou fanau, se'i taga'i ane pe le o i ai se isi tamaititi o le tou tuaoi o lo'o nanau lona loto i se meaalofa fa'atauva'a, ae le o gafatia e lona aiga, ona e le o lava le fa'asoa? A'apa ane i ai ma e foa'i. O oe lava lena ua fa'asino atu e le Atua mo se fesoasoani."

 

"Afai ua lava ma totoe lau fa'asoa, e mautinoa lava e le o fa'apena uma lotoifale o lou afio'aga. Tau lava o sina taimi itiiti e tau matauina ai se aiga o lo'o i ai se mana'omia, e mafai ona e fa'atumu mo se aso e tasi lena avanoa lelei. Fai ma sou sao i le fa'amoemoe ma le auga tonu o lenei vaitau i le lalolagi."

 

“Fa'afetai fo'i i le Atua ona o le saogalemu o tatou ola ma nonofo ai i lenei laueleele o Amerika Samoa, ua avea lea ma sao o tatou fanau o lo'o autova'a atu e tautua le Malo tele i ana vaega au”.

 

AIGA FIAFIA A LE FA'ALUPEGA & PULENU'U O SUA:

 

O le aiga fiafia e fa'ai'u ai galuega o lenei tausaga a le afioga le Fa'alupega Igafo Maria Va'a Brown ma le vasega o ali'i Pulenu'u o lona itumalo, sa fa'atautaia lea i le aso Faraile i le Fale'aiga o le Fiafia Restaurant i Fagatogo lava.

 

Sa mua'i faia le latou se'i fa'alilolilo ina ia fa'atino ai a latou Meaalofa e fa'ailo ai fo'i le agaga o le loto foa'i atu i lou tuaoi o lo'o lua galulue fa'atasi. Peita'i o le latou taumafataga atoa e tapena ma totogia lea e le afioga le Fa'alupega o le Itumalo, o ia fo'i lea o lo'o galue o se So'oupu mo le vasega o Fitafita Tuai i le latou Ofisa Autu i Tafuna.

 

"Ona o le fiafia tele i le galulue fa'atasi fo'i o ali'i Pulenu'u o le matou Itumalo, e fa'afetaia fo'i le latou galuega ma le pitola'au taua e faia i o latou afio'aga o lo'o tutula'i mai ai. O le agaga o lenei vaitau, o le galulue fiafia ma ia maua se taui itiiti o le galue ma le fa'amaoni,” o se tala fiafia lea a Igafo.

 

O i latou na auai i lea fa'amoemoe e aofia ai ali'i pulenu'u o Fagatele Pete Tuitea mo le afio'aga o Masausi; Fa'aumuumu Paulo Vaeluaga mai Afonotele; Tuiagafotu L. Galu mai le afioaga o Sa'ilele; Meko Troy Fiaui mai le afio'aga o Amaua, Auto ma Alega; Amotasi Laloniu Maloa mai le afio'aga o Lauli'i ma Agaolei'a Pa'uesi Manumalo mai le afio'aga o Fagaitua.

 

O le latou fa'alupega na fa'atuina lea fa'amoemoe ina ia so'ofa'atasi i le agaga e tasi i le galuega puipuimalu o afio'aga ma o latou tagatanu'u o alaala ma papa'a'ao ai o Igafo mai Masausi.

 

"O lo ua taua'aoina latou meaalofa na tapena e le tasi mo lana piki i le matou se'i, peita'i na ou sau mamao lava ma le fagu usiki mo Pulenu'u ta'itasi ina ia mafai ona la'ua fa'amanuia faatasi latou aso Kerisimasi ma lona to'alua i le lotoifale o le latou aiga,” o se tala ata lea a le afioga le fa'alupega lea ua fiafia ua toe fa'atasi ma i latou uma mai lona itumalo.

Comment Here