Ads by Google Ads by Google

Tala I Vaifanua

LAFOGA TOTOE E LE'I TOTOGIA E LE MALO - MAUA NEI LAVA!

 

Ona sa to'atele nisi na fa'asea mai i le tatou Ofisa o le nusipepa aua e le'i maua lava latou Lafoga o le tausaga ua te'a, ona avea lea ma mea e maofa ai fo'i le loto, aua ua manatu lava ua mae'a uma lafoga talu mai le toe taimi na tali ai lafoga ia Setema.

 

Peita'i na vala'au ma ua maua mai ai se tala fiafia, "Ua faaalu atu uma lava nei lafoga uma o totoe i le aso ananafi ma le aso! Afai la o iai se tasi sa fa'asea atu ona o lea tulaga, o ia lena ua laki i lenei Kerisimasi, ua matua maua lava lona to'omaga e fa'aleleia ai lana Kerisimasi ma lona aiga." O se tala fiafia mai lea a se tasi ua leva fo'i o tautua mai lea vaega o le tatou malo.

 

Ua le maua pe fia se vaega o lo ua fa'atulaga e fa'aalu i lenei vaega o totoe o lafoga totogi mai i tagata faigaluega e le malo. Peita'i, o le vaega na totogia muamua ia Setema o nisi fo'i o lafoga s afa'ailoa mai e $1.7miliona.

 

LE'I TOE LELEI LAVA LE MASINI FA'ATA OLE  "MRI/CAT SCANNER"

 

Ua silia ma le 3 vaiaso talu ona tatalia le fa'aleleia atoatoa mai o le Fa'ata fa'apitoa o gasegase tuga o le tino, ina ia maua ai a'afiaga o le Kanesa, poo a'afiaga tuga fo'i o ivi ma so'oga o le tino.

 

E aoga tele lenei fa'ata, peita'i ua le maua lava se tonu i le aso moni e mafai ai ona toe fa'aaogaina. E tusa o le tolu vaiaso talu ai, sa fesiligia ai ona o le to'atele e vala'au mai ma fa'asea ua le mafaia ona faia ni fa'ata e fa'aaogaina ai lenei fa'ata malosi, peita'i, ua le fa'atalia e tagata ae ua gasolo i latou i Samoa ma Niu Sila e faia ai latou fa'ata nei.

 

Fa'ailoa mai e le susuga le CEO o le falemai Faumuina John Faumuina, "O totoga na aumai muamua e le'i toe mafai ona fa'aola ai le fa'ata malosi lea, peita'i ua o'o mai le Inisinia ma iloa ai e i ai isi mea fa'aopoopo o lo'o mana'omia, lea fo'i la na toe saili ma ua faao'o mai i le meli lava. A mae'a loa ona fa'apipi'i ona siakia fo'i lea pe ua mafai ai ona fa'aaoga lenei fa'ata mo le sailiga o gasegase."

 

O le fa'afitauli lea e iloga mai, e afua ona e faigata le mamao o le nofoaga o lo'o oka mai ai totoga nei e mana'omia o le fa'ata lea, ma e umi fo'i o tatalia le o'o mai o le meli i lenei vaitau pisi o le tausaga. Peita'i sa ia fa'ato'ese lava i le afioga le kovana sili ma le taupulega ona o le tuai ona toe fa'aaoga o le fa'ata lenei - CAT-Scanner.

 

I se saunoaga lava a Faumuina, sa ia fa'ailoa ai, "Ona e na'o le tasi lava lea fa'ata i le taimi nei, o lea ua so'ona fa'aaoga so'o ma avea ma ala e vevela umi ai le masini, ua vave ai fo'i ona leaga ona totoga. Ia a leaga la, o le faigata o le inisinia lava e muamua fiu e saili, lona lua o totoga e mo'omia ona o'o mai ma fa'apipi'i fo'i."

 

Ua le taofiofia tagata e ao ina faia nei fa'ata ae ua fa'ataga lava ona atu i malo tuaoi e faia ai fa'aata ma fa'ao'o mai ai latou faitauga po'o a mai o latou gasegase, atoa ai ma se fa'aiuga fo'i mai na foma'i ma togafitiga e ao ina faia.